śrīmadvālmīkīya rāmāyaṇē kiṣkindhākāṇḍam ।
atha saptapañchāśassargaḥ ।
tattu śrutvā tathā vākyamaṅgadasya mukhōdgatam ।
abravīdvachanaṃ gṛdhrastīkṣṇatuṇḍō mahāsvanaḥ ॥ 1 ॥
kō'yaṃ girā ghōṣayati prāṇaiḥ priyatamasya mē ।
jaṭāyuṣō vadhaṃ bhrātuḥ kampayanniva mē manaḥ ॥ 2 ॥
kathamāsījjanasthānē yuddhaṃ rākṣasagṛdhrayōḥ ।
nāmadhēyamidaṃ bhrātuśchirasyādya mayā śrutam ॥ 3 ॥
ichChēyaṃ giridurgāchcha bhavadbhiravatāritum ।
yavīyasō guṇajñasya ślāghanīyasya vikramaiḥ ॥ 4 ॥
atidīrghasya kālasya parituṣṭō'smi parikīrtanāt ।
tadichChēyamahaṃ śrōtuṃ vināśaṃ vānararṣabhāḥ ॥ 5 ॥
bhrāturjaṭāyuṣastasya janasthānanivāsinaḥ ।
tasyaiva cha mama bhrātussakhā daśarathaḥ katham ॥ 6 ॥
yasya rāmaḥ priyaḥ putrō jyēṣṭhō gurujanapriyaḥ ।
sūryāṃśudagdhapakṣatvānna śaknōmyupasarpitum ॥ 7 ॥
ichChēyaṃ parvatādasmādavatartu marindamāḥ ।
śōkādbhraṣṭasvaramapi śrutvā tē hariyūthapāḥ ।
śraddadhurnaiva tadvākyaṃ karmaṇā tasya śaṅkitāḥ ॥ 8 ॥
tē prāyamupaviṣṭāstu dṛṣṭvā gṛdhraṃ plavaṅgamāḥ ।
chakrurbuddhiṃ tadā raudrāṃ sarvānnō bhakṣayiṣyati ॥ 9 ॥
sarvathā prāyamāsīnānyadi nō bhakṣayiṣyati ।
kṛtakṛtyā bhaviṣyāmaḥ kṣipraṃ siddhimitō gatāḥ ॥ 10 ॥
ētāṃ buddhiṃ tataśchakrussarvē tē vānararṣabhāḥ ।
avatārya girēśśṛṅgādgṛdhramāhāṅgadastadā ॥ 11 ॥
babhūvarkṣarajā nāma vānarēndraḥ pratāpavān ।
mamāryaḥ pārthivaḥ pakṣin dhārmika stasya chātmajau ॥ 12 ॥
sugrīvaśchaiva vālī cha putrāvōghabalāvubhau ।
lōkēviśrutakarmābhūdrājā vālī pitā mama ॥ 13 ॥
rājā kṛtsnasya jagata ikṣvākūṇāṃ mahārathaḥ ।
rāmō dāśarathiḥ śrīmānpraviṣṭō daṇḍakāvanam ॥ 14 ॥
lakṣmaṇēna saha bhrātrā vaidēhyā chāpi bhāryayā ।
piturnidēśaniratō dharmyaṃ panthānamāśritaḥ ॥ 15 ॥
tasya bhāryā janasthānādrāvaṇēna hṛtā balāt ।
rāmasya tu piturmitraṃ jaṭāyurnāma gṛdhrarāṭ ॥ 16 ॥
dadarśa sītāṃ vaidēhīṃ hriyamāṇāṃ vihāyasā ।
rāvaṇaṃ virathaṃ kṛtvā sthāpayitvā cha maithilīm ।
pariśrāntaścha vṛddhaścha rāvaṇēna hatō raṇē ॥ 17 ॥
ēvaṃ gṛdhrō hatastēna rāvaṇēna balīyasā ।
saṃskṛtaśchāpi rāmēṇa gataścha gatimuttamām ॥ 18 ॥
tatō mama pitṛvyēṇa sugrīvēṇa mahātmanā ।
chakāra rāghavassakhyaṃ sō'vadhītpitaraṃ mama ॥ 19 ॥
mama pitrā viruddhō hi sugrīvassachivaissaha ।
nihatya vālinaṃ rāmastatastamabhiṣēchayat ॥ 20 ॥
sa rājyē sthāpitastēna sugrīvō vānarādhipaḥ ।
rājā vānaramukhyānāṃ yēna prasthāpitā vayam ॥ 21 ॥
ēvaṃ rāmaprayuktāstu mārgamāṇāstatastataḥ ।
vaidēhīṃ nādhigachChāmō rātrau sūryaprabhāmiva ॥ 22 ॥
tē vayaṃ daṇḍakāraṇyaṃ vichitya susamāhitāḥ ॥ 23 ॥
ajñānāttu praviṣṭāssma dharmiṇyā vivṛtaṃ bilam ।
mayasya māyāvihitaṃ tadbilaṃ cha vichinvatām ॥ 24 ॥
vyatītastatra nō māsō yō rājñā samayaḥ kṛtaḥ ।
tē vayaṃ kapirājasya sarvē vachanakāriṇaḥ ॥ 25 ॥
kṛtāṃ saṃsthāmatikrāntā bhayātprāyamupāsmahē ।
kruddhē tasmiṃstu kākutsthē sugrīvē cha salakṣmaṇē ॥ 26 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē saptapañchāśassargaḥ ॥
