ශ්රීමද්වාල්මීකීය රාමායණේ සුංදරකාංඩම් ।
අථ දශමස්සර්ගඃ ।
තත්ර දිව්යෝපමං මුඛ්යං ස්ඵාටිකං රත්නභූෂිතම් ।
අවේක්ෂමාණෝ හනුමාන් දදර්ශ ශයනාසනම් ॥ 1 ॥
දාංතකාංචනචිත්රාංගෛර්වෛඩූර්යෛශ්ච වරාසනෛඃ ।
මහාර්හාස්තරණෝපේතෛරුපපන්නං මහාධනෛඃ ॥ 2 ॥
තස්ය චෛකතමේ දේශේ සෝऽග්ය්රමාලාවිභූෂිතම් ।
දදර්ශ පාංඩුරං ඡත්රං තාරාධිපතිසන්නිභම් ॥ 3 ॥
ජාතරූපපරික්ෂිප්තං චිත්රභානුසමප්රභම් ।
අශෝකමාලාවිතතං දදර්ශ පරමාසනම් ॥ 4 ॥
වාලව්යජනහස්තාභිර්වීජ්යමානං සමංතතඃ ।
ගංධෛශ්ච විවිධෛර්ජුෂ්ටං වරධූපේන ධූපිතම් ॥ 5 ॥
පරමාස්තරණාස්තීර්ණමාවිකාජිනසංවෘතම් ।
දාමභිර්වරමාල්යානාං සමංතාදුපශෝභිතම් ॥ 6 ॥
තස්මින් ජීමූතසංකාශං ප්රදීප්තෝත්තමකුංඩලම් ।
ලෝහිතාක්ෂං මහාබාහුං මහාරජතවාසසම් ॥ 7 ॥
ලෝහිතේනානුලිප්තාංගං චංදනේන සුගංධිනා ।
සංධ්යාරක්තමිවාකාශේ තෝයදං සතටිද්ගණම් ॥ 8 ॥
වෘතමාභරණෛර්දිව්යෛඃ සුරූපං කාමරූපිණම් ।
සවෘක්ෂවනගුල්මාඪ්යං ප්රසුප්තමිව මංදරම් ॥ 9 ॥
ක්රීඩිත්වෝපරතං රාත්රෞ වරාභරණභූෂිතම් ।
ප්රියං රාක්ෂසකන්යානාං රාක්ෂසානාං සුඛාවහම් ॥ 10 ॥
පීත්වාऽප්යුපරතං චාපි දදර්ශ ස මහාකපිඃ ।
භාස්වරේ ශයනේ වීරං ප්රසුප්තං රාක්ෂසාධිපම් ॥ 11 ॥
නිඃශ්වසංතං යථා නාගං රාවණං වානරර්ෂභඃ ।
ආසාද්ය පරමෝද්විග්නස්සෝපාසර්පත්සුභීතවත් ॥ 12 ॥
අථාऽऽරෝහණමාසාද්ය වේදිකාऽංතරමාශ්රිතඃ ।
සුප්තං රාක්ෂසශාර්දූලං ප්රේක්ෂතේ ස්ම මහාකපිඃ ॥ 13 ॥
ශුශුභේ රාක්ෂසේංද්රස්ය ස්වපතඃ ශයනෝත්තමම් ।
ගංධහස්තිනි සංවිෂ්ටේ යථා ප්රස්රවණං මහත් ॥ 14 ॥
කාංචනාංගදසන්නධ්දෛ ච දදර්ශ ස මහාත්මනඃ ।
වික්ෂිප්තෞ රාක්ෂසේංද්රස්ය භුජාවිංද්රධ්වජෝපමෞ ॥ 15 ॥
ඓරාවතවිෂාණාග්රෛරාපීඩනකෘතව්රණෞ ।
වජ්රෝල්ලිඛිතපීනාංසෞ විෂ්ණුචක්රපරික්ෂතෞ ॥ 16 ॥
පීනෞ සමසුජාතාංසෞ සංගතෞ බලසංයුතෞ ।
සුලක්ෂණනඛාංගුෂ්ඨා ස්වංගුලීතලලක්ෂිතෞ ॥ 17 ॥
සංහතෞ පරිඝාකාරෞ වෘත්තෞ කරිකරෝපමෞ ।
වික්ෂිප්තෞ ශයනේ ශුභ්රේ පංචශීර්ෂාවිවෝරගෞ ॥ 18 ॥
ශශක්ෂතජකල්පේන සුශීතේන සුගංධිනා ।
