ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഷഷ്ടിതമസ്സര്ഗഃ ।
തതഃ കൃതോദകം സ്നാതം തം ഗൃധ്രം ഹരിയൂഥപാഃ ।
ഉപവിഷ്ടാ ഗിരൌ രമ്യേ പരിവാര്യ സമംതതഃ ॥ 1 ॥
തമംഗദമുപാസീനം തൈസ്സർവൈര്ഹരിഭിർവൃതമ് ।
ജനിതപ്രത്യയോ ഹര്ഷാത്സംപാതിഃ പുനരബ്രവീത് ॥ 2 ॥
കൃത്വാ നിശ്ശബ്ദമേകാഗ്രാ ശ്ശ്രുണ്വംതു ഹരയോ മമ ।
തത്വം സംകീര്തയിഷ്യാമി യഥാ ജാനാമി മൈഥിലീമ് ॥ 3 ॥
അസ്യ വിംധ്യസ്യ ശിഖരേ പതിതോഽസ്മി പുരാവനേ ।
സൂര്യതപപരീതാംഗോ നിര്ദഗ്ധസ്സൂര്യരശ്മിഭിഃ ॥ 4 ॥
ലബ്ധസംജ്ഞസ്തു ഷഡ്രാത്രാദ്വിവശോ വിഹ്വലന്നിവ ।
വീക്ഷമാണോ ദിശസ്സർവാ നാഭിജാനാമി കിംചന ॥ 5 ॥
തതസ്തു സാഗരാന് ശൈലാന്നദീസ്സർവാസ്സരാംസി ച ।
വനാനി ച പ്രദേശാംശ്ച നീരീക്ഷ്യ മതിരാഗതാ ॥ 6 ॥
ഹൃഷ്ടപക്ഷിഗണാകീര്ണഃ കംദരാംതരകൂടവാന് ।
ദക്ഷിണസ്യോദധേസ്തീരേ വിംധ്യോഽയമിതി നിശ്ചിതഃ ॥ 7 ॥
ആസീച്ചാത്രാശ്രമം പുണ്യം സുരൈരപി സുപൂജിതമ് ।
ഋഷിര്നിശാകരോ നാമ യസ്മിന്നുഗ്രതപാഭവത് ॥ 8 ॥
അഷ്ടൌ വര്ഷസഹസ്രാണി തേനാസ്മിന്നൃഷിണാ വിനാ ।
വസതോ മമ ധര്മജ്ഞാ സ്വര്ഗതേ തു നിശാകരേ ॥ 9 ॥
അവതീര്യ തു വിംധ്യാഗ്രാത്കൃച്ഛ്രേണ വിഷമാച്ഛനൈഃ ।
തീക്ഷ്ണദര്ഭാം വസുമതീം ദുഃഖേന പുനരാഗതഃ ॥ 10 ॥
തമൃഷിം ദ്രഷ്ടുകാമോഽസ്മി ദുഃഖേനാഭ്യാഗതോ ഭൃശമ് ।
ജടായുഷാ മയാ ചൈവ ബഹുശോഽഭിഗതോ ഹി സഃ ॥ 11 ॥
തസ്യാശ്രമപദാഭ്യാശേ വവുർവാതാസ്സുഗംധിനഃ ।
വൃക്ഷോ വാപുഷ്പിതഃ കശ്ചിദഫലോ വാ ന വിദ്യതേ ॥ 12 ॥
ഉപേത്യ ചാശ്രമം പുണ്യം വൃക്ഷമൂലമുപാശ്രിതഃ ।
ദ്രഷ്ടുകാമഃ പ്രതീക്ഷേഽഹം ഭഗവംതം നിശാകരമ് ॥ 13 ॥
അഥാപശ്യമദൂരസ്ഥമൃഷിം ജ്വലിതതേജസമ് ।
കൃതാഭിഷേകം ദുര്ധര്ഷമുപാവൃത്തമുദങ്മുഖമ് ॥ 14 ॥
തമൃക്ഷാസ്സൃമരാ വ്യാഘ്രാസ്സിംഹാ നാഗാസ്സരീസൃപാഃ ।
പരിവാര്യോപഗച്ഛംതി ധാതാരം പ്രാണിനോ യഥാ ॥ 15 ॥
തതഃ പ്രാപ്തമൃഷിം ജ്ഞാത്വാ താനി സത്ത്വാനി വൈ യയുഃ ।
പ്രവിഷ്ടേ രാജനി യഥാ സർവം സാമാത്യകം ബലമ് ॥ 16 ॥
ഋഷിസ്തു ദൃഷ്ട്വാ മാം പ്രീതഃ പ്രവിഷ്ടശ്ചാശ്രമം പുനഃ ।
മുഹൂര്തമാത്രാന്നിഷ്ക്രമ്യ തതഃ കാര്യമപൃച്ഛത ॥ 17 ॥
സൌമ്യ വൈകല്യതാം ദൃഷ്ട്വാ രോമ്ണാം തേ നാവഗമ്യതേ ।
അഗ്നിദഗ്ധാവിമൌ പക്ഷൌ വ്രണാശ്ചാപി ശരീരകേ ॥ 18 ॥
ഗൃധ്രൌ ദ്വൌ ദൃഷ്ടപൂർവൌ മേ മാതരിശ്വസമൌ ജവേ ।
ഗൃധ്രാണാം ചൈവ രാജാനൌ ഭ്രാതരൌ കാമരൂപിണൌ ॥ 19 ॥
ജ്യേഷ്ഠോ ഹി ത്വം തു സംപാതേ ജടായുരനുജസ്തവ ।
മാനുഷം രൂപമാസ്ഥായ ഗൃഹ്ണീതാം ചരണൌ മമ ॥ 20 ॥
കിം തേ വ്യാധിസമുത്ഥാനം പക്ഷയോഃ പതനം കഥമ് ।
ദംഡോഽയംച കൃതഃ കേന സർവമാഖ്യാഹി പൃച്ഛതഃ ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഷഷ്ടിതമസ്സര്ഗഃ ॥
