ශ්රීමද්වාල්මීකීය රාමායණේ සුංදරකාංඩම් ।
අථ ඒකාදශස්සර්ගඃ ।
අවධූය ච තාං බුද්ධිං බභූවාවස්ථිතස්තදා ।
ජගාම චාපරාං චිංතාං සීතාං ප්රති මහාකපිඃ ॥ 1 ॥
න රාමේණ වියුක්තා සා ස්වප්තුමර්හති භාමිනී ।
න භෝක්තුං වාප්යලංකර්තුං න පානමුපසේවිතුම් ॥ 2 ॥
නාන්යං නරමුපස්ථාතුං සුරාණාමපි චේශ්වරම් ।
න හි රාමසමඃ කශ්චිද්විද්යතේ ත්රිදශේෂ්වපි ॥ 3 ॥
අන්යේයමිති නිශ්චිත්ය පානභූමෞ චචාර සඃ ।
ක්රීඩිතේනාපරාඃ ක්ලාංතා ගීතේන ච තථාऽපරාඃ ॥ 4 ॥
නෘත්තේන චාපරාඃ ක්ලාංතාඃ පානවිප්රහතාස්තථා ।
මුරජේෂු මෘදංගේෂු පීඨිකාසු ච සංස්ථිතාඃ ॥ 5 ॥
තථාऽऽස්තරණමුඛ්යේෂු සංවිෂ්ටාශ්චාපරාඃ ස්ත්රියඃ ।
අංගනානාං සහස්රේණ භූෂිතේන විභූෂණෛඃ ॥ 6 ॥
රූපසල්ලාපශීලේන යුක්තගීතාර්ථභාෂිණා ।
දේශකාලාභියුක්තේන යුක්තවාක්යාභිධායිනා ॥ 7 ॥
රතාභිරතසංසුප්තං දදර්ශ හරියූථපඃ ।
තාසාං මධ්යේ මහාබාහුඃ ශුශුභේ රාක්ෂසේශ්වරඃ ॥ 8 ॥
ගෝෂ්ඨේ මහති මුඛ්යානාං ගවාං මධ්යේ යථා වෘෂඃ ।
ස රාක්ෂසේංද්රඃ ශුශුභේ තාභිඃ පරිවෘතස්ස්වයම් ॥ 9 ॥
කරේණුභිර්යථාऽරණ්යේ පරිකීර්ණෝ මහාද්විපඃ ।
සර්වකාමෛරුපේතාං ච පානභූමිං මහාත්මනඃ ॥ 10 ॥
දදර්ශ හරිශාර්දූලස්තස්ය රක්ෂඃපතේර්ගෘහේ ।
මෘගාණාං මහිෂාණාං ච වරාහාණාං ච භාගශඃ ॥ 11 ॥
තත්ර න්යස්තානි මාංසානි පානභූමෞ දදර්ශ සඃ ।
රෞක්මේෂු ච විශාලේෂු භාජනේෂ්වර්ධභක්ෂිතාන් ॥ 12 ॥
දදර්ශ හරිශාර්දූලෝ මයූරාන් කුක්කුටාංස්තථා ।
වරාහවාර්ධ්රාණසකාන් දධිසෞවර්චලායුතාන් ॥ 13 ॥
ශල්යාන් මෘගමයූරාංශ්ච හනුමානන්වවෛක්ෂත ।
ක්රකරාන්විවිධාන් සිද්ධාංශ්චකෝරානර්ධභක්ෂිතාන් ॥ 14 ॥
මහිෂානේකශල්යාංශ්ච ඡාගාංශ්ච කෘතනිෂ්ඨිතාන් ।
ලේහ්යානුච්චාවචාන්පේයාන් භෝජ්යානි විවිධානි ච ॥ 15 ॥
තථාऽऽම්ලලවණෝත්තංසෛර්විවිධෛරාගෂාඩබෛඃ ।
හාරනූපුරකේයූරෛරපවිද්ධෛර්මහාධනෛඃ ॥ 16 ॥
