śrīmadvālmīkīya rāmāyaṇē kiṣkindhākāṇḍam ।
atha ṣaṣṭitamassargaḥ ।
tataḥ kṛtōdakaṃ snātaṃ taṃ gṛdhraṃ hariyūthapāḥ ।
upaviṣṭā girau ramyē parivārya samantataḥ ॥ 1 ॥
tamaṅgadamupāsīnaṃ taissarvairharibhirvṛtam ।
janitapratyayō harṣātsampātiḥ punarabravīt ॥ 2 ॥
kṛtvā niśśabdamēkāgrā śśruṇvantu harayō mama ।
tatvaṃ saṅkīrtayiṣyāmi yathā jānāmi maithilīm ॥ 3 ॥
asya vindhyasya śikharē patitō'smi purāvanē ।
sūryatapaparītāṅgō nirdagdhassūryaraśmibhiḥ ॥ 4 ॥
labdhasañjñastu ṣaḍrātrādvivaśō vihvalanniva ।
vīkṣamāṇō diśassarvā nābhijānāmi kiñchana ॥ 5 ॥
tatastu sāgarān śailānnadīssarvāssarāṃsi cha ।
vanāni cha pradēśāṃścha nīrīkṣya matirāgatā ॥ 6 ॥
hṛṣṭapakṣigaṇākīrṇaḥ kandarāntarakūṭavān ।
dakṣiṇasyōdadhēstīrē vindhyō'yamiti niśchitaḥ ॥ 7 ॥
āsīchchātrāśramaṃ puṇyaṃ surairapi supūjitam ।
ṛṣirniśākarō nāma yasminnugratapābhavat ॥ 8 ॥
aṣṭau varṣasahasrāṇi tēnāsminnṛṣiṇā vinā ।
vasatō mama dharmajñā svargatē tu niśākarē ॥ 9 ॥
avatīrya tu vindhyāgrātkṛchChrēṇa viṣamāchChanaiḥ ।
tīkṣṇadarbhāṃ vasumatīṃ duḥkhēna punarāgataḥ ॥ 10 ॥
tamṛṣiṃ draṣṭukāmō'smi duḥkhēnābhyāgatō bhṛśam ।
jaṭāyuṣā mayā chaiva bahuśō'bhigatō hi saḥ ॥ 11 ॥
tasyāśramapadābhyāśē vavurvātāssugandhinaḥ ।
vṛkṣō vāpuṣpitaḥ kaśchidaphalō vā na vidyatē ॥ 12 ॥
upētya chāśramaṃ puṇyaṃ vṛkṣamūlamupāśritaḥ ।
draṣṭukāmaḥ pratīkṣē'haṃ bhagavantaṃ niśākaram ॥ 13 ॥
athāpaśyamadūrasthamṛṣiṃ jvalitatējasam ।
kṛtābhiṣēkaṃ durdharṣamupāvṛttamudaṅmukham ॥ 14 ॥
tamṛkṣāssṛmarā vyāghrāssiṃhā nāgāssarīsṛpāḥ ।
parivāryōpagachChanti dhātāraṃ prāṇinō yathā ॥ 15 ॥
tataḥ prāptamṛṣiṃ jñātvā tāni sattvāni vai yayuḥ ।
praviṣṭē rājani yathā sarvaṃ sāmātyakaṃ balam ॥ 16 ॥
ṛṣistu dṛṣṭvā māṃ prītaḥ praviṣṭaśchāśramaṃ punaḥ ।
muhūrtamātrānniṣkramya tataḥ kāryamapṛchChata ॥ 17 ॥
saumya vaikalyatāṃ dṛṣṭvā rōmṇāṃ tē nāvagamyatē ।
agnidagdhāvimau pakṣau vraṇāśchāpi śarīrakē ॥ 18 ॥
gṛdhrau dvau dṛṣṭapūrvau mē mātariśvasamau javē ।
gṛdhrāṇāṃ chaiva rājānau bhrātarau kāmarūpiṇau ॥ 19 ॥
jyēṣṭhō hi tvaṃ tu sampātē jaṭāyuranujastava ।
mānuṣaṃ rūpamāsthāya gṛhṇītāṃ charaṇau mama ॥ 20 ॥
kiṃ tē vyādhisamutthānaṃ pakṣayōḥ patanaṃ katham ।
daṇḍō'yañcha kṛtaḥ kēna sarvamākhyāhi pṛchChataḥ ॥ 21 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṣṭitamassargaḥ ॥
