ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ସପ୍ତପଂଚାଶସ୍ସର୍ଗଃ ।
ତତ୍ତୁ ଶ୍ରୁତ୍ଵା ତଥା ଵାକ୍ୟମଂଗଦସ୍ୟ ମୁଖୋଦ୍ଗତମ୍ ।
ଅବ୍ରଵୀଦ୍ଵଚନଂ ଗୃଧ୍ରସ୍ତୀକ୍ଷ୍ଣତୁଂଡୋ ମହାସ୍ଵନଃ ॥ 1 ॥
କୋଽୟଂ ଗିରା ଘୋଷୟତି ପ୍ରାଣୈଃ ପ୍ରିୟତମସ୍ୟ ମେ ।
ଜଟାୟୁଷୋ ଵଧଂ ଭ୍ରାତୁଃ କଂପୟନ୍ନିଵ ମେ ମନଃ ॥ 2 ॥
କଥମାସୀଜ୍ଜନସ୍ଥାନେ ୟୁଦ୍ଧଂ ରାକ୍ଷସଗୃଧ୍ରୟୋଃ ।
ନାମଧେୟମିଦଂ ଭ୍ରାତୁଶ୍ଚିରସ୍ୟାଦ୍ୟ ମୟା ଶ୍ରୁତମ୍ ॥ 3 ॥
ଇଚ୍ଛେୟଂ ଗିରିଦୁର୍ଗାଚ୍ଚ ଭଵଦ୍ଭିରଵତାରିତୁମ୍ ।
ୟଵୀୟସୋ ଗୁଣଜ୍ଞସ୍ୟ ଶ୍ଲାଘନୀୟସ୍ୟ ଵିକ୍ରମୈଃ ॥ 4 ॥
ଅତିଦୀର୍ଘସ୍ୟ କାଲସ୍ୟ ପରିତୁଷ୍ଟୋଽସ୍ମି ପରିକୀର୍ତନାତ୍ ।
ତଦିଚ୍ଛେୟମହଂ ଶ୍ରୋତୁଂ ଵିନାଶଂ ଵାନରର୍ଷଭାଃ ॥ 5 ॥
ଭ୍ରାତୁର୍ଜଟାୟୁଷସ୍ତସ୍ୟ ଜନସ୍ଥାନନିଵାସିନଃ ।
ତସ୍ୟୈଵ ଚ ମମ ଭ୍ରାତୁସ୍ସଖା ଦଶରଥଃ କଥମ୍ ॥ 6 ॥
ୟସ୍ୟ ରାମଃ ପ୍ରିୟଃ ପୁତ୍ରୋ ଜ୍ୟେଷ୍ଠୋ ଗୁରୁଜନପ୍ରିୟଃ ।
ସୂର୍ୟାଂଶୁଦଗ୍ଧପକ୍ଷତ୍ଵାନ୍ନ ଶକ୍ନୋମ୍ୟୁପସର୍ପିତୁମ୍ ॥ 7 ॥
ଇଚ୍ଛେୟଂ ପର୍ଵତାଦସ୍ମାଦଵତର୍ତୁ ମରିଂଦମାଃ ।
ଶୋକାଦ୍ଭ୍ରଷ୍ଟସ୍ଵରମପି ଶ୍ରୁତ୍ଵା ତେ ହରିୟୂଥପାଃ ।
ଶ୍ରଦ୍ଦଧୁର୍ନୈଵ ତଦ୍ଵାକ୍ୟଂ କର୍ମଣା ତସ୍ୟ ଶଂକିତାଃ ॥ 8 ॥
ତେ ପ୍ରାୟମୁପଵିଷ୍ଟାସ୍ତୁ ଦୃଷ୍ଟ୍ଵା ଗୃଧ୍ରଂ ପ୍ଲଵଂଗମାଃ ।
ଚକ୍ରୁର୍ବୁଦ୍ଧିଂ ତଦା ରୌଦ୍ରାଂ ସର୍ଵାନ୍ନୋ ଭକ୍ଷୟିଷ୍ୟତି ॥ 9 ॥
ସର୍ଵଥା ପ୍ରାୟମାସୀନାନ୍ୟଦି ନୋ ଭକ୍ଷୟିଷ୍ୟତି ।
କୃତକୃତ୍ୟା ଭଵିଷ୍ୟାମଃ କ୍ଷିପ୍ରଂ ସିଦ୍ଧିମିତୋ ଗତାଃ ॥ 10 ॥
ଏତାଂ ବୁଦ୍ଧିଂ ତତଶ୍ଚକ୍ରୁସ୍ସର୍ଵେ ତେ ଵାନରର୍ଷଭାଃ ।
ଅଵତାର୍ୟ ଗିରେଶ୍ଶୃଂଗାଦ୍ଗୃଧ୍ରମାହାଂଗଦସ୍ତଦା ॥ 11 ॥
ବଭୂଵର୍କ୍ଷରଜା ନାମ ଵାନରେଂଦ୍ରଃ ପ୍ରତାପଵାନ୍ ।
ମମାର୍ୟଃ ପାର୍ଥିଵଃ ପକ୍ଷିନ୍ ଧାର୍ମିକ ସ୍ତସ୍ୟ ଚାତ୍ମଜୌ ॥ 12 ॥
ସୁଗ୍ରୀଵଶ୍ଚୈଵ ଵାଲୀ ଚ ପୁତ୍ରାଵୋଘବଲାଵୁଭୌ ।
