ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ സപ്തപംചാശസ്സര്ഗഃ ।
തത്തു ശ്രുത്വാ തഥാ വാക്യമംഗദസ്യ മുഖോദ്ഗതമ് ।
അബ്രവീദ്വചനം ഗൃധ്രസ്തീക്ഷ്ണതുംഡോ മഹാസ്വനഃ ॥ 1 ॥
കോഽയം ഗിരാ ഘോഷയതി പ്രാണൈഃ പ്രിയതമസ്യ മേ ।
ജടായുഷോ വധം ഭ്രാതുഃ കംപയന്നിവ മേ മനഃ ॥ 2 ॥
കഥമാസീജ്ജനസ്ഥാനേ യുദ്ധം രാക്ഷസഗൃധ്രയോഃ ।
നാമധേയമിദം ഭ്രാതുശ്ചിരസ്യാദ്യ മയാ ശ്രുതമ് ॥ 3 ॥
ഇച്ഛേയം ഗിരിദുര്ഗാച്ച ഭവദ്ഭിരവതാരിതുമ് ।
യവീയസോ ഗുണജ്ഞസ്യ ശ്ലാഘനീയസ്യ വിക്രമൈഃ ॥ 4 ॥
അതിദീര്ഘസ്യ കാലസ്യ പരിതുഷ്ടോഽസ്മി പരികീര്തനാത് ।
തദിച്ഛേയമഹം ശ്രോതും വിനാശം വാനരര്ഷഭാഃ ॥ 5 ॥
ഭ്രാതുര്ജടായുഷസ്തസ്യ ജനസ്ഥാനനിവാസിനഃ ।
തസ്യൈവ ച മമ ഭ്രാതുസ്സഖാ ദശരഥഃ കഥമ് ॥ 6 ॥
യസ്യ രാമഃ പ്രിയഃ പുത്രോ ജ്യേഷ്ഠോ ഗുരുജനപ്രിയഃ ।
സൂര്യാംശുദഗ്ധപക്ഷത്വാന്ന ശക്നോമ്യുപസര്പിതുമ് ॥ 7 ॥
ഇച്ഛേയം പർവതാദസ്മാദവതര്തു മരിംദമാഃ ।
ശോകാദ്ഭ്രഷ്ടസ്വരമപി ശ്രുത്വാ തേ ഹരിയൂഥപാഃ ।
ശ്രദ്ദധുര്നൈവ തദ്വാക്യം കര്മണാ തസ്യ ശംകിതാഃ ॥ 8 ॥
തേ പ്രായമുപവിഷ്ടാസ്തു ദൃഷ്ട്വാ ഗൃധ്രം പ്ലവംഗമാഃ ।
ചക്രുര്ബുദ്ധിം തദാ രൌദ്രാം സർവാന്നോ ഭക്ഷയിഷ്യതി ॥ 9 ॥
സർവഥാ പ്രായമാസീനാന്യദി നോ ഭക്ഷയിഷ്യതി ।
കൃതകൃത്യാ ഭവിഷ്യാമഃ ക്ഷിപ്രം സിദ്ധിമിതോ ഗതാഃ ॥ 10 ॥
ഏതാം ബുദ്ധിം തതശ്ചക്രുസ്സർവേ തേ വാനരര്ഷഭാഃ ।
അവതാര്യ ഗിരേശ്ശൃംഗാദ്ഗൃധ്രമാഹാംഗദസ്തദാ ॥ 11 ॥
ബഭൂവര്ക്ഷരജാ നാമ വാനരേംദ്രഃ പ്രതാപവാന് ।
മമാര്യഃ പാര്ഥിവഃ പക്ഷിന് ധാര്മിക സ്തസ്യ ചാത്മജൌ ॥ 12 ॥
സുഗ്രീവശ്ചൈവ വാലീ ച പുത്രാവോഘബലാവുഭൌ ।
ലോകേവിശ്രുതകര്മാഭൂദ്രാജാ വാലീ പിതാ മമ ॥ 13 ॥
രാജാ കൃത്സ്നസ്യ ജഗത ഇക്ഷ്വാകൂണാം മഹാരഥഃ ।
രാമോ ദാശരഥിഃ ശ്രീമാന്പ്രവിഷ്ടോ ദംഡകാവനമ് ॥ 14 ॥
ലക്ഷ്മണേന സഹ ഭ്രാത്രാ വൈദേഹ്യാ ചാപി ഭാര്യയാ ।
പിതുര്നിദേശനിരതോ ധര്മ്യം പംഥാനമാശ്രിതഃ ॥ 15 ॥
തസ്യ ഭാര്യാ ജനസ്ഥാനാദ്രാവണേന ഹൃതാ ബലാത് ।
രാമസ്യ തു പിതുര്മിത്രം ജടായുര്നാമ ഗൃധ്രരാട് ॥ 16 ॥
ദദര്ശ സീതാം വൈദേഹീം ഹ്രിയമാണാം വിഹായസാ ।
രാവണം വിരഥം കൃത്വാ സ്ഥാപയിത്വാ ച മൈഥിലീമ് ।
പരിശ്രാംതശ്ച വൃദ്ധശ്ച രാവണേന ഹതോ രണേ ॥ 17 ॥
ഏവം ഗൃധ്രോ ഹതസ്തേന രാവണേന ബലീയസാ ।
സംസ്കൃതശ്ചാപി രാമേണ ഗതശ്ച ഗതിമുത്തമാമ് ॥ 18 ॥
തതോ മമ പിതൃവ്യേണ സുഗ്രീവേണ മഹാത്മനാ ।
ചകാര രാഘവസ്സഖ്യം സോഽവധീത്പിതരം മമ ॥ 19 ॥
മമ പിത്രാ വിരുദ്ധോ ഹി സുഗ്രീവസ്സചിവൈസ്സഹ ।
നിഹത്യ വാലിനം രാമസ്തതസ്തമഭിഷേചയത് ॥ 20 ॥
സ രാജ്യേ സ്ഥാപിതസ്തേന സുഗ്രീവോ വാനരാധിപഃ ।
രാജാ വാനരമുഖ്യാനാം യേന പ്രസ്ഥാപിതാ വയമ് ॥ 21 ॥
ഏവം രാമപ്രയുക്താസ്തു മാര്ഗമാണാസ്തതസ്തതഃ ।
വൈദേഹീം നാധിഗച്ഛാമോ രാത്രൌ സൂര്യപ്രഭാമിവ ॥ 22 ॥
തേ വയം ദംഡകാരണ്യം വിചിത്യ സുസമാഹിതാഃ ॥ 23 ॥
അജ്ഞാനാത്തു പ്രവിഷ്ടാസ്സ്മ ധര്മിണ്യാ വിവൃതം ബിലമ് ।
മയസ്യ മായാവിഹിതം തദ്ബിലം ച വിചിന്വതാമ് ॥ 24 ॥
വ്യതീതസ്തത്ര നോ മാസോ യോ രാജ്ഞാ സമയഃ കൃതഃ ।
തേ വയം കപിരാജസ്യ സർവേ വചനകാരിണഃ ॥ 25 ॥
കൃതാം സംസ്ഥാമതിക്രാംതാ ഭയാത്പ്രായമുപാസ്മഹേ ।
ക്രുദ്ധേ തസ്മിംസ്തു കാകുത്സ്ഥേ സുഗ്രീവേ ച സലക്ഷ്മണേ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ സപ്തപംചാശസ്സര്ഗഃ ॥
