ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තපංචාශස්සර්ගඃ ।
තත්තු ශ්රුත්වා තථා වාක්යමංගදස්ය මුඛෝද්ගතම් ।
අබ්රවීද්වචනං ගෘධ්රස්තීක්ෂ්ණතුංඩෝ මහාස්වනඃ ॥ 1 ॥
කෝऽයං ගිරා ඝෝෂයති ප්රාණෛඃ ප්රියතමස්ය මේ ।
ජටායුෂෝ වධං භ්රාතුඃ කංපයන්නිව මේ මනඃ ॥ 2 ॥
කථමාසීජ්ජනස්ථානේ යුද්ධං රාක්ෂසගෘධ්රයෝඃ ।
නාමධේයමිදං භ්රාතුශ්චිරස්යාද්ය මයා ශ්රුතම් ॥ 3 ॥
ඉච්ඡේයං ගිරිදුර්ගාච්ච භවද්භිරවතාරිතුම් ।
යවීයසෝ ගුණජ්ඤස්ය ශ්ලාඝනීයස්ය වික්රමෛඃ ॥ 4 ॥
අතිදීර්ඝස්ය කාලස්ය පරිතුෂ්ටෝऽස්මි පරිකීර්තනාත් ।
තදිච්ඡේයමහං ශ්රෝතුං විනාශං වානරර්ෂභාඃ ॥ 5 ॥
භ්රාතුර්ජටායුෂස්තස්ය ජනස්ථානනිවාසිනඃ ।
තස්යෛව ච මම භ්රාතුස්සඛා දශරථඃ කථම් ॥ 6 ॥
යස්ය රාමඃ ප්රියඃ පුත්රෝ ජ්යේෂ්ඨෝ ගුරුජනප්රියඃ ।
සූර්යාංශුදග්ධපක්ෂත්වාන්න ශක්නෝම්යුපසර්පිතුම් ॥ 7 ॥
ඉච්ඡේයං පර්වතාදස්මාදවතර්තු මරිංදමාඃ ।
ශෝකාද්භ්රෂ්ටස්වරමපි ශ්රුත්වා තේ හරියූථපාඃ ।
ශ්රද්දධුර්නෛව තද්වාක්යං කර්මණා තස්ය ශංකිතාඃ ॥ 8 ॥
තේ ප්රායමුපවිෂ්ටාස්තු දෘෂ්ට්වා ගෘධ්රං ප්ලවංගමාඃ ।
චක්රුර්බුද්ධිං තදා රෞද්රාං සර්වාන්නෝ භක්ෂයිෂ්යති ॥ 9 ॥
සර්වථා ප්රායමාසීනාන්යදි නෝ භක්ෂයිෂ්යති ।
කෘතකෘත්යා භවිෂ්යාමඃ ක්ෂිප්රං සිද්ධිමිතෝ ගතාඃ ॥ 10 ॥
ඒතාං බුද්ධිං තතශ්චක්රුස්සර්වේ තේ වානරර්ෂභාඃ ।
අවතාර්ය ගිරේශ්ශෘංගාද්ගෘධ්රමාහාංගදස්තදා ॥ 11 ॥
බභූවර්ක්ෂරජා නාම වානරේංද්රඃ ප්රතාපවාන් ।
මමාර්යඃ පාර්ථිවඃ පක්ෂින් ධාර්මික ස්තස්ය චාත්මජෞ ॥ 12 ॥
සුග්රීවශ්චෛව වාලී ච පුත්රාවෝඝබලාවුභෞ ।
ලෝකේවිශ්රුතකර්මාභූද්රාජා වාලී පිතා මම ॥ 13 ॥
රාජා කෘත්ස්නස්ය ජගත ඉක්ෂ්වාකූණාං මහාරථඃ ।
රාමෝ දාශරථිඃ ශ්රීමාන්ප්රවිෂ්ටෝ දංඩකාවනම් ॥ 14 ॥
ලක්ෂ්මණේන සහ භ්රාත්රා වෛදේහ්යා චාපි භාර්යයා ।
පිතුර්නිදේශනිරතෝ ධර්ම්යං පංථානමාශ්රිතඃ ॥ 15 ॥
තස්ය භාර්යා ජනස්ථානාද්රාවණේන හෘතා බලාත් ।
රාමස්ය තු පිතුර්මිත්රං ජටායුර්නාම ගෘධ්රරාට් ॥ 16 ॥
දදර්ශ සීතාං වෛදේහීං හ්රියමාණාං විහායසා ।
රාවණං විරථං කෘත්වා ස්ථාපයිත්වා ච මෛථිලීම් ।
පරිශ්රාංතශ්ච වෘද්ධශ්ච රාවණේන හතෝ රණේ ॥ 17 ॥
ඒවං ගෘධ්රෝ හතස්තේන රාවණේන බලීයසා ।
සංස්කෘතශ්චාපි රාමේණ ගතශ්ච ගතිමුත්තමාම් ॥ 18 ॥
තතෝ මම පිතෘව්යේණ සුග්රීවේණ මහාත්මනා ।
චකාර රාඝවස්සඛ්යං සෝऽවධීත්පිතරං මම ॥ 19 ॥
මම පිත්රා විරුද්ධෝ හි සුග්රීවස්සචිවෛස්සහ ।
නිහත්ය වාලිනං රාමස්තතස්තමභිෂේචයත් ॥ 20 ॥
ස රාජ්යේ ස්ථාපිතස්තේන සුග්රීවෝ වානරාධිපඃ ।
රාජා වානරමුඛ්යානාං යේන ප්රස්ථාපිතා වයම් ॥ 21 ॥
ඒවං රාමප්රයුක්තාස්තු මාර්ගමාණාස්තතස්තතඃ ।
වෛදේහීං නාධිගච්ඡාමෝ රාත්රෞ සූර්යප්රභාමිව ॥ 22 ॥
තේ වයං දංඩකාරණ්යං විචිත්ය සුසමාහිතාඃ ॥ 23 ॥
අජ්ඤානාත්තු ප්රවිෂ්ටාස්ස්ම ධර්මිණ්යා විවෘතං බිලම් ।
මයස්ය මායාවිහිතං තද්බිලං ච විචින්වතාම් ॥ 24 ॥
ව්යතීතස්තත්ර නෝ මාසෝ යෝ රාජ්ඤා සමයඃ කෘතඃ ।
තේ වයං කපිරාජස්ය සර්වේ වචනකාරිණඃ ॥ 25 ॥
කෘතාං සංස්ථාමතික්රාංතා භයාත්ප්රායමුපාස්මහේ ।
ක්රුද්ධේ තස්මිංස්තු කාකුත්ස්ථේ සුග්රීවේ ච සලක්ෂ්මණේ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තපංචාශස්සර්ගඃ ॥