චංදනේන පරාර්ධ්යේන ස්වනුලිප්තෞ ස්වලංකෘතෞ ॥ 19 ॥
උත්තමස්ත්රීවිමෘදිතෞ ගංධෝත්තමනිෂේවිතෞ ।
යක්ෂපන්නගගංධර්වදේවදානවරාවිණෞ ॥ 20 ॥
දදර්ශ ස කපිස්තත්ර බාහූ ශයනසංස්ථිතෞ ।
මංදරස්යාංතරේ සුප්තෞ මහාහී රුෂිතාවිව ॥ 21 ॥
තාභ්යාං ස පරිපූර්ණාභ්යාං භුජාභ්යාං රාක්ෂසේශ්වරඃ ।
ශුශුභේऽචලසංකාශඃ ශෘංගාභ්යාමිව මංදරඃ ॥ 22 ॥
චූතපුන්නාගසුරභිර්වකුලෝත්තමසංයුතඃ ।
මෘෂ්ටාන්නරසසංයුක්තඃ පානගංධපුරස්කෘතඃ ॥ 23 ॥
තස්ය රාක්ෂසසිංහස්ය නිශ්චක්රාම මහාමුඛාත් ।
ශයානස්ය විනිඃශ්වාසඃ පූරයන්නිව තද් ගෘහම් ॥ 24 ॥
මුක්තාමණිවිචිත්රේණ කාංචනේන විරාජිතම් ।
මකුටේනාපවෘත්තේන කුංඩලෝජ්වලිතානනම් ॥ 25 ॥
රක්තචංදනදිග්ධේන තථා හාරේණ ශෝභිනා ।
පීනායතවිශාලේන වක්ෂසාऽභිවිරාජිතම් ॥ 26 ॥
පාංඩරේණාපවිද්ධේන ක්ෂෞමේණ ක්ෂතජේක්ෂණම් ।
මහාර්හේණ සුසංවීතං පීතේනෝත්තමවාසසා ॥ 27 ॥
මාෂරාශිප්රතීකාශං නිශ්ශ්වසංතං භුජංගවත් ।
ගාංගේ මහති තෝයාංතේ ප්රසුප්තමිව කුංජරම් ॥ 28 ॥
චතුර්භිඃ කාංචනෛර්දීපෛද්ධීප්යමානචතුර්දිශම් ।
ප්රකාශීකෘතසර්වාංගං මේඝං විද්යුද්ගණෛරිව ॥ 29 ॥
පාදමූලගතාශ්චාපි දදර්ශ සුමහාත්මනඃ ।
පත්නීඃ ස ප්රියභාර්යස්ය තස්ය රක්ෂඃපතේර්ගෘහේ ॥ 30 ॥
ශශිප්රකාශවදනාශ්චාරුකුංඩලභූෂිතාඃ ।
අම්ලානමාල්යාභරණා දදර්ශ හරියූථපඃ ॥ 31 ॥
නෘත්තවාදිත්රකුශලා රාක්ෂසේංද්රභුජාංකගාඃ ।
වරාභරණධාරිණ්යෝ නිෂණ්ණා දදෘශේ හරිඃ ॥ 32 ॥
වජ්රවෛඩූර්යගර්භාණි ශ්රවණාංතේෂු යෝෂිතාම් ।
දදර්ශ තාපනීයානි කුංඩලාන්යංගදානි ච ॥ 33 ॥
තාසාං චංද්රෝපමෛර්වක්ත්රෛශ්ශුභෛර්ලලිතකුංඩලෛඃ ।
විරරාජ විමානං තන්නභස්තාරාගණෛරිව ॥ 34 ॥
මදව්යායාමඛින්නාස්තා රාක්ෂසේංද්රස්ය යෝෂිතඃ ।
තේෂු තේෂ්වවකාශේෂු ප්රසුප්තාස්තනුමධ්යමාඃ ॥ 35 ॥
අංගහාරෛස්තථෛවාන්යා කෝමලෛර්නෘත්තශාලිනී ।
වින්යස්තශුභසර්වාංගී ප්රසුප්තා වරවර්ණිනී ॥ 36 ॥
කාචිද්වීණාං පරිෂ්වජ්ය ප්රසුප්තා සංප්රකාශතේ ।
මහානදීප්රකීර්ණේව නලිනී පෝතමාශ්රිතා ॥ 37 ॥
