શ્રીમદ્વાલ્મીકીય રામાયણે કિષ્કિંધાકાંડમ્ ।
અથ સપ્તપંચાશસ્સર્ગઃ ।
તત્તુ શ્રુત્વા તથા વાક્યમંગદસ્ય મુખોદ્ગતમ્ ।
અબ્રવીદ્વચનં ગૃધ્રસ્તીક્ષ્ણતુંડો મહાસ્વનઃ ॥ 1 ॥
કોઽયં ગિરા ઘોષયતિ પ્રાણૈઃ પ્રિયતમસ્ય મે ।
જટાયુષો વધં ભ્રાતુઃ કંપયન્નિવ મે મનઃ ॥ 2 ॥
કથમાસીજ્જનસ્થાને યુદ્ધં રાક્ષસગૃધ્રયોઃ ।
નામધેયમિદં ભ્રાતુશ્ચિરસ્યાદ્ય મયા શ્રુતમ્ ॥ 3 ॥
ઇચ્છેયં ગિરિદુર્ગાચ્ચ ભવદ્ભિરવતારિતુમ્ ।
યવીયસો ગુણજ્ઞસ્ય શ્લાઘનીયસ્ય વિક્રમૈઃ ॥ 4 ॥
અતિદીર્ઘસ્ય કાલસ્ય પરિતુષ્ટોઽસ્મિ પરિકીર્તનાત્ ।
તદિચ્છેયમહં શ્રોતું વિનાશં વાનરર્ષભાઃ ॥ 5 ॥
ભ્રાતુર્જટાયુષસ્તસ્ય જનસ્થાનનિવાસિનઃ ।
તસ્યૈવ ચ મમ ભ્રાતુસ્સખા દશરથઃ કથમ્ ॥ 6 ॥
યસ્ય રામઃ પ્રિયઃ પુત્રો જ્યેષ્ઠો ગુરુજનપ્રિયઃ ।
સૂર્યાંશુદગ્ધપક્ષત્વાન્ન શક્નોમ્યુપસર્પિતુમ્ ॥ 7 ॥
ઇચ્છેયં પર્વતાદસ્માદવતર્તુ મરિંદમાઃ ।
શોકાદ્ભ્રષ્ટસ્વરમપિ શ્રુત્વા તે હરિયૂથપાઃ ।
શ્રદ્દધુર્નૈવ તદ્વાક્યં કર્મણા તસ્ય શંકિતાઃ ॥ 8 ॥
તે પ્રાયમુપવિષ્ટાસ્તુ દૃષ્ટ્વા ગૃધ્રં પ્લવંગમાઃ ।
ચક્રુર્બુદ્ધિં તદા રૌદ્રાં સર્વાન્નો ભક્ષયિષ્યતિ ॥ 9 ॥
સર્વથા પ્રાયમાસીનાન્યદિ નો ભક્ષયિષ્યતિ ।
કૃતકૃત્યા ભવિષ્યામઃ ક્ષિપ્રં સિદ્ધિમિતો ગતાઃ ॥ 10 ॥
એતાં બુદ્ધિં તતશ્ચક્રુસ્સર્વે તે વાનરર્ષભાઃ ।
અવતાર્ય ગિરેશ્શૃંગાદ્ગૃધ્રમાહાંગદસ્તદા ॥ 11 ॥
બભૂવર્ક્ષરજા નામ વાનરેંદ્રઃ પ્રતાપવાન્ ।
મમાર્યઃ પાર્થિવઃ પક્ષિન્ ધાર્મિક સ્તસ્ય ચાત્મજૌ ॥ 12 ॥
સુગ્રીવશ્ચૈવ વાલી ચ પુત્રાવોઘબલાવુભૌ ।
લોકેવિશ્રુતકર્માભૂદ્રાજા વાલી પિતા મમ ॥ 13 ॥
રાજા કૃત્સ્નસ્ય જગત ઇક્ષ્વાકૂણાં મહારથઃ ।
રામો દાશરથિઃ શ્રીમાન્પ્રવિષ્ટો દંડકાવનમ્ ॥ 14 ॥
લક્ષ્મણેન સહ ભ્રાત્રા વૈદેહ્યા ચાપિ ભાર્યયા ।
પિતુર્નિદેશનિરતો ધર્મ્યં પંથાનમાશ્રિતઃ ॥ 15 ॥
તસ્ય ભાર્યા જનસ્થાનાદ્રાવણેન હૃતા બલાત્ ।
રામસ્ય તુ પિતુર્મિત્રં જટાયુર્નામ ગૃધ્રરાટ્ ॥ 16 ॥
દદર્શ સીતાં વૈદેહીં હ્રિયમાણાં વિહાયસા ।
રાવણં વિરથં કૃત્વા સ્થાપયિત્વા ચ મૈથિલીમ્ ।
પરિશ્રાંતશ્ચ વૃદ્ધશ્ચ રાવણેન હતો રણે ॥ 17 ॥
એવં ગૃધ્રો હતસ્તેન રાવણેન બલીયસા ।
સંસ્કૃતશ્ચાપિ રામેણ ગતશ્ચ ગતિમુત્તમામ્ ॥ 18 ॥
તતો મમ પિતૃવ્યેણ સુગ્રીવેણ મહાત્મના ।
ચકાર રાઘવસ્સખ્યં સોઽવધીત્પિતરં મમ ॥ 19 ॥
મમ પિત્રા વિરુદ્ધો હિ સુગ્રીવસ્સચિવૈસ્સહ ।
નિહત્ય વાલિનં રામસ્તતસ્તમભિષેચયત્ ॥ 20 ॥
સ રાજ્યે સ્થાપિતસ્તેન સુગ્રીવો વાનરાધિપઃ ।
રાજા વાનરમુખ્યાનાં યેન પ્રસ્થાપિતા વયમ્ ॥ 21 ॥
એવં રામપ્રયુક્તાસ્તુ માર્ગમાણાસ્તતસ્તતઃ ।
વૈદેહીં નાધિગચ્છામો રાત્રૌ સૂર્યપ્રભામિવ ॥ 22 ॥
તે વયં દંડકારણ્યં વિચિત્ય સુસમાહિતાઃ ॥ 23 ॥
અજ્ઞાનાત્તુ પ્રવિષ્ટાસ્સ્મ ધર્મિણ્યા વિવૃતં બિલમ્ ।
મયસ્ય માયાવિહિતં તદ્બિલં ચ વિચિન્વતામ્ ॥ 24 ॥
વ્યતીતસ્તત્ર નો માસો યો રાજ્ઞા સમયઃ કૃતઃ ।
તે વયં કપિરાજસ્ય સર્વે વચનકારિણઃ ॥ 25 ॥
કૃતાં સંસ્થામતિક્રાંતા ભયાત્પ્રાયમુપાસ્મહે ।
ક્રુદ્ધે તસ્મિંસ્તુ કાકુત્સ્થે સુગ્રીવે ચ સલક્ષ્મણે ॥ 26 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે સપ્તપંચાશસ્સર્ગઃ ॥
