ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ඒකෝනපංචාශස්සර්ගඃ ।
අථාංගදස්තදා සර්වාන්වානරානිදමබ්රවීත් ।
පරිශ්රාංතෝ මහාප්රාජ්ඤස්සමාශ්වාස්ය ශනෛර්වචඃ ॥ 1 ॥
වනානි ගිරයෝ නද්යෝ දුර්ගාණි ගහනානි ච ।
දර්යෝ ගිරිගුහාශ්චෛව විචිතානි සමංතතඃ ॥ 2 ॥
තත්ර තත්ර සහාස්මාභිර්ජානකී න ච දෘශ්යතේ ।
තද්වා රක්ෂෝ හෘතා යේන සීතා සුරසුතෝපමා ॥ 3 ॥
කාලශ්ච නෝ මහාන්යාතස්සුග්රීවශ්චෝග්රශාසනඃ ।
තස්මාද්භවංතස්සහිතා විචින්වංතු සමංතතඃ ॥ 4 ॥
විහාය තංද්රීං ශෝකං ච නිද්රාං චෛව සමුත්ථිතාම් ।
විචිනුධ්වං යථා සීතාං පශ්යාමෝ ජනකාත්මජාම් ॥ 5 ॥
අනිර්වේදං ච දාක්ෂ්යං ච මනසශ්චාපරාජයඃ ।
කාර්යසිද්ධිකරාණ්යාහුස්තස්මාදේතද්බ්රවීම්යහම් ॥ 6 ॥
අද්යාපි තද්වනං දුර්ගං විචින්වංතු වනෞකසඃ ।
ඛේදං ත්යක්ත්වා පුනස්සර්වෛර්වනමේතද්විචීයතාම් ॥ 7 ॥
අවශ්යං ක්රියමාණස්ය දෘශ්යතේ කර්මණඃ ඵලම් ।
අලං නිර්වේදමාගම්ය න හි නෝ මීලනං ක්ෂමම් ॥ 8 ॥
සුග්රීවඃ කෝපනෝ රාජා තීක්ෂ්ණදංඩශ්ච වානරඃ ।
භේතව්යං තස්ය සතතං රාමස්ය ච මහාත්මනඃ ॥ 9 ॥
හිතාර්ථමේතදුක්තං වඃ ක්රියතාං යදි රෝචතේ ।
උච්යතාං වා ක්ෂමං යන්නස්සර්වේෂාමේව වානරාඃ ॥ 10 ॥
අංගදස්ය වචශ්ශ්රුත්වා වචනං ගංධමාදනඃ ।
උවාචාව්යක්තයා වාචා පිපාසාශ්රමඛින්නයා ॥ 11 ॥
සදෘශං ඛලු වෝ වාක්යමංගදෝ යදුවාච හ ।
හිතං චෛවානුකූලං ච ක්රියතාමස්ය භාෂිතම් ॥ 12 ॥
පුනර්මාර්ගාමහෛ ශෛලාන්කංදරාංශ්ච දරීස්තථා ।
කානනානි ච ශූන්යානි ගිරිප්රස්රවණානි ච ॥ 13 ॥
යථෝද්දිෂ්ටානි සර්වාණි සුග්රීවේණ මහාත්මනා ।
විචින්වංතු වනං සර්වේ ගිරිදුර්ගාණි සර්වශඃ ॥ 14 ॥
තතස්සමුත්ථාය පුනර්වානරාස්තේ මහාබලාඃ ।
විංධ්යකානනසංකීර්ණාං විචේරුර්දක්ෂිණාං දිශම් ॥ 15 ॥
තේ ශාරදාභ්රප්රතිමං ශ්රීමද්රජතපර්වතම් ।
ශෘංගවංතං දරීමංතමධිරුහ්ය ච වානරාඃ ॥ 16 ॥
තත්ර ලෝධ්රවනං රම්යං සප්තපර්ණවනානි ච ।
ව්යචින්වංස්තේ හරිවරාස්සීතා දර්ශනකාංක්ෂිණඃ ॥ 17 ॥
තස්යාග්රමධිරූඪාස්තේ ශ්රාංතා විපුලවික්රමාඃ ।
න පශ්යංති ස්ම වෛදේහීං රාමස්ය මහිෂීං ප්රියාම් ॥ 18 ॥
තේ තු දෘෂ්ටිගතං කෘත්වා තං ශෛලං බහුකංදරම් ।
අවාරෝහංත හරයෝ වීක්ෂමාණාස්සමංතතඃ ॥ 19 ॥
අවරුහ්ය තතෝ භූමිං ශ්රාංතා විගතචේතසඃ ।
ස්ථිත්වා මුහූර්තං තත්රාථ වෘක්ෂමූලමුපාශ්රිතාඃ ॥ 20 ॥
තේ මුහූර්තං සමාශ්වස්තාඃ කිංචිද්භග්නපරිශ්රමාඃ ।
පුනරේවෝද්යතාඃ කෘත්ස්නාං මාර්ගිතුං දක්ෂිණාං දිශම් ॥ 21 ॥
හනුමත්ප්රමුඛාස්තේ තු ප්රස්ථිතාඃ ප්ලවගර්ෂභාඃ ।
විංධ්යමේවාදිතස්තාවද්විචේරුස්තේ සමංතතඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ඒකෝනපංචාශස්සර්ගඃ ॥