අන්යා කක්ෂගතේනෛව මඩ්ඩුකේනාසිතේක්ෂණා ।
ප්රසුප්තා භාමිනී භාති බාලපුත්රේව වත්සලා ॥ 38 ॥
පටහං චාරුසර්වාංගී පීඩ්ය ශේතේ ශුභස්තනී ।
චිරස්ය රමණං ලබ්ධ්වා පරිෂ්වජ්යේව භාමිනී ॥ 39 ॥
කාචිද්වංශං පරිෂ්වජ්ය සුප්තා කමලලෝචනා ।
රහඃ ප්රියතමං ගෘහ්ය සකාමේව ච කාමිනී ॥ 40 ॥
විපංචීං පරිගෘහ්යාන්යා නියතා නෘත්තශාලිනී ।
නිද්රාවශමනුප්රාප්තා සහ කාංතේව භාමිනී ॥ 41 ॥
අන්යා කනකසංකාශෛර්මෘදුපීනෛර්මනෝරමෛඃ ।
මෘදංගං පරිපීඩ්යාංගෛඃ ප්රසුප්තා මත්තලෝචනා ॥ 42 ॥
භුජපාර්ශ්වාංතරස්ථේන කක්ෂගේන කෘශෝදරී ।
පණවේව සහානිංද්යා සුප්තා මදකෘතශ්රමා ॥ 43 ॥
ඩිංඩිමං පරිගෘහ්යාන්යා තථෛවාසක්තඩිංඩිමා ।
ප්රසුප්තා තරුණං වත්සමුපගූහ්යේව භාමිනී ॥ 44 ॥
කාචිදාඩංබරං නාරී භුජසංයෝගපීඩිතම් ।
කෘත්වා කමලපත්රාක්ෂී ප්රසුප්තා මදමෝහිතා ॥ 45 ॥
කලශීමපවිධ්යාන්යා ප්රසුප්තා භාති භාමිනී ।
වසංතේ පුෂ්පශබලා මාලේව පරිමාර්ජිතා ॥ 46 ॥
පාණිභ්යාං ච කුචෞ කාචිත්සුවර්ණකලශෝපමෞ ।
උපගූහ්යාබලා සුප්තා නිද්රාබලපරාජිතා ॥ 47 ॥
අන්යා කමලපත්රාක්ෂී පූර්ණේංදුසදෘශානනා ।
අන්යාමාලිංග්ය සුශ්රෝණීං ප්රසුප්තා මදවිහ්වලා ॥ 48 ॥
ආතෝද්යානි විචිත්රාණි පරිෂ්වජ්ය වරස්ත්රියඃ ।
නිපීඩ්ය ච කුචෛස්සුප්තා කාමින්යඃ කාමුකානිව ॥ 49 ॥
තාසාමේකාංතවින්යස්තේ ශයානාං ශයනේ ශුභේ ।
දදර්ශ රූපසංපන්නාමපරාං ස කපිඃ ස්ත්රියම් ॥ 50 ॥
මුක්තාමණිසමායුක්තෛර්භූෂණෛඃ සුවිභූෂිතාම් ।
විභූෂයංතීමිව තත්ස්වශ්රියා භවනෝත්තමම් ॥ 51 ॥
ගෞරීං කනකවර්ණාභාමිෂ්ටාමංතඃ පුරේශ්වරීම් ।
කපිර්මංදෝදරීං තත්ර ශයානාං චාරුරූපිණීම් ॥ 52 ॥
ස තාං දෘෂ්ට්වා මහාබාහුර්භූෂිතාං මාරුතාත්මජඃ ।
තර්කයාමාස සීතේති රූපයෞවනසංපදා ॥ 53 ॥
හර්ෂේණ මහතා යුක්තෝ නනංද හරියූථපඃ ।
ආස්ඵෝටයාමාස චුචුංබ පුච්ඡං නනංද චික්රීඩ ජගෞ ජගාම ।
ස්තංභානරෝහන්නිපපාත භූමෞ නිදර්ශයන් ස්වාං ප්රකෘතිං කපීනාම් ॥ 54 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ දශමස්සර්ගඃ ॥
