ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ෂෂ්ටිතමස්සර්ගඃ ।
තතඃ කෘතෝදකං ස්නාතං තං ගෘධ්රං හරියූථපාඃ ।
උපවිෂ්ටා ගිරෞ රම්යේ පරිවාර්ය සමංතතඃ ॥ 1 ॥
තමංගදමුපාසීනං තෛස්සර්වෛර්හරිභිර්වෘතම් ।
ජනිතප්රත්යයෝ හර්ෂාත්සංපාතිඃ පුනරබ්රවීත් ॥ 2 ॥
කෘත්වා නිශ්ශබ්දමේකාග්රා ශ්ශ්රුණ්වංතු හරයෝ මම ।
තත්වං සංකීර්තයිෂ්යාමි යථා ජානාමි මෛථිලීම් ॥ 3 ॥
අස්ය විංධ්යස්ය ශිඛරේ පතිතෝऽස්මි පුරාවනේ ।
සූර්යතපපරීතාංගෝ නිර්දග්ධස්සූර්යරශ්මිභිඃ ॥ 4 ॥
ලබ්ධසංජ්ඤස්තු ෂඩ්රාත්රාද්විවශෝ විහ්වලන්නිව ।
වීක්ෂමාණෝ දිශස්සර්වා නාභිජානාමි කිංචන ॥ 5 ॥
තතස්තු සාගරාන් ශෛලාන්නදීස්සර්වාස්සරාංසි ච ।
වනානි ච ප්රදේශාංශ්ච නීරීක්ෂ්ය මතිරාගතා ॥ 6 ॥
හෘෂ්ටපක්ෂිගණාකීර්ණඃ කංදරාංතරකූටවාන් ।
දක්ෂිණස්යෝදධේස්තීරේ විංධ්යෝऽයමිති නිශ්චිතඃ ॥ 7 ॥
ආසීච්චාත්රාශ්රමං පුණ්යං සුරෛරපි සුපූජිතම් ।
ඍෂිර්නිශාකරෝ නාම යස්මින්නුග්රතපාභවත් ॥ 8 ॥
අෂ්ටෞ වර්ෂසහස්රාණි තේනාස්මින්නෘෂිණා විනා ।
වසතෝ මම ධර්මජ්ඤා ස්වර්ගතේ තු නිශාකරේ ॥ 9 ॥
අවතීර්ය තු විංධ්යාග්රාත්කෘච්ඡ්රේණ විෂමාච්ඡනෛඃ ।
තීක්ෂ්ණදර්භාං වසුමතීං දුඃඛේන පුනරාගතඃ ॥ 10 ॥
තමෘෂිං ද්රෂ්ටුකාමෝऽස්මි දුඃඛේනාභ්යාගතෝ භෘශම් ।
ජටායුෂා මයා චෛව බහුශෝऽභිගතෝ හි සඃ ॥ 11 ॥
තස්යාශ්රමපදාභ්යාශේ වවුර්වාතාස්සුගංධිනඃ ।
වෘක්ෂෝ වාපුෂ්පිතඃ කශ්චිදඵලෝ වා න විද්යතේ ॥ 12 ॥
උපේත්ය චාශ්රමං පුණ්යං වෘක්ෂමූලමුපාශ්රිතඃ ।
ද්රෂ්ටුකාමඃ ප්රතීක්ෂේऽහං භගවංතං නිශාකරම් ॥ 13 ॥
අථාපශ්යමදූරස්ථමෘෂිං ජ්වලිතතේජසම් ।
කෘතාභිෂේකං දුර්ධර්ෂමුපාවෘත්තමුදඞ්මුඛම් ॥ 14 ॥
තමෘක්ෂාස්සෘමරා ව්යාඝ්රාස්සිංහා නාගාස්සරීසෘපාඃ ।
පරිවාර්යෝපගච්ඡංති ධාතාරං ප්රාණිනෝ යථා ॥ 15 ॥
තතඃ ප්රාප්තමෘෂිං ජ්ඤාත්වා තානි සත්ත්වානි වෛ යයුඃ ।
ප්රවිෂ්ටේ රාජනි යථා සර්වං සාමාත්යකං බලම් ॥ 16 ॥
ඍෂිස්තු දෘෂ්ට්වා මාං ප්රීතඃ ප්රවිෂ්ටශ්චාශ්රමං පුනඃ ।
මුහූර්තමාත්රාන්නිෂ්ක්රම්ය තතඃ කාර්යමපෘච්ඡත ॥ 17 ॥
සෞම්ය වෛකල්යතාං දෘෂ්ට්වා රෝම්ණාං තේ නාවගම්යතේ ।
අග්නිදග්ධාවිමෞ පක්ෂෞ ව්රණාශ්චාපි ශරීරකේ ॥ 18 ॥
ගෘධ්රෞ ද්වෞ දෘෂ්ටපූර්වෞ මේ මාතරිශ්වසමෞ ජවේ ।
ගෘධ්රාණාං චෛව රාජානෞ භ්රාතරෞ කාමරූපිණෞ ॥ 19 ॥
ජ්යේෂ්ඨෝ හි ත්වං තු සංපාතේ ජටායුරනුජස්තව ।
මානුෂං රූපමාස්ථාය ගෘහ්ණීතාං චරණෞ මම ॥ 20 ॥
කිං තේ ව්යාධිසමුත්ථානං පක්ෂයෝඃ පතනං කථම් ।
දංඩෝऽයංච කෘතඃ කේන සර්වමාඛ්යාහි පෘච්ඡතඃ ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ෂෂ්ටිතමස්සර්ගඃ ॥
