શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ષષ્ટિતમસ્સર્ગઃ ।
તતઃ કૃતોદકં સ્નાતં તં ગૃધ્રં હરિયૂથપાઃ ।
ઉપવિષ્ટા ગિરૌ રમ્યે પરિવાર્ય સમંતતઃ ॥ 1 ॥
તમંગદમુપાસીનં તૈસ્સર્વૈર્હરિભિર્વૃતમ્ ।
જનિતપ્રત્યયો હર્ષાત્સંપાતિઃ પુનરબ્રવીત્ ॥ 2 ॥
કૃત્વા નિશ્શબ્દમેકાગ્રા શ્શ્રુણ્વંતુ હરયો મમ ।
તત્વં સંકીર્તયિષ્યામિ યથા જાનામિ મૈથિલીમ્ ॥ 3 ॥
અસ્ય વિંધ્યસ્ય શિખરે પતિતોઽસ્મિ પુરાવને ।
સૂર્યતપપરીતાંગો નિર્દગ્ધસ્સૂર્યરશ્મિભિઃ ॥ 4 ॥
લબ્ધસંજ્ઞસ્તુ ષડ્રાત્રાદ્વિવશો વિહ્વલન્નિવ ।
વીક્ષમાણો દિશસ્સર્વા નાભિજાનામિ કિંચન ॥ 5 ॥
તતસ્તુ સાગરાન્ શૈલાન્નદીસ્સર્વાસ્સરાંસિ ચ ।
વનાનિ ચ પ્રદેશાંશ્ચ નીરીક્ષ્ય મતિરાગતા ॥ 6 ॥
હૃષ્ટપક્ષિગણાકીર્ણઃ કંદરાંતરકૂટવાન્ ।
દક્ષિણસ્યોદધેસ્તીરે વિંધ્યોઽયમિતિ નિશ્ચિતઃ ॥ 7 ॥
આસીચ્ચાત્રાશ્રમં પુણ્યં સુરૈરપિ સુપૂજિતમ્ ।
ઋષિર્નિશાકરો નામ યસ્મિન્નુગ્રતપાભવત્ ॥ 8 ॥
અષ્ટૌ વર્ષસહસ્રાણિ તેનાસ્મિન્નૃષિણા વિના ।
વસતો મમ ધર્મજ્ઞા સ્વર્ગતે તુ નિશાકરે ॥ 9 ॥
અવતીર્ય તુ વિંધ્યાગ્રાત્કૃચ્છ્રેણ વિષમાચ્છનૈઃ ।
તીક્ષ્ણદર્ભાં વસુમતીં દુઃખેન પુનરાગતઃ ॥ 10 ॥
તમૃષિં દ્રષ્ટુકામોઽસ્મિ દુઃખેનાભ્યાગતો ભૃશમ્ ।
જટાયુષા મયા ચૈવ બહુશોઽભિગતો હિ સઃ ॥ 11 ॥
તસ્યાશ્રમપદાભ્યાશે વવુર્વાતાસ્સુગંધિનઃ ।
વૃક્ષો વાપુષ્પિતઃ કશ્ચિદફલો વા ન વિદ્યતે ॥ 12 ॥
ઉપેત્ય ચાશ્રમં પુણ્યં વૃક્ષમૂલમુપાશ્રિતઃ ।
દ્રષ્ટુકામઃ પ્રતીક્ષેઽહં ભગવંતં નિશાકરમ્ ॥ 13 ॥
અથાપશ્યમદૂરસ્થમૃષિં જ્વલિતતેજસમ્ ।
કૃતાભિષેકં દુર્ધર્ષમુપાવૃત્તમુદઙ્મુખમ્ ॥ 14 ॥
તમૃક્ષાસ્સૃમરા વ્યાઘ્રાસ્સિંહા નાગાસ્સરીસૃપાઃ ।
પરિવાર્યોપગચ્છંતિ ધાતારં પ્રાણિનો યથા ॥ 15 ॥
તતઃ પ્રાપ્તમૃષિં જ્ઞાત્વા તાનિ સત્ત્વાનિ વૈ યયુઃ ।
પ્રવિષ્ટે રાજનિ યથા સર્વં સામાત્યકં બલમ્ ॥ 16 ॥
ઋષિસ્તુ દૃષ્ટ્વા માં પ્રીતઃ પ્રવિષ્ટશ્ચાશ્રમં પુનઃ ।
મુહૂર્તમાત્રાન્નિષ્ક્રમ્ય તતઃ કાર્યમપૃચ્છત ॥ 17 ॥
સૌમ્ય વૈકલ્યતાં દૃષ્ટ્વા રોમ્ણાં તે નાવગમ્યતે ।
અગ્નિદગ્ધાવિમૌ પક્ષૌ વ્રણાશ્ચાપિ શરીરકે ॥ 18 ॥
ગૃધ્રૌ દ્વૌ દૃષ્ટપૂર્વૌ મે માતરિશ્વસમૌ જવે ।
ગૃધ્રાણાં ચૈવ રાજાનૌ ભ્રાતરૌ કામરૂપિણૌ ॥ 19 ॥
જ્યેષ્ઠો હિ ત્વં તુ સંપાતે જટાયુરનુજસ્તવ ।
માનુષં રૂપમાસ્થાય ગૃહ્ણીતાં ચરણૌ મમ ॥ 20 ॥
કિં તે વ્યાધિસમુત્થાનં પક્ષયોઃ પતનં કથમ્ ।
દંડોઽયંચ કૃતઃ કેન સર્વમાખ્યાહિ પૃચ્છતઃ ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ષષ્ટિતમસ્સર્ગઃ ॥
