śrīmadvālmīkīya rāmāyaṇē sundarakāṇḍam ।
atha ēkādaśassargaḥ ।
avadhūya cha tāṃ buddhiṃ babhūvāvasthitastadā ।
jagāma chāparāṃ chintāṃ sītāṃ prati mahākapiḥ ॥ 1 ॥
na rāmēṇa viyuktā sā svaptumarhati bhāminī ।
na bhōktuṃ vāpyalaṅkartuṃ na pānamupasēvitum ॥ 2 ॥
nānyaṃ naramupasthātuṃ surāṇāmapi chēśvaram ।
na hi rāmasamaḥ kaśchidvidyatē tridaśēṣvapi ॥ 3 ॥
anyēyamiti niśchitya pānabhūmau chachāra saḥ ।
krīḍitēnāparāḥ klāntā gītēna cha tathā'parāḥ ॥ 4 ॥
nṛttēna chāparāḥ klāntāḥ pānaviprahatāstathā ।
murajēṣu mṛdaṅgēṣu pīṭhikāsu cha saṃsthitāḥ ॥ 5 ॥
tathā''staraṇamukhyēṣu saṃviṣṭāśchāparāḥ striyaḥ ।
aṅganānāṃ sahasrēṇa bhūṣitēna vibhūṣaṇaiḥ ॥ 6 ॥
rūpasallāpaśīlēna yuktagītārthabhāṣiṇā ।
dēśakālābhiyuktēna yuktavākyābhidhāyinā ॥ 7 ॥
ratābhiratasaṃsuptaṃ dadarśa hariyūthapaḥ ।
tāsāṃ madhyē mahābāhuḥ śuśubhē rākṣasēśvaraḥ ॥ 8 ॥
gōṣṭhē mahati mukhyānāṃ gavāṃ madhyē yathā vṛṣaḥ ।
sa rākṣasēndraḥ śuśubhē tābhiḥ parivṛtassvayam ॥ 9 ॥
karēṇubhiryathā'raṇyē parikīrṇō mahādvipaḥ ।
sarvakāmairupētāṃ cha pānabhūmiṃ mahātmanaḥ ॥ 10 ॥
dadarśa hariśārdūlastasya rakṣaḥpatērgṛhē ।
mṛgāṇāṃ mahiṣāṇāṃ cha varāhāṇāṃ cha bhāgaśaḥ ॥ 11 ॥
tatra nyastāni māṃsāni pānabhūmau dadarśa saḥ ।
raukmēṣu cha viśālēṣu bhājanēṣvardhabhakṣitān ॥ 12 ॥
dadarśa hariśārdūlō mayūrān kukkuṭāṃstathā ।
varāhavārdhrāṇasakān dadhisauvarchalāyutān ॥ 13 ॥
śalyān mṛgamayūrāṃścha hanumānanvavaikṣata ।
krakarānvividhān siddhāṃśchakōrānardhabhakṣitān ॥ 14 ॥
mahiṣānēkaśalyāṃścha Chāgāṃścha kṛtaniṣṭhitān ।
lēhyānuchchāvachānpēyān bhōjyāni vividhāni cha ॥ 15 ॥
tathā''mlalavaṇōttaṃsairvividhairāgaṣāḍabaiḥ ।
hāranūpurakēyūrairapaviddhairmahādhanaiḥ ॥ 16 ॥
pānabhājanavikṣiptaiḥ phalaiścha vividhairapi ।
kṛtapuṣpōpahārā bhūradhikaṃ puṣyati śriyam ॥ 17 ॥
tatra tatra cha vinyastaiḥ suśliṣṭaiśśayanāsanaiḥ ।
pānabhūmirvinā vahniṃ pradīptēvōpalakṣyatē ॥ 18 ॥
bahuprakārairvividhairvarasaṃskārasaṃskṛtaiḥ ।
māṃsaiḥ kuśalasampṛktaiḥ pānabhūmigataiḥ pṛthak ॥ 19 ॥
divyāḥ prasannā vividhāḥ surāḥ kṛtasurā api ।
śarkarā'savamādhvīkapuṣpāsavaphalāsavāḥ ॥ 20 ॥
vāsachūrṇaiścha vividhairmṛṣṭāstaistaiḥ pṛthak pṛthak ।
santatā śuśubhē bhūmirmālyaiścha bahusaṃsthitaiḥ ॥ 21 ॥
hiraṇmayaiścha vividhairbhājanaiḥ sphāṭikairapi ।
jāmbūnadamayaiśchānyaiḥ karakairabhisaṃvṛtā ॥ 22 ॥
rājatēṣu cha kumbhēṣu jāmbūnadamayēṣu cha ।
pānaśrēṣṭhaṃ tadā bhūri kapistatra dadarśa ha ॥ 23 ॥
sō'paśyachChātakumbhāni sīdhōrmaṇimayāni cha ।
