ශ්රීමද්වාල්මීකීය රාමායණේ කිෂ්කිංධාකාංඩම් ।
අථ අෂ්ටචත්වාරිංශස්සර්ගඃ ।
සහ තාරාංගදාභ්යාං තු ගත්වා ස හනුමාන්කපිඃ ।
සුග්රීවේණ යථෝද්දිෂ්ටං තං දේශමුපචක්රමේ ॥ 1 ॥
ස තු දූරමුපාගම්ය සර්වෛස්තෛඃ කපිසත්තමෛඃ ।
විචිනෝති ස්ම විංධ්යස්ය ගුහාශ්ච ගහනානි ච ॥ 2 ॥
පර්වතාග්රාන්නදීදුර්ගාන්සරාංසි විපුලාංද්රුමාන් ।
වෘක්ෂෂංඩාංශ්ච විවිධාන්පර්වතාන්ඝනපාදපාන් ॥ 3 ॥
අන්වේෂමාණාස්තේ සර්වේ වානරාස්සර්වතෝ දිශම් ।
න සීතාං දදෘශුර්වීරා මෛථිලීං ජනකාත්මජාම් ॥ 4 ॥
තේ භක්ෂයංතෝ මූලානි ඵලානි විවිධානි ච ।
අන්වේෂමාණා දුර්ධර්ෂාන්යවසං ස්තත්ර තත්ර හ ॥ 5 ॥
ස තු දේශෝ දුරන්වේෂෝ ගුහාගහනවාන්මහාන් ।
නිර්ජලං නිර්ජනං ශූන්යං ගහනං රෝමහර්ෂණම් ॥ 6 ॥
ත්යක්ත්වා තු තං තදා දේශං සර්වේ වෛ හරියූථපාඃ ।
තාදෘශාන්යප්යරණ්යානි විචිත්ය භෘශපීඩිතාඃ ॥ 7 ॥
දේශමන්යං දුරාධර්ෂං විවිශු ශ්චාකුතෝ භයාඃ ।
යත්ර වංධ්යඵලා වෘක්ෂා විපුෂ්පාඃ පර්ණවර්ජිතාඃ ॥ 8 ॥
නිස්තෝයාස්සරිතෝ යත්ර මූලං යත්ර සුදුර්ලභම් ।
න සංති මහිෂා යත්ර න මෘගා න ච හස්තිනඃ ॥ 9 ॥
ශාර්දූලාඃ පක්ෂිණෝ වාපි යේ චාන්යේ වනගෝචරාඃ ।
න යත්රවෘක්ෂා නෞෂධ්යෝ න වල්ල්යෝ නාපි වීරුධඃ ॥ 10 ॥
ස්නිග්ධපත්රාස්ස්ථලේ යත්ර පද්මින්යඃ ඵුල්ලපංකජාඃ ।
ප්රේක්ෂණීයාස්සුගංධාශ්ච භ්රමරෛශ්චාපිවර්ජිතාඃ ॥ 11 ॥
කංඩුර්නාම මහාභාගස්සත්යවාදී තපෝධනඃ ।
මහර්ෂිඃ පරමාමර්ෂී නියමෛර්දුෂ්ප්රධර්ෂණඃ ॥ 12 ॥
තස්ය තස්මින්වනේ පුත්රෝ බාලෂ්ෂෝඩශවාර්ෂිකඃ ।
ප්රණෂ්ටෝ ජීවිතාංතාය ක්රුද්ධස්තත්ර මහාමුනිඃ ॥ 13 ॥
තේන ධර්මාත්මනා ශප්තං කෘත්ස්නං තත්රමහද්වනම් ।
අශරණ්යං දුරාධර්ෂං මෘගපක්ෂිවිවර්ජිතම් ॥ 14 ॥
තස්ය තේ කානනාංතාශ්ච ගිරීණාං කංදරාණි ච ।
ප්රභවනි නදීනාං ච විචින්වංති සමාහිතාඃ ॥ 15 ॥
තත්ර චාපි මහාත්මානෝ නාපශ්යංජනකාත්මජාම් ।
හර්තාරං රාවණං වාපි සුග්රීවප්රියකාරිණඃ ॥ 16 ॥
තේ ප්රවිශ්යාऽශු තං භීමං ලතාගුල්මසමාවෘතම් ।
දද්දෘශුඃ ක්රූරකර්මාණමසුරං සුරනිර්භයම් ॥ 17 ॥
තං දෘෂ්ට්වා වානරා ඝෝරං ස්ථිතං ශෛලමිවාපරම් ।
ගාඪං පරිහිතාස්සර්වේ දෘෂ්ට්වා තාන්පර්වතෝපමමාන් ॥ 18 ॥
සෝऽපි තාන්වානරාන්සර්වාන් නෂ්ටා ස්ස්ථේත්යබ්රවීද්බලී ।
අභ්යධාවත සංකෘද්ධෝ මුෂ්ටිමුද්යම්ය සංහිතම් ॥ 19 ॥
තමාපතංතං සහසා වාලිපුත්රෝऽංගදස්තදා ।
රාවණෝऽයමිති ජ්ඤාත්වා තලේනාභිජඝාන හ ॥ 20 ॥
ස වාලිපුත්රාභිහතෝ වක්ත්රාච්ඡෝණිතමුද්වමන් ।
අසුරෝऽභ්යපතද්භූමෞ පර්යස්ත ඉව පර්වතඃ ॥ 21 ॥
තේऽපි තස්මින්නිරුච්ඡවාසේ වානරා ජිතකාශිනඃ ।
ව්යචින්වන්ප්රායශස්තත්ර සර්වං තද්ගිරිගහ්වරම් ॥ 22 ॥
විචිතං තු තතඃ කෘත්වා සර්වේ තේ කානනං පුනඃ ।
අන්යදේවාපරං ඝෝරං විවිශුර්ගිරිගහ්වරම් ॥ 23 ॥
තේ විචිත්ය පුනඃ ඛින්නා විනිෂ්පත්ය සමාගතාඃ ।
ඒකාංතේ වෘක්ෂමූලේ තු නිෂේදුර්දීනමානසාඃ ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ අෂ්ටචත්වාරිංශස්සර්ගඃ ॥