පානභාජනවික්ෂිප්තෛඃ ඵලෛශ්ච විවිධෛරපි ।
කෘතපුෂ්පෝපහාරා භූරධිකං පුෂ්යති ශ්රියම් ॥ 17 ॥
තත්ර තත්ර ච වින්යස්තෛඃ සුශ්ලිෂ්ටෛශ්ශයනාසනෛඃ ।
පානභූමිර්විනා වහ්නිං ප්රදීප්තේවෝපලක්ෂ්යතේ ॥ 18 ॥
බහුප්රකාරෛර්විවිධෛර්වරසංස්කාරසංස්කෘතෛඃ ।
මාංසෛඃ කුශලසංපෘක්තෛඃ පානභූමිගතෛඃ පෘථක් ॥ 19 ॥
දිව්යාඃ ප්රසන්නා විවිධාඃ සුරාඃ කෘතසුරා අපි ।
ශර්කරාऽසවමාධ්වීකපුෂ්පාසවඵලාසවාඃ ॥ 20 ॥
වාසචූර්ණෛශ්ච විවිධෛර්මෘෂ්ටාස්තෛස්තෛඃ පෘථක් පෘථක් ।
සංතතා ශුශුභේ භූමිර්මාල්යෛශ්ච බහුසංස්ථිතෛඃ ॥ 21 ॥
හිරණ්මයෛශ්ච විවිධෛර්භාජනෛඃ ස්ඵාටිකෛරපි ।
ජාංබූනදමයෛශ්චාන්යෛඃ කරකෛරභිසංවෘතා ॥ 22 ॥
රාජතේෂු ච කුංභේෂු ජාංබූනදමයේෂු ච ।
පානශ්රේෂ්ඨං තදා භූරි කපිස්තත්ර දදර්ශ හ ॥ 23 ॥
සෝऽපශ්යච්ඡාතකුංභානි සීධෝර්මණිමයානි ච ।
රාජතානි ච පූර්ණානි භාජනානි මහාකපිඃ ॥ 24 ॥
ක්වචිදල්පාවශේෂාණි ක්වචිත්පීතානි සර්වශඃ ।
ක්වචින්නෛව ප්රපීතානි පානානි ස දදර්ශ හ ॥ 25 ॥
ක්වචිද් භක්ෂ්යාංශ්ච විවිධාන් ක්වචිත්පානානි භාගශඃ ।
ක්වචිදන්නාවශේෂාණි පශ්යන්වෛ විචචාර හ ॥ 26 ॥
ක්වචිත්ප්රභින්නෛඃ කරකෛඃ ක්වචිදාලෝලිතෛර්ඝටෛඃ ।
ක්වචිත්සංපෘක්තමාල්යානි ජලානි ච ඵලානි ච ॥ 27 ॥
ශයනාන්යත්ර නාරීණාං ශුභ්රාණි බහුධා පුනඃ ।
පරස්පරං සමාශ්ලිෂ්ය කාශ්චිත්සුප්තා වරාංගනාඃ ॥ 28 ॥
කාශ්චිච්ච වස්ත්රමන්යස්යාස්ස්වපංත්යාඃ පරිධාය ච ।
ආහෘත්ය චාබලාඃ සුප්තා නිද්රාබලපරාජිතාඃ ॥ 29 ॥
තාසාමුච්ඡවාසවාතේන වස්ත්රං මාල්යං ච ගාත්රජම් ।
නාත්යර්ථං ස්පංදතේ චිත්රං ප්රාප්ය මංදමිවානිලම් ॥ 30 ॥
චංදනස්ය ච ශීතස්ය ශීධෝර්මධුරසස්ය ච ।
විවිධස්ය ච මාල්යස්ය ධූපස්ය විවිධස්ය ච ॥ 31 ॥
බහුධා මාරුතස්තත්ර ගංධං විවිධමුද්වහන් ।
ස්නානානාං චංදනානාං ච ධූපානාං චෛව මූර්ඡිතඃ ॥ 32 ॥