rājatāni cha pūrṇāni bhājanāni mahākapiḥ ॥ 24 ॥
kvachidalpāvaśēṣāṇi kvachitpītāni sarvaśaḥ ।
kvachinnaiva prapītāni pānāni sa dadarśa ha ॥ 25 ॥
kvachid bhakṣyāṃścha vividhān kvachitpānāni bhāgaśaḥ ।
kvachidannāvaśēṣāṇi paśyanvai vichachāra ha ॥ 26 ॥
kvachitprabhinnaiḥ karakaiḥ kvachidālōlitairghaṭaiḥ ।
kvachitsampṛktamālyāni jalāni cha phalāni cha ॥ 27 ॥
śayanānyatra nārīṇāṃ śubhrāṇi bahudhā punaḥ ।
parasparaṃ samāśliṣya kāśchitsuptā varāṅganāḥ ॥ 28 ॥
kāśchichcha vastramanyasyāssvapantyāḥ paridhāya cha ।
āhṛtya chābalāḥ suptā nidrābalaparājitāḥ ॥ 29 ॥
tāsāmuchChavāsavātēna vastraṃ mālyaṃ cha gātrajam ।
nātyarthaṃ spandatē chitraṃ prāpya mandamivānilam ॥ 30 ॥
chandanasya cha śītasya śīdhōrmadhurasasya cha ।
vividhasya cha mālyasya dhūpasya vividhasya cha ॥ 31 ॥
bahudhā mārutastatra gandhaṃ vividhamudvahan ।
snānānāṃ chandanānāṃ cha dhūpānāṃ chaiva mūrChitaḥ ॥ 32 ॥
pravavau surabhirgandhō vimānē puṣpakē tadā ।
śyāmāvadātāstatrānyāḥ kāśchitkṛṣṇā varāṅganāḥ ॥ 33 ॥
kāśchit kāñchanavarṇāṅgyaḥ pramadā rākṣasālayē ।
tāsāṃ nidrāvaśatvāchcha madanēna vimūrChitam ॥ 34 ॥
padminīnāṃ prasuptānāṃ rūpamāsīdyathaiva hi ।
ēvaṃ sarvamaśēṣēṇa rāvaṇāntaḥ puraṃ kapiḥ ॥ 35 ॥
dadarśa sumahātējāḥ na dadarśa cha jānakīm ।
nirīkṣamāṇaścha tadā tāḥ striyaḥ sa mahākapiḥ ॥ 36 ॥
jagāma mahatīṃ chintāṃ dharmasādhvasaśaṅkitaḥ ।
paradārāvarōdhasya prasuptasya nirīkṣaṇam ॥ 37 ॥
idaṃ khalu mamātyarthaṃ dharmalōpaṃ kariṣyati ।
na hi mē paradārāṇāṃ dṛṣṭirviṣayavartinī ॥ 38 ॥
ayaṃ chātra mayā dṛṣṭaḥ paradārāparigrahaḥ ।
tasya prādurabhūchchintā punaranyā manasvinaḥ ॥ 39 ॥
niśchitaikāntachittasya kāryaniśchayadarśinī ।
kāmaṃ dṛṣṭā mayā sarvā viśvastā rāvaṇastriyaḥ ॥ 40 ॥
na hi mē manasaḥ kiñchidvaikṛtyamupajāyatē ।
manō hi hētuḥ sarvēṣāmindriyāṇāṃ pravartanē ॥ 41 ॥
śubhāśubhāsvavasthāsu tachcha mē suvyavasthitam ।
nānyatra hi mayā śakyā vaidēhī parimārgitum ॥ 42 ॥
striyō hi strīṣu dṛśyantē sadā samparimārgaṇē ।
yasya sattvasya yā yōnistasyāṃ tatparimārgyatē ।
na śakyā pramadā naṣṭā mṛgīṣu parimārgitum ॥ 43 ॥
tadidaṃ mārgitaṃ tāvachChuddhēna manasā mayā ॥ 44 ॥
rāvaṇāntaḥpuraṃ sarvaṃ dṛśyatē na tu jānakī ।
dēvagandharvakanyāścha nāgakanyāścha vīryavān ॥ 45 ॥
avēkṣamāṇō hanumānnaivāpaśyata jānakīm ।
tāmapaśyankapistatra paśyañśchānyā parastriyaḥ ॥ 46 ॥
apakramya tadā vīraḥ pradhyātumupachakramē ।
sa bhūyastu paraṃ śrīmān mārutiryatnamāsthitaḥ ॥ 47 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkādaśassargaḥ ॥
