śrīmadvālmīkīya rāmāyaṇē kiṣkindhākāṇḍam ।
atha chatuḥṣaṣṭitamassargaḥ ।
ākhyātā gṛdhrarājēna samutplutya plavaṅgamāḥ ।
saṅgatāḥ prītisaṃyuktā vinēdurbhīmavikramāḥ ॥ 1 ॥
sampātērvachanaṃ śrutvā harayō rāvaṇakṣayam ।
hṛṣṭāssāgaramājagmussītādarśanakāṅkṣiṇaḥ ॥ 2 ॥
abhikramya tu taṃ dēśaṃ dadṛśurbhīmavikramāḥ ।
kṛtsnaṃ lōkasya mahataḥ pratibimbamiva sthitam ॥ 3 ॥
dakṣiṇasya samudrasya samāsādyōttarāṃ diśam ।
sannivēśaṃ tataśchakrurharivīrā mahābalāḥ ॥ 4 ॥
sattvairmahadbhirvikṛtaiḥ krīḍadbhirvividhairjalē ।
vyāttāsyaissumahākāyairūrmibhiścha samākulam ॥ 5 ॥
prasuptamiva chānyatra krīḍantamiva chānyataḥ ।
kvachitparvatamātraiścha jalarāśibhirāvṛtam ॥ 6 ॥
saṅkulaṃ dānavēndraiścha pātālatalavāsibhiḥ ।
rōmaharṣakaraṃ dṛṣṭvā viṣēduḥ kapikuñjarāḥ ॥ 7 ॥
ākāśamiva duṣpāraṃ sāgaraṃ prēkṣaya vānarāḥ ।
viṣēdu ssahasāsarvē kathaṃ kāryamiti bruvan ॥ 8 ॥
viṣaṇṇāṃ vāhinīṃ dṛṣṭvā sāgarasya nirīkṣaṇāt ।
āśvāsayāmāsa harīnbhayārtān harisattamaḥ ॥ 9 ॥
tānviṣādēna mahatā viṣaṇṇānvānararṣabhān ।
uvācha matimānkālē vālisūnurmahābalaḥ ॥ 10 ॥
na viṣādē manaḥ kāryaṃ viṣādō dōṣavattamaḥ ।
viṣādō hanti puruṣaṃ bālaṃ kruddha ivōragaḥ ॥ 11 ॥
yō viṣādaṃ prasahatē vikramē paryupasthitē ।
tējasā tasya hīnasya puruṣārthō na sidhyati ॥ 12 ॥
tasyāṃ rātryāṃ vyatītāyāmaṅgadō vānaraissaha ।
harivṛddhaissamāgamya punarmantramamantrayat ॥ 13 ॥
sā vānarāṇāṃ dhvajinī parivāryāṅgadaṃ babhau ।
vāsavaṃ parivāryēva marutāṃ vāhinī sthitā ॥ 14 ॥
kō'nyastāṃ vānarīṃ sēnāṃ śaktaḥstambhayituṃ bhavēt ।
anyatra vālitanayādanyatra cha hanūmataḥ ॥ 15 ॥
tatastānharivṛddhāṃścha tachcha sainyamarindamaḥ ।
anumānyāṅgadaśśrīmānvākyamarthavadabravīt ॥ 16 ॥
ka idānīṃ mahātējā laṅghayiṣyati sāgaram ।
kaḥ kariṣyati sugrīvaṃ satyasandhamarindamam ॥ 17 ॥
kō vīrō yōjanaśataṃ laṅghayēta plavaṅgamāḥ ।
imāṃścha yūthapān sarvānmōkṣayētkō mahābhayāt ॥ 18 ॥
kasya prabhāvāddhārāṃścha putrāṃśchaiva gṛhāṇi cha ।
itō nivṛttāḥ paśyēma siddhārthāssukhinō vayam ॥ 19 ॥
kasya prasādādrāmaṃ cha lakṣmaṇaṃ cha mahābalam ।
abhigachChēma saṃhṛṣṭāssugrīvaṃ cha vanaukasam ॥ 20 ॥
yadi kaśchitsamarthō vassāgaraplavanē hariḥ ।
sa dadā tviha na śaśīghraṃ puṇyāmabhayadakṣiṇām ॥ 21 ॥
aṅgadasya vacha śśṛtvā na kaśchit kiñchidabravīt ।
stimitē vā bhavatsarvā sā tatra harivāhinī ॥ 22 ॥
punarēvāṅgadaḥ prāha tānharīnharisattamaḥ ।
sarvē balavatāṃ śrēṣṭhā bhavantō dṛḍhavikramāḥ ॥ 23 ॥
vyapadēśya kulē jātāḥ pūjitāśchāpyabhīkṣṇaśaḥ ।
na hi vō gamanē saṅgaḥ kadāchitkasyachitkvachit ।
bruvadhvaṃ yasya yā śaktiḥ plavanē plavagarṣabhāḥ ॥ 24 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē chatuḥṣaṣṭitamassargaḥ ॥