ଲୋକେଵିଶ୍ରୁତକର୍ମାଭୂଦ୍ରାଜା ଵାଲୀ ପିତା ମମ ॥ 13 ॥
ରାଜା କୃତ୍ସ୍ନସ୍ୟ ଜଗତ ଇକ୍ଷ୍ଵାକୂଣାଂ ମହାରଥଃ ।
ରାମୋ ଦାଶରଥିଃ ଶ୍ରୀମାନ୍ପ୍ରଵିଷ୍ଟୋ ଦଂଡକାଵନମ୍ ॥ 14 ॥
ଲକ୍ଷ୍ମଣେନ ସହ ଭ୍ରାତ୍ରା ଵୈଦେହ୍ୟା ଚାପି ଭାର୍ୟୟା ।
ପିତୁର୍ନିଦେଶନିରତୋ ଧର୍ମ୍ୟଂ ପଂଥାନମାଶ୍ରିତଃ ॥ 15 ॥
ତସ୍ୟ ଭାର୍ୟା ଜନସ୍ଥାନାଦ୍ରାଵଣେନ ହୃତା ବଲାତ୍ ।
ରାମସ୍ୟ ତୁ ପିତୁର୍ମିତ୍ରଂ ଜଟାୟୁର୍ନାମ ଗୃଧ୍ରରାଟ୍ ॥ 16 ॥
ଦଦର୍ଶ ସୀତାଂ ଵୈଦେହୀଂ ହ୍ରିୟମାଣାଂ ଵିହାୟସା ।
ରାଵଣଂ ଵିରଥଂ କୃତ୍ଵା ସ୍ଥାପୟିତ୍ଵା ଚ ମୈଥିଲୀମ୍ ।
ପରିଶ୍ରାଂତଶ୍ଚ ଵୃଦ୍ଧଶ୍ଚ ରାଵଣେନ ହତୋ ରଣେ ॥ 17 ॥
ଏଵଂ ଗୃଧ୍ରୋ ହତସ୍ତେନ ରାଵଣେନ ବଲୀୟସା ।
ସଂସ୍କୃତଶ୍ଚାପି ରାମେଣ ଗତଶ୍ଚ ଗତିମୁତ୍ତମାମ୍ ॥ 18 ॥
ତତୋ ମମ ପିତୃଵ୍ୟେଣ ସୁଗ୍ରୀଵେଣ ମହାତ୍ମନା ।
ଚକାର ରାଘଵସ୍ସଖ୍ୟଂ ସୋଽଵଧୀତ୍ପିତରଂ ମମ ॥ 19 ॥
ମମ ପିତ୍ରା ଵିରୁଦ୍ଧୋ ହି ସୁଗ୍ରୀଵସ୍ସଚିଵୈସ୍ସହ ।
ନିହତ୍ୟ ଵାଲିନଂ ରାମସ୍ତତସ୍ତମଭିଷେଚୟତ୍ ॥ 20 ॥
ସ ରାଜ୍ୟେ ସ୍ଥାପିତସ୍ତେନ ସୁଗ୍ରୀଵୋ ଵାନରାଧିପଃ ।
ରାଜା ଵାନରମୁଖ୍ୟାନାଂ ୟେନ ପ୍ରସ୍ଥାପିତା ଵୟମ୍ ॥ 21 ॥
ଏଵଂ ରାମପ୍ରୟୁକ୍ତାସ୍ତୁ ମାର୍ଗମାଣାସ୍ତତସ୍ତତଃ ।
ଵୈଦେହୀଂ ନାଧିଗଚ୍ଛାମୋ ରାତ୍ରୌ ସୂର୍ୟପ୍ରଭାମିଵ ॥ 22 ॥
ତେ ଵୟଂ ଦଂଡକାରଣ୍ୟଂ ଵିଚିତ୍ୟ ସୁସମାହିତାଃ ॥ 23 ॥
ଅଜ୍ଞାନାତ୍ତୁ ପ୍ରଵିଷ୍ଟାସ୍ସ୍ମ ଧର୍ମିଣ୍ୟା ଵିଵୃତଂ ବିଲମ୍ ।
ମୟସ୍ୟ ମାୟାଵିହିତଂ ତଦ୍ବିଲଂ ଚ ଵିଚିନ୍ଵତାମ୍ ॥ 24 ॥
ଵ୍ୟତୀତସ୍ତତ୍ର ନୋ ମାସୋ ୟୋ ରାଜ୍ଞା ସମୟଃ କୃତଃ ।
ତେ ଵୟଂ କପିରାଜସ୍ୟ ସର୍ଵେ ଵଚନକାରିଣଃ ॥ 25 ॥
କୃତାଂ ସଂସ୍ଥାମତିକ୍ରାଂତା ଭୟାତ୍ପ୍ରାୟମୁପାସ୍ମହେ ।
କ୍ରୁଦ୍ଧେ ତସ୍ମିଂସ୍ତୁ କାକୁତ୍ସ୍ଥେ ସୁଗ୍ରୀଵେ ଚ ସଲକ୍ଷ୍ମଣେ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ସପ୍ତପଂଚାଶସ୍ସର୍ଗଃ ॥
