শ্রীমদ্বাল্মীকীয় রামাযণে কিষ্কিংধাকাংডম্ ।
অথ একোনপংচাশস্সর্গঃ ।
অথাংগদস্তদা সর্বান্বানরানিদমব্রবীত্ ।
পরিশ্রাংতো মহাপ্রাজ্ঞস্সমাশ্বাস্য় শনৈর্বচঃ ॥ 1 ॥
বনানি গিরয়ো নদ্য়ো দুর্গাণি গহনানি চ ।
দর্য়ো গিরিগুহাশ্চৈব বিচিতানি সমংততঃ ॥ 2 ॥
তত্র তত্র সহাস্মাভির্জানকী ন চ দৃশ্যতে ।
তদ্বা রক্ষো হৃতা যেন সীতা সুরসুতোপমা ॥ 3 ॥
কালশ্চ নো মহান্য়াতস্সুগ্রীবশ্চোগ্রশাসনঃ ।
তস্মাদ্ভবংতস্সহিতা বিচিন্বংতু সমংততঃ ॥ 4 ॥
বিহায় তংদ্রীং শোকং চ নিদ্রাং চৈব সমুত্থিতাম্ ।
বিচিনুধ্বং যথা সীতাং পশ্য়ামো জনকাত্মজাম্ ॥ 5 ॥
অনির্বেদং চ দাক্ষ্য়ং চ মনসশ্চাপরাজয়ঃ ।
কার্যসিদ্ধিকরাণ্য়াহুস্তস্মাদেতদ্ব্রবীম্যহম্ ॥ 6 ॥
অদ্য়াপি তদ্বনং দুর্গং বিচিন্বংতু বনৌকসঃ ।
খেদং ত্যক্ত্বা পুনস্সর্বৈর্বনমেতদ্বিচীযতাম্ ॥ 7 ॥
অবশ্য়ং ক্রিযমাণস্য় দৃশ্যতে কর্মণঃ ফলম্ ।
অলং নির্বেদমাগম্য় ন হি নো মীলনং ক্ষমম্ ॥ 8 ॥
সুগ্রীবঃ কোপনো রাজা তীক্ষ্ণদংডশ্চ বানরঃ ।
ভেতব্য়ং তস্য় সততং রামস্য় চ মহাত্মনঃ ॥ 9 ॥
হিতার্থমেতদুক্তং বঃ ক্রিযতাং যদি রোচতে ।
উচ্যতাং বা ক্ষমং যন্নস্সর্বেষামেব বানরাঃ ॥ 10 ॥
অংগদস্য় বচশ্শ্রুত্বা বচনং গংধমাদনঃ ।
উবাচাব্যক্তয়া বাচা পিপাসাশ্রমখিন্নয়া ॥ 11 ॥
সদৃশং খলু বো বাক্যমংগদো যদুবাচ হ ।
হিতং চৈবানুকূলং চ ক্রিযতামস্য় ভাষিতম্ ॥ 12 ॥
পুনর্মার্গামহৈ শৈলান্কংদরাংশ্চ দরীস্তথা ।
কাননানি চ শূন্য়ানি গিরিপ্রস্রবণানি চ ॥ 13 ॥
যথোদ্দিষ্টানি সর্বাণি সুগ্রীবেণ মহাত্মনা ।
বিচিন্বংতু বনং সর্বে গিরিদুর্গাণি সর্বশঃ ॥ 14 ॥
ততস্সমুত্থায় পুনর্বানরাস্তে মহাবলাঃ ।
বিংধ্যকাননসংকীর্ণাং বিচেরুর্দক্ষিণাং দিশম্ ॥ 15 ॥
তে শারদাভ্রপ্রতিমং শ্রীমদ্রজতপর্বতম্ ।
শৃংগবংতং দরীমংতমধিরুহ্য় চ বানরাঃ ॥ 16 ॥
তত্র লোধ্রবনং রম্য়ং সপ্তপর্ণবনানি চ ।
ব্যচিন্বংস্তে হরিবরাস্সীতা দর্শনকাংক্ষিণঃ ॥ 17 ॥
তস্য়াগ্রমধিরূঢাস্তে শ্রাংতা বিপুলবিক্রমাঃ ।
ন পশ্য়ংতি স্ম বৈদেহীং রামস্য় মহিষীং প্রিয়াম্ ॥ 18 ॥
তে তু দৃষ্টিগতং কৃত্বা তং শৈলং বহুকংদরম্ ।
অবারোহংত হরয়ো বীক্ষমাণাস্সমংততঃ ॥ 19 ॥
অবরুহ্য় ততো ভূমিং শ্রাংতা বিগতচেতসঃ ।
স্থিত্বা মুহূর্তং তত্রাথ বৃক্ষমূলমুপাশ্রিতাঃ ॥ 20 ॥
তে মুহূর্তং সমাশ্বস্তাঃ কিংচিদ্ভগ্নপরিশ্রমাঃ ।
পুনরেবোদ্যতাঃ কৃত্স্নাং মার্গিতুং দক্ষিণাং দিশম্ ॥ 21 ॥
হনুমত্প্রমুখাস্তে তু প্রস্থিতাঃ প্লবগর্ষভাঃ ।
বিংধ্যমেবাদিতস্তাবদ্বিচেরুস্তে সমংততঃ ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে একোনপংচাশস্সর্গঃ ॥
