శ్రీమద్వాల్మీకీయ రామాయణే కిష్కింధాకాండమ్ ।
అథ షష్టితమస్సర్గః ।
తతః కృతోదకం స్నాతం తం గృధ్రం హరియూథపాః ।
ఉపవిష్టా గిరౌ రమ్యే పరివార్య సమంతతః ॥ 1 ॥
తమంగదముపాసీనం తైస్సర్వైర్హరిభిర్వృతమ్ ।
జనితప్రత్యయో హర్షాత్సంపాతిః పునరబ్రవీత్ ॥ 2 ॥
కృత్వా నిశ్శబ్దమేకాగ్రా శ్శ్రుణ్వంతు హరయో మమ ।
తత్వం సంకీర్తయిష్యామి యథా జానామి మైథిలీమ్ ॥ 3 ॥
అస్య వింధ్యస్య శిఖరే పతితోఽస్మి పురావనే ।
సూర్యతపపరీతాంగో నిర్దగ్ధస్సూర్యరశ్మిభిః ॥ 4 ॥
లబ్ధసంజ్ఞస్తు షడ్రాత్రాద్వివశో విహ్వలన్నివ ।
వీక్షమాణో దిశస్సర్వా నాభిజానామి కించన ॥ 5 ॥
తతస్తు సాగరాన్ శైలాన్నదీస్సర్వాస్సరాంసి చ ।
వనాని చ ప్రదేశాంశ్చ నీరీక్ష్య మతిరాగతా ॥ 6 ॥
హృష్టపక్షిగణాకీర్ణః కందరాంతరకూటవాన్ ।
దక్షిణస్యోదధేస్తీరే వింధ్యోఽయమితి నిశ్చితః ॥ 7 ॥
ఆసీచ్చాత్రాశ్రమం పుణ్యం సురైరపి సుపూజితమ్ ।
ఋషిర్నిశాకరో నామ యస్మిన్నుగ్రతపాభవత్ ॥ 8 ॥
అష్టౌ వర్షసహస్రాణి తేనాస్మిన్నృషిణా వినా ।
వసతో మమ ధర్మజ్ఞా స్వర్గతే తు నిశాకరే ॥ 9 ॥
అవతీర్య తు వింధ్యాగ్రాత్కృచ్ఛ్రేణ విషమాచ్ఛనైః ।
తీక్ష్ణదర్భాం వసుమతీం దుఃఖేన పునరాగతః ॥ 10 ॥
తమృషిం ద్రష్టుకామోఽస్మి దుఃఖేనాభ్యాగతో భృశమ్ ।
జటాయుషా మయా చైవ బహుశోఽభిగతో హి సః ॥ 11 ॥
తస్యాశ్రమపదాభ్యాశే వవుర్వాతాస్సుగంధినః ।
వృక్షో వాపుష్పితః కశ్చిదఫలో వా న విద్యతే ॥ 12 ॥
ఉపేత్య చాశ్రమం పుణ్యం వృక్షమూలముపాశ్రితః ।
ద్రష్టుకామః ప్రతీక్షేఽహం భగవంతం నిశాకరమ్ ॥ 13 ॥
అథాపశ్యమదూరస్థమృషిం జ్వలితతేజసమ్ ।
కృతాభిషేకం దుర్ధర్షముపావృత్తముదఙ్ముఖమ్ ॥ 14 ॥
తమృక్షాస్సృమరా వ్యాఘ్రాస్సింహా నాగాస్సరీసృపాః ।
పరివార్యోపగచ్ఛంతి ధాతారం ప్రాణినో యథా ॥ 15 ॥
తతః ప్రాప్తమృషిం జ్ఞాత్వా తాని సత్త్వాని వై యయుః ।
ప్రవిష్టే రాజని యథా సర్వం సామాత్యకం బలమ్ ॥ 16 ॥
ఋషిస్తు దృష్ట్వా మాం ప్రీతః ప్రవిష్టశ్చాశ్రమం పునః ।
ముహూర్తమాత్రాన్నిష్క్రమ్య తతః కార్యమపృచ్ఛత ॥ 17 ॥
సౌమ్య వైకల్యతాం దృష్ట్వా రోమ్ణాం తే నావగమ్యతే ।
అగ్నిదగ్ధావిమౌ పక్షౌ వ్రణాశ్చాపి శరీరకే ॥ 18 ॥
గృధ్రౌ ద్వౌ దృష్టపూర్వౌ మే మాతరిశ్వసమౌ జవే ।
గృధ్రాణాం చైవ రాజానౌ భ్రాతరౌ కామరూపిణౌ ॥ 19 ॥
జ్యేష్ఠో హి త్వం తు సంపాతే జటాయురనుజస్తవ ।
మానుషం రూపమాస్థాయ గృహ్ణీతాం చరణౌ మమ ॥ 20 ॥
కిం తే వ్యాధిసముత్థానం పక్షయోః పతనం కథమ్ ।
దండోఽయంచ కృతః కేన సర్వమాఖ్యాహి పృచ్ఛతః ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కింధాకాండే షష్టితమస్సర్గః ॥
