শ্রীমদ্বাল্মীকীয় রামাযণে কিষ্কিংধাকাংডম্ ।
অথ অষ্টচত্বারিংশস্সর্গঃ ।
সহ তারাংগদাভ্য়াং তু গত্বা স হনুমান্কপিঃ ।
সুগ্রীবেণ যথোদ্দিষ্টং তং দেশমুপচক্রমে ॥ 1 ॥
স তু দূরমুপাগম্য় সর্বৈস্তৈঃ কপিসত্তমৈঃ ।
বিচিনোতি স্ম বিংধ্যস্য় গুহাশ্চ গহনানি চ ॥ 2 ॥
পর্বতাগ্রান্নদীদুর্গান্সরাংসি বিপুলাংদ্রুমান্ ।
বৃক্ষষংডাংশ্চ বিবিধান্পর্বতান্ঘনপাদপান্ ॥ 3 ॥
অন্বেষমাণাস্তে সর্বে বানরাস্সর্বতো দিশম্ ।
ন সীতাং দদৃশুর্বীরা মৈথিলীং জনকাত্মজাম্ ॥ 4 ॥
তে ভক্ষয়ংতো মূলানি ফলানি বিবিধানি চ ।
অন্বেষমাণা দুর্ধর্ষান্যবসং স্তত্র তত্র হ ॥ 5 ॥
স তু দেশো দুরন্বেষো গুহাগহনবান্মহান্ ।
নির্জলং নির্জনং শূন্য়ং গহনং রোমহর্ষণম্ ॥ 6 ॥
ত্যক্ত্বা তু তং তদা দেশং সর্বে বৈ হরিয়ূথপাঃ ।
তাদৃশান্যপ্যরণ্য়ানি বিচিত্য় ভৃশপীডিতাঃ ॥ 7 ॥
দেশমন্য়ং দুরাধর্ষং বিবিশু শ্চাকুতো ভয়াঃ ।
যত্র বংধ্যফলা বৃক্ষা বিপুষ্পাঃ পর্ণবর্জিতাঃ ॥ 8 ॥
নিস্তোয়াস্সরিতো যত্র মূলং যত্র সুদুর্লভম্ ।
ন সংতি মহিষা যত্র ন মৃগা ন চ হস্তিনঃ ॥ 9 ॥
শার্দূলাঃ পক্ষিণো বাপি যে চান্য়ে বনগোচরাঃ ।
ন যত্রবৃক্ষা নৌষধ্য়ো ন বল্ল্য়ো নাপি বীরুধঃ ॥ 10 ॥
স্নিগ্ধপত্রাস্স্থলে যত্র পদ্মিন্য়ঃ ফুল্লপংকজাঃ ।
প্রেক্ষণীয়াস্সুগংধাশ্চ ভ্রমরৈশ্চাপিবর্জিতাঃ ॥ 11 ॥
কংডুর্নাম মহাভাগস্সত্যবাদী তপোধনঃ ।
মহর্ষিঃ পরমামর্ষী নিযমৈর্দুষ্প্রধর্ষণঃ ॥ 12 ॥
তস্য় তস্মিন্বনে পুত্রো বালষ্ষোডশবার্ষিকঃ ।
প্রণষ্টো জীবিতাংতায় ক্রুদ্ধস্তত্র মহামুনিঃ ॥ 13 ॥
তেন ধর্মাত্মনা শপ্তং কৃত্স্নং তত্রমহদ্বনম্ ।
অশরণ্য়ং দুরাধর্ষং মৃগপক্ষিবিবর্জিতম্ ॥ 14 ॥
তস্য় তে কাননাংতাশ্চ গিরীণাং কংদরাণি চ ।
প্রভবনি নদীনাং চ বিচিন্বংতি সমাহিতাঃ ॥ 15 ॥
তত্র চাপি মহাত্মানো নাপশ্য়ংজনকাত্মজাম্ ।
হর্তারং রাবণং বাপি সুগ্রীবপ্রিযকারিণঃ ॥ 16 ॥
তে প্রবিশ্য়াঽশু তং ভীমং লতাগুল্মসমাবৃতম্ ।
দদ্দৃশুঃ ক্রূরকর্মাণমসুরং সুরনির্ভযম্ ॥ 17 ॥
তং দৃষ্ট্বা বানরা ঘোরং স্থিতং শৈলমিবাপরম্ ।
গাঢং পরিহিতাস্সর্বে দৃষ্ট্বা তান্পর্বতোপমমান্ ॥ 18 ॥
সোঽপি তান্বানরান্সর্বান্ নষ্টা স্স্থেত্যব্রবীদ্বলী ।
অভ্যধাবত সংকৃদ্ধো মুষ্টিমুদ্যম্য় সংহিতম্ ॥ 19 ॥
তমাপতংতং সহসা বালিপুত্রোঽংগদস্তদা ।
রাবণোঽযমিতি জ্ঞাত্বা তলেনাভিজঘান হ ॥ 20 ॥
স বালিপুত্রাভিহতো বক্ত্রাচ্ছোণিতমুদ্বমন্ ।
অসুরোঽভ্যপতদ্ভূমৌ পর্যস্ত ইব পর্বতঃ ॥ 21 ॥
তেঽপি তস্মিন্নিরুচ্ছবাসে বানরা জিতকাশিনঃ ।
ব্যচিন্বন্প্রাযশস্তত্র সর্বং তদ্গিরিগহ্বরম্ ॥ 22 ॥
বিচিতং তু ততঃ কৃত্বা সর্বে তে কাননং পুনঃ ।
অন্যদেবাপরং ঘোরং বিবিশুর্গিরিগহ্বরম্ ॥ 23 ॥
তে বিচিত্য় পুনঃ খিন্না বিনিষ্পত্য় সমাগতাঃ ।
একাংতে বৃক্ষমূলে তু নিষেদুর্দীনমানসাঃ ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে অষ্টচত্বারিংশস্সর্গঃ ॥
