ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଷଷ୍ଟିତମସ୍ସର୍ଗଃ ।
ତତଃ କୃତୋଦକଂ ସ୍ନାତଂ ତଂ ଗୃଧ୍ରଂ ହରିୟୂଥପାଃ ।
ଉପଵିଷ୍ଟା ଗିରୌ ରମ୍ୟେ ପରିଵାର୍ୟ ସମଂତତଃ ॥ 1 ॥
ତମଂଗଦମୁପାସୀନଂ ତୈସ୍ସର୍ଵୈର୍ହରିଭିର୍ଵୃତମ୍ ।
ଜନିତପ୍ରତ୍ୟୟୋ ହର୍ଷାତ୍ସଂପାତିଃ ପୁନରବ୍ରଵୀତ୍ ॥ 2 ॥
କୃତ୍ଵା ନିଶ୍ଶବ୍ଦମେକାଗ୍ରା ଶ୍ଶ୍ରୁଣ୍ଵଂତୁ ହରୟୋ ମମ ।
ତତ୍ଵଂ ସଂକୀର୍ତୟିଷ୍ୟାମି ୟଥା ଜାନାମି ମୈଥିଲୀମ୍ ॥ 3 ॥
ଅସ୍ୟ ଵିଂଧ୍ୟସ୍ୟ ଶିଖରେ ପତିତୋଽସ୍ମି ପୁରାଵନେ ।
ସୂର୍ୟତପପରୀତାଂଗୋ ନିର୍ଦଗ୍ଧସ୍ସୂର୍ୟରଶ୍ମିଭିଃ ॥ 4 ॥
ଲବ୍ଧସଂଜ୍ଞସ୍ତୁ ଷଡ୍ରାତ୍ରାଦ୍ଵିଵଶୋ ଵିହ୍ଵଲନ୍ନିଵ ।
ଵୀକ୍ଷମାଣୋ ଦିଶସ୍ସର୍ଵା ନାଭିଜାନାମି କିଂଚନ ॥ 5 ॥
ତତସ୍ତୁ ସାଗରାନ୍ ଶୈଲାନ୍ନଦୀସ୍ସର୍ଵାସ୍ସରାଂସି ଚ ।
ଵନାନି ଚ ପ୍ରଦେଶାଂଶ୍ଚ ନୀରୀକ୍ଷ୍ୟ ମତିରାଗତା ॥ 6 ॥
ହୃଷ୍ଟପକ୍ଷିଗଣାକୀର୍ଣଃ କଂଦରାଂତରକୂଟଵାନ୍ ।
ଦକ୍ଷିଣସ୍ୟୋଦଧେସ୍ତୀରେ ଵିଂଧ୍ୟୋଽୟମିତି ନିଶ୍ଚିତଃ ॥ 7 ॥
ଆସୀଚ୍ଚାତ୍ରାଶ୍ରମଂ ପୁଣ୍ୟଂ ସୁରୈରପି ସୁପୂଜିତମ୍ ।
ଋଷିର୍ନିଶାକରୋ ନାମ ୟସ୍ମିନ୍ନୁଗ୍ରତପାଭଵତ୍ ॥ 8 ॥
ଅଷ୍ଟୌ ଵର୍ଷସହସ୍ରାଣି ତେନାସ୍ମିନ୍ନୃଷିଣା ଵିନା ।
ଵସତୋ ମମ ଧର୍ମଜ୍ଞା ସ୍ଵର୍ଗତେ ତୁ ନିଶାକରେ ॥ 9 ॥
ଅଵତୀର୍ୟ ତୁ ଵିଂଧ୍ୟାଗ୍ରାତ୍କୃଚ୍ଛ୍ରେଣ ଵିଷମାଚ୍ଛନୈଃ ।
ତୀକ୍ଷ୍ଣଦର୍ଭାଂ ଵସୁମତୀଂ ଦୁଃଖେନ ପୁନରାଗତଃ ॥ 10 ॥
ତମୃଷିଂ ଦ୍ରଷ୍ଟୁକାମୋଽସ୍ମି ଦୁଃଖେନାଭ୍ୟାଗତୋ ଭୃଶମ୍ ।
