શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ચતુઃષષ્ટિતમસ્સર્ગઃ ।
આખ્યાતા ગૃધ્રરાજેન સમુત્પ્લુત્ય પ્લવંગમાઃ ।
સંગતાઃ પ્રીતિસંયુક્તા વિનેદુર્ભીમવિક્રમાઃ ॥ 1 ॥
સંપાતેર્વચનં શ્રુત્વા હરયો રાવણક્ષયમ્ ।
હૃષ્ટાસ્સાગરમાજગ્મુસ્સીતાદર્શનકાંક્ષિણઃ ॥ 2 ॥
અભિક્રમ્ય તુ તં દેશં દદૃશુર્ભીમવિક્રમાઃ ।
કૃત્સ્નં લોકસ્ય મહતઃ પ્રતિબિંબમિવ સ્થિતમ્ ॥ 3 ॥
દક્ષિણસ્ય સમુદ્રસ્ય સમાસાદ્યોત્તરાં દિશમ્ ।
સન્નિવેશં તતશ્ચક્રુર્હરિવીરા મહાબલાઃ ॥ 4 ॥
સત્ત્વૈર્મહદ્ભિર્વિકૃતૈઃ ક્રીડદ્ભિર્વિવિધૈર્જલે ।
વ્યાત્તાસ્યૈસ્સુમહાકાયૈરૂર્મિભિશ્ચ સમાકુલમ્ ॥ 5 ॥
પ્રસુપ્તમિવ ચાન્યત્ર ક્રીડંતમિવ ચાન્યતઃ ।
ક્વચિત્પર્વતમાત્રૈશ્ચ જલરાશિભિરાવૃતમ્ ॥ 6 ॥
સંકુલં દાનવેંદ્રૈશ્ચ પાતાલતલવાસિભિઃ ।
રોમહર્ષકરં દૃષ્ટ્વા વિષેદુઃ કપિકુંજરાઃ ॥ 7 ॥
આકાશમિવ દુષ્પારં સાગરં પ્રેક્ષય વાનરાઃ ।
વિષેદુ સ્સહસાસર્વે કથં કાર્યમિતિ બ્રુવન્ ॥ 8 ॥
વિષણ્ણાં વાહિનીં દૃષ્ટ્વા સાગરસ્ય નિરીક્ષણાત્ ।
આશ્વાસયામાસ હરીન્ભયાર્તાન્ હરિસત્તમઃ ॥ 9 ॥
તાન્વિષાદેન મહતા વિષણ્ણાન્વાનરર્ષભાન્ ।
ઉવાચ મતિમાન્કાલે વાલિસૂનુર્મહાબલઃ ॥ 10 ॥
ન વિષાદે મનઃ કાર્યં વિષાદો દોષવત્તમઃ ।
વિષાદો હંતિ પુરુષં બાલં ક્રુદ્ધ ઇવોરગઃ ॥ 11 ॥
યો વિષાદં પ્રસહતે વિક્રમે પર્યુપસ્થિતે ।
તેજસા તસ્ય હીનસ્ય પુરુષાર્થો ન સિધ્યતિ ॥ 12 ॥
તસ્યાં રાત્ર્યાં વ્યતીતાયામંગદો વાનરૈસ્સહ ।
હરિવૃદ્ધૈસ્સમાગમ્ય પુનર્મંત્રમમંત્રયત્ ॥ 13 ॥
સા વાનરાણાં ધ્વજિની પરિવાર્યાંગદં બભૌ ।
વાસવં પરિવાર્યેવ મરુતાં વાહિની સ્થિતા ॥ 14 ॥
કોઽન્યસ્તાં વાનરીં સેનાં શક્તઃસ્તંભયિતું ભવેત્ ।
અન્યત્ર વાલિતનયાદન્યત્ર ચ હનૂમતઃ ॥ 15 ॥
તતસ્તાન્હરિવૃદ્ધાંશ્ચ તચ્ચ સૈન્યમરિંદમઃ ।
અનુમાન્યાંગદશ્શ્રીમાન્વાક્યમર્થવદબ્રવીત્ ॥ 16 ॥
ક ઇદાનીં મહાતેજા લંઘયિષ્યતિ સાગરમ્ ।
કઃ કરિષ્યતિ સુગ્રીવં સત્યસંધમરિંદમમ્ ॥ 17 ॥
કો વીરો યોજનશતં લંઘયેત પ્લવંગમાઃ ।
ઇમાંશ્ચ યૂથપાન્ સર્વાન્મોક્ષયેત્કો મહાભયાત્ ॥ 18 ॥
કસ્ય પ્રભાવાદ્ધારાંશ્ચ પુત્રાંશ્ચૈવ ગૃહાણિ ચ ।
ઇતો નિવૃત્તાઃ પશ્યેમ સિદ્ધાર્થાસ્સુખિનો વયમ્ ॥ 19 ॥
કસ્ય પ્રસાદાદ્રામં ચ લક્ષ્મણં ચ મહાબલમ્ ।
અભિગચ્છેમ સંહૃષ્ટાસ્સુગ્રીવં ચ વનૌકસમ્ ॥ 20 ॥
યદિ કશ્ચિત્સમર્થો વસ્સાગરપ્લવને હરિઃ ।
સ દદા ત્વિહ ન શશીઘ્રં પુણ્યામભયદક્ષિણામ્ ॥ 21 ॥
અંગદસ્ય વચ શ્શૃત્વા ન કશ્ચિત્ કિંચિદબ્રવીત્ ।
સ્તિમિતે વા ભવત્સર્વા સા તત્ર હરિવાહિની ॥ 22 ॥
પુનરેવાંગદઃ પ્રાહ તાન્હરીન્હરિસત્તમઃ ।
સર્વે બલવતાં શ્રેષ્ઠા ભવંતો દૃઢવિક્રમાઃ ॥ 23 ॥
વ્યપદેશ્ય કુલે જાતાઃ પૂજિતાશ્ચાપ્યભીક્ષ્ણશઃ ।
ન હિ વો ગમને સંગઃ કદાચિત્કસ્યચિત્ક્વચિત્ ।
બ્રુવધ્વં યસ્ય યા શક્તિઃ પ્લવને પ્લવગર્ષભાઃ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ચતુઃષષ્ટિતમસ્સર્ગઃ ॥
