śrīmadvālmīkīya rāmāyaṇē kiṣkindhākāṇḍam ।
atha ēkōnapañchāśassargaḥ ।
athāṅgadastadā sarvānvānarānidamabravīt ।
pariśrāntō mahāprājñassamāśvāsya śanairvachaḥ ॥ 1 ॥
vanāni girayō nadyō durgāṇi gahanāni cha ।
daryō giriguhāśchaiva vichitāni samantataḥ ॥ 2 ॥
tatra tatra sahāsmābhirjānakī na cha dṛśyatē ।
tadvā rakṣō hṛtā yēna sītā surasutōpamā ॥ 3 ॥
kālaścha nō mahānyātassugrīvaśchōgraśāsanaḥ ।
tasmādbhavantassahitā vichinvantu samantataḥ ॥ 4 ॥
vihāya tandrīṃ śōkaṃ cha nidrāṃ chaiva samutthitām ।
vichinudhvaṃ yathā sītāṃ paśyāmō janakātmajām ॥ 5 ॥
anirvēdaṃ cha dākṣyaṃ cha manasaśchāparājayaḥ ।
kāryasiddhikarāṇyāhustasmādētadbravīmyaham ॥ 6 ॥
adyāpi tadvanaṃ durgaṃ vichinvantu vanaukasaḥ ।
khēdaṃ tyaktvā punassarvairvanamētadvichīyatām ॥ 7 ॥
avaśyaṃ kriyamāṇasya dṛśyatē karmaṇaḥ phalam ।
alaṃ nirvēdamāgamya na hi nō mīlanaṃ kṣamam ॥ 8 ॥
sugrīvaḥ kōpanō rājā tīkṣṇadaṇḍaścha vānaraḥ ।
bhētavyaṃ tasya satataṃ rāmasya cha mahātmanaḥ ॥ 9 ॥
hitārthamētaduktaṃ vaḥ kriyatāṃ yadi rōchatē ।
uchyatāṃ vā kṣamaṃ yannassarvēṣāmēva vānarāḥ ॥ 10 ॥
aṅgadasya vachaśśrutvā vachanaṃ gandhamādanaḥ ।
uvāchāvyaktayā vāchā pipāsāśramakhinnayā ॥ 11 ॥
sadṛśaṃ khalu vō vākyamaṅgadō yaduvācha ha ।
hitaṃ chaivānukūlaṃ cha kriyatāmasya bhāṣitam ॥ 12 ॥
punarmārgāmahai śailānkandarāṃścha darīstathā ।
kānanāni cha śūnyāni giriprasravaṇāni cha ॥ 13 ॥
yathōddiṣṭāni sarvāṇi sugrīvēṇa mahātmanā ।
vichinvantu vanaṃ sarvē giridurgāṇi sarvaśaḥ ॥ 14 ॥
tatassamutthāya punarvānarāstē mahābalāḥ ।
vindhyakānanasaṅkīrṇāṃ vichērurdakṣiṇāṃ diśam ॥ 15 ॥
tē śāradābhrapratimaṃ śrīmadrajataparvatam ।
śṛṅgavantaṃ darīmantamadhiruhya cha vānarāḥ ॥ 16 ॥
tatra lōdhravanaṃ ramyaṃ saptaparṇavanāni cha ।
vyachinvaṃstē harivarāssītā darśanakāṅkṣiṇaḥ ॥ 17 ॥
tasyāgramadhirūḍhāstē śrāntā vipulavikramāḥ ।
na paśyanti sma vaidēhīṃ rāmasya mahiṣīṃ priyām ॥ 18 ॥
tē tu dṛṣṭigataṃ kṛtvā taṃ śailaṃ bahukandaram ।
avārōhanta harayō vīkṣamāṇāssamantataḥ ॥ 19 ॥
avaruhya tatō bhūmiṃ śrāntā vigatachētasaḥ ।
sthitvā muhūrtaṃ tatrātha vṛkṣamūlamupāśritāḥ ॥ 20 ॥
tē muhūrtaṃ samāśvastāḥ kiñchidbhagnapariśramāḥ ।
punarēvōdyatāḥ kṛtsnāṃ mārgituṃ dakṣiṇāṃ diśam ॥ 21 ॥
hanumatpramukhāstē tu prasthitāḥ plavagarṣabhāḥ ।
vindhyamēvāditastāvadvichērustē samantataḥ ॥ 22 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ēkōnapañchāśassargaḥ ॥