ଜଟାୟୁଷା ମୟା ଚୈଵ ବହୁଶୋଽଭିଗତୋ ହି ସଃ ॥ 11 ॥
ତସ୍ୟାଶ୍ରମପଦାଭ୍ୟାଶେ ଵଵୁର୍ଵାତାସ୍ସୁଗଂଧିନଃ ।
ଵୃକ୍ଷୋ ଵାପୁଷ୍ପିତଃ କଶ୍ଚିଦଫଲୋ ଵା ନ ଵିଦ୍ୟତେ ॥ 12 ॥
ଉପେତ୍ୟ ଚାଶ୍ରମଂ ପୁଣ୍ୟଂ ଵୃକ୍ଷମୂଲମୁପାଶ୍ରିତଃ ।
ଦ୍ରଷ୍ଟୁକାମଃ ପ୍ରତୀକ୍ଷେଽହଂ ଭଗଵଂତଂ ନିଶାକରମ୍ ॥ 13 ॥
ଅଥାପଶ୍ୟମଦୂରସ୍ଥମୃଷିଂ ଜ୍ଵଲିତତେଜସମ୍ ।
କୃତାଭିଷେକଂ ଦୁର୍ଧର୍ଷମୁପାଵୃତ୍ତମୁଦଙ୍ମୁଖମ୍ ॥ 14 ॥
ତମୃକ୍ଷାସ୍ସୃମରା ଵ୍ୟାଘ୍ରାସ୍ସିଂହା ନାଗାସ୍ସରୀସୃପାଃ ।
ପରିଵାର୍ୟୋପଗଚ୍ଛଂତି ଧାତାରଂ ପ୍ରାଣିନୋ ୟଥା ॥ 15 ॥
ତତଃ ପ୍ରାପ୍ତମୃଷିଂ ଜ୍ଞାତ୍ଵା ତାନି ସତ୍ତ୍ଵାନି ଵୈ ୟୟୁଃ ।
ପ୍ରଵିଷ୍ଟେ ରାଜନି ୟଥା ସର୍ଵଂ ସାମାତ୍ୟକଂ ବଲମ୍ ॥ 16 ॥
ଋଷିସ୍ତୁ ଦୃଷ୍ଟ୍ଵା ମାଂ ପ୍ରୀତଃ ପ୍ରଵିଷ୍ଟଶ୍ଚାଶ୍ରମଂ ପୁନଃ ।
ମୁହୂର୍ତମାତ୍ରାନ୍ନିଷ୍କ୍ରମ୍ୟ ତତଃ କାର୍ୟମପୃଚ୍ଛତ ॥ 17 ॥
ସୌମ୍ୟ ଵୈକଲ୍ୟତାଂ ଦୃଷ୍ଟ୍ଵା ରୋମ୍ଣାଂ ତେ ନାଵଗମ୍ୟତେ ।
ଅଗ୍ନିଦଗ୍ଧାଵିମୌ ପକ୍ଷୌ ଵ୍ରଣାଶ୍ଚାପି ଶରୀରକେ ॥ 18 ॥
ଗୃଧ୍ରୌ ଦ୍ଵୌ ଦୃଷ୍ଟପୂର୍ଵୌ ମେ ମାତରିଶ୍ଵସମୌ ଜଵେ ।
ଗୃଧ୍ରାଣାଂ ଚୈଵ ରାଜାନୌ ଭ୍ରାତରୌ କାମରୂପିଣୌ ॥ 19 ॥
ଜ୍ୟେଷ୍ଠୋ ହି ତ୍ଵଂ ତୁ ସଂପାତେ ଜଟାୟୁରନୁଜସ୍ତଵ ।
ମାନୁଷଂ ରୂପମାସ୍ଥାୟ ଗୃହ୍ଣୀତାଂ ଚରଣୌ ମମ ॥ 20 ॥
କିଂ ତେ ଵ୍ୟାଧିସମୁତ୍ଥାନଂ ପକ୍ଷୟୋଃ ପତନଂ କଥମ୍ ।
ଦଂଡୋଽୟଂଚ କୃତଃ କେନ ସର୍ଵମାଖ୍ୟାହି ପୃଚ୍ଛତଃ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଷଷ୍ଟିତମସ୍ସର୍ଗଃ ॥