ප්රවවෞ සුරභිර්ගංධෝ විමානේ පුෂ්පකේ තදා ।
ශ්යාමාවදාතාස්තත්රාන්යාඃ කාශ්චිත්කෘෂ්ණා වරාංගනාඃ ॥ 33 ॥
කාශ්චිත් කාංචනවර්ණාංග්යඃ ප්රමදා රාක්ෂසාලයේ ।
තාසාං නිද්රාවශත්වාච්ච මදනේන විමූර්ඡිතම් ॥ 34 ॥
පද්මිනීනාං ප්රසුප්තානාං රූපමාසීද්යථෛව හි ।
ඒවං සර්වමශේෂේණ රාවණාංතඃ පුරං කපිඃ ॥ 35 ॥
දදර්ශ සුමහාතේජාඃ න දදර්ශ ච ජානකීම් ।
නිරීක්ෂමාණශ්ච තදා තාඃ ස්ත්රියඃ ස මහාකපිඃ ॥ 36 ॥
ජගාම මහතීං චිංතාං ධර්මසාධ්වසශංකිතඃ ।
පරදාරාවරෝධස්ය ප්රසුප්තස්ය නිරීක්ෂණම් ॥ 37 ॥
ඉදං ඛලු මමාත්යර්ථං ධර්මලෝපං කරිෂ්යති ।
න හි මේ පරදාරාණාං දෘෂ්ටිර්විෂයවර්තිනී ॥ 38 ॥
අයං චාත්ර මයා දෘෂ්ටඃ පරදාරාපරිග්රහඃ ।
තස්ය ප්රාදුරභූච්චිංතා පුනරන්යා මනස්විනඃ ॥ 39 ॥
නිශ්චිතෛකාංතචිත්තස්ය කාර්යනිශ්චයදර්ශිනී ।
කාමං දෘෂ්ටා මයා සර්වා විශ්වස්තා රාවණස්ත්රියඃ ॥ 40 ॥
න හි මේ මනසඃ කිංචිද්වෛකෘත්යමුපජායතේ ।
මනෝ හි හේතුඃ සර්වේෂාමිංද්රියාණාං ප්රවර්තනේ ॥ 41 ॥
ශුභාශුභාස්වවස්ථාසු තච්ච මේ සුව්යවස්ථිතම් ।
නාන්යත්ර හි මයා ශක්යා වෛදේහී පරිමාර්ගිතුම් ॥ 42 ॥
ස්ත්රියෝ හි ස්ත්රීෂු දෘශ්යංතේ සදා සංපරිමාර්ගණේ ।
යස්ය සත්ත්වස්ය යා යෝනිස්තස්යාං තත්පරිමාර්ග්යතේ ।
න ශක්යා ප්රමදා නෂ්ටා මෘගීෂු පරිමාර්ගිතුම් ॥ 43 ॥
තදිදං මාර්ගිතං තාවච්ඡුද්ධේන මනසා මයා ॥ 44 ॥
රාවණාංතඃපුරං සර්වං දෘශ්යතේ න තු ජානකී ।
දේවගංධර්වකන්යාශ්ච නාගකන්යාශ්ච වීර්යවාන් ॥ 45 ॥
අවේක්ෂමාණෝ හනුමාන්නෛවාපශ්යත ජානකීම් ।
තාමපශ්යන්කපිස්තත්ර පශ්යඤ්ශ්චාන්යා පරස්ත්රියඃ ॥ 46 ॥
අපක්රම්ය තදා වීරඃ ප්රධ්යාතුමුපචක්රමේ ।
ස භූයස්තු පරං ශ්රීමාන් මාරුතිර්යත්නමාස්ථිතඃ ॥ 47 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකාදශස්සර්ගඃ ॥
