ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ചതുഃഷഷ്ടിതമസ്സര്ഗഃ ।
ആഖ്യാതാ ഗൃധ്രരാജേന സമുത്പ്ലുത്യ പ്ലവംഗമാഃ ।
സംഗതാഃ പ്രീതിസംയുക്താ വിനേദുര്ഭീമവിക്രമാഃ ॥ 1 ॥
സംപാതേർവചനം ശ്രുത്വാ ഹരയോ രാവണക്ഷയമ് ।
ഹൃഷ്ടാസ്സാഗരമാജഗ്മുസ്സീതാദര്ശനകാംക്ഷിണഃ ॥ 2 ॥
അഭിക്രമ്യ തു തം ദേശം ദദൃശുര്ഭീമവിക്രമാഃ ।
കൃത്സ്നം ലോകസ്യ മഹതഃ പ്രതിബിംബമിവ സ്ഥിതമ് ॥ 3 ॥
ദക്ഷിണസ്യ സമുദ്രസ്യ സമാസാദ്യോത്തരാം ദിശമ് ।
സന്നിവേശം തതശ്ചക്രുര്ഹരിവീരാ മഹാബലാഃ ॥ 4 ॥
സത്ത്വൈര്മഹദ്ഭിർവികൃതൈഃ ക്രീഡദ്ഭിർവിവിധൈര്ജലേ ।
വ്യാത്താസ്യൈസ്സുമഹാകായൈരൂര്മിഭിശ്ച സമാകുലമ് ॥ 5 ॥
പ്രസുപ്തമിവ ചാന്യത്ര ക്രീഡംതമിവ ചാന്യതഃ ।
ക്വചിത്പർവതമാത്രൈശ്ച ജലരാശിഭിരാവൃതമ് ॥ 6 ॥
സംകുലം ദാനവേംദ്രൈശ്ച പാതാലതലവാസിഭിഃ ।
രോമഹര്ഷകരം ദൃഷ്ട്വാ വിഷേദുഃ കപികുംജരാഃ ॥ 7 ॥
ആകാശമിവ ദുഷ്പാരം സാഗരം പ്രേക്ഷയ വാനരാഃ ।
വിഷേദു സ്സഹസാസർവേ കഥം കാര്യമിതി ബ്രുവന് ॥ 8 ॥
വിഷണ്ണാം വാഹിനീം ദൃഷ്ട്വാ സാഗരസ്യ നിരീക്ഷണാത് ।
ആശ്വാസയാമാസ ഹരീന്ഭയാര്താന് ഹരിസത്തമഃ ॥ 9 ॥
താന്വിഷാദേന മഹതാ വിഷണ്ണാന്വാനരര്ഷഭാന് ।
ഉവാച മതിമാന്കാലേ വാലിസൂനുര്മഹാബലഃ ॥ 10 ॥
ന വിഷാദേ മനഃ കാര്യം വിഷാദോ ദോഷവത്തമഃ ।
വിഷാദോ ഹംതി പുരുഷം ബാലം ക്രുദ്ധ ഇവോരഗഃ ॥ 11 ॥
യോ വിഷാദം പ്രസഹതേ വിക്രമേ പര്യുപസ്ഥിതേ ।
തേജസാ തസ്യ ഹീനസ്യ പുരുഷാര്ഥോ ന സിധ്യതി ॥ 12 ॥
തസ്യാം രാത്ര്യാം വ്യതീതായാമംഗദോ വാനരൈസ്സഹ ।
ഹരിവൃദ്ധൈസ്സമാഗമ്യ പുനര്മംത്രമമംത്രയത് ॥ 13 ॥
സാ വാനരാണാം ധ്വജിനീ പരിവാര്യാംഗദം ബഭൌ ।
വാസവം പരിവാര്യേവ മരുതാം വാഹിനീ സ്ഥിതാ ॥ 14 ॥
കോഽന്യസ്താം വാനരീം സേനാം ശക്തഃസ്തംഭയിതും ഭവേത് ।
അന്യത്ര വാലിതനയാദന്യത്ര ച ഹനൂമതഃ ॥ 15 ॥
തതസ്താന്ഹരിവൃദ്ധാംശ്ച തച്ച സൈന്യമരിംദമഃ ।
അനുമാന്യാംഗദശ്ശ്രീമാന്വാക്യമര്ഥവദബ്രവീത് ॥ 16 ॥
ക ഇദാനീം മഹാതേജാ ലംഘയിഷ്യതി സാഗരമ് ।
കഃ കരിഷ്യതി സുഗ്രീവം സത്യസംധമരിംദമമ് ॥ 17 ॥
കോ വീരോ യോജനശതം ലംഘയേത പ്ലവംഗമാഃ ।
ഇമാംശ്ച യൂഥപാന് സർവാന്മോക്ഷയേത്കോ മഹാഭയാത് ॥ 18 ॥
കസ്യ പ്രഭാവാദ്ധാരാംശ്ച പുത്രാംശ്ചൈവ ഗൃഹാണി ച ।
ഇതോ നിവൃത്താഃ പശ്യേമ സിദ്ധാര്ഥാസ്സുഖിനോ വയമ് ॥ 19 ॥
കസ്യ പ്രസാദാദ്രാമം ച ലക്ഷ്മണം ച മഹാബലമ് ।
അഭിഗച്ഛേമ സംഹൃഷ്ടാസ്സുഗ്രീവം ച വനൌകസമ് ॥ 20 ॥
യദി കശ്ചിത്സമര്ഥോ വസ്സാഗരപ്ലവനേ ഹരിഃ ।
സ ദദാ ത്വിഹ ന ശശീഘ്രം പുണ്യാമഭയദക്ഷിണാമ് ॥ 21 ॥
അംഗദസ്യ വച ശ്ശൃത്വാ ന കശ്ചിത് കിംചിദബ്രവീത് ।
സ്തിമിതേ വാ ഭവത്സർവാ സാ തത്ര ഹരിവാഹിനീ ॥ 22 ॥
പുനരേവാംഗദഃ പ്രാഹ താന്ഹരീന്ഹരിസത്തമഃ ।
സർവേ ബലവതാം ശ്രേഷ്ഠാ ഭവംതോ ദൃഢവിക്രമാഃ ॥ 23 ॥
വ്യപദേശ്യ കുലേ ജാതാഃ പൂജിതാശ്ചാപ്യഭീക്ഷ്ണശഃ ।
ന ഹി വോ ഗമനേ സംഗഃ കദാചിത്കസ്യചിത്ക്വചിത് ।
ബ്രുവധ്വം യസ്യ യാ ശക്തിഃ പ്ലവനേ പ്ലവഗര്ഷഭാഃ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ചതുഃഷഷ്ടിതമസ്സര്ഗഃ ॥
