ශ්රීමද්වාල්මීකීය රාමායණේ සුංදරකාංඩම් ।
අථ ද්විතීයස්සර්ගඃ ।
ස සාගරමනාදෘෂ්යමතික්රම්ය මහාබලඃ ।
ත්රිකූටශිඛරේ ලංකාං ස්ථිතාං ස්වස්ථෝ දදර්ශ හ ॥ 1 ॥
තතඃ පාදපමුක්තේන පුෂ්පවර්ෂේණ වීර්යවාන් ।
අභිවෘෂ්ටඃ ස්ථිතස්තත්ර බභෞ පුෂ්පමයෝ යථා ॥ 2 ॥
යෝජනානාං ශතං ශ්රීමාංස්තීර්ත්වාප්යුත්තමවික්රමඃ ।
අනිඃශ්වසන් කපිස්තත්ර න ග්ලානිමධිගච්ඡති ॥ 3 ॥
ශතාන්යහං යෝජනානාං ක්රමේයං සුබහූන්යපි ।
කිං පුනඃ සාගරස්යාංතං සංඛ්යාතං ශතයෝජනම් ॥ 4 ॥
ස තු වීර්යවතාං ශ්රේෂ්ඨඃ ප්ලවතාමපි චෝත්තමඃ ।
ජගාම වේගවාන් ලංකාං ලංඝයිත්වා මහෝදධිම් ॥ 5 ॥
ශාද්වලානි ච නීලානි ගංධවංති වනානි ච ।
ගංඩවංති ච මධ්යේන ජගාම නගවංති ච ॥ 6 ॥
ශෛලාංශ්ච තරුසංඡන්නාන් වනාරාජීශ්ච පුෂ්පිතාඃ ।
අභිචක්රාම තේජස්වී හනුමාන් ප්ලවගර්ෂභඃ ॥ 7 ॥
ස තස්මින්නචලේ තිෂ්ඨන්වනාන්යුපවනානි ච ।
ස නගාග්රේ ච තාං ලංකාං දදර්ශ පවනාත්මජඃ ॥ 8 ॥
සරලාන් කර්ණිකාරාංශ්ච ඛර්ජූරාංශ්ච සුපුෂ්පිතාන් ।
ප්රියාලූන්මුචුලිංදාංශ්ච කුටජාන් කේතකානපි ॥ 9 ॥
ප්රියංංගූන් ගංධපූර්ණාංශ්ච නීපාන් සප්තච්ඡදාංස්තථා ।
ආසනාන් කෝවිදාරාංශ්ච කරවීරාංශ්ච පුෂ්පිතාන් ॥ 10 ॥
පුෂ්පභාරනිබද්ධාංශ්ච තථා මුකුලිතානපි ।
පාදපාන් විහගාකීර්ණාන් පවනාධූතමස්තකාන් ॥ 11 ॥
හංසකාරංඩවාකීර්ණා වාපීඃ පද්මෝත්මලායුතාඃ ।
ආක්රීඩාන් විවිධාන් රම්යාවන් විවිධාංශ්ච ජලාශයාන් ॥ 12 ॥
සංතතාන් විවිධෛර්වෘක්ෂෛඃ සර්වර්තුඵලපුෂ්පිතෛඃ ।
උද්යානානි ච රම්යාණි දදර්ශ කපිකුංජරඃ ॥ 13 ॥
සමාසාද්ය ච ලක්ෂ්මීවාන් ලංකාං රාවණපාලිතාම් ।
පරිඛාභිඃ සපද්මාභිඃ සෝත්පලාභිරලංකෘතාම් ॥ 14 ॥
සීතාපහරණාර්ථේන රාවණේන සුරක්ෂිතාම් ।
සමංතාද්විචරද්භිශ්ච රාක්ෂසෛරුග්රධන්විභිඃ ॥ 15 ॥
කාංචනේනාවෘතාං රම්යාං ප්රාකාරේණ මහාපුරීම් ।
ගෘහෛශ්ච ග්රහසංකාශෛඃ ශාරදාංබුදසන්නිභෛඃ ॥ 16 ॥
පාංඩුරාභිඃ ප්රතෝලීභිරුච්චාභිරභිසංවෘතාම් ।
අට්ටාලකශතාකීර්ණාං පතාකාධ්වජමාලිනීම් ॥ 17 ॥
තෝරණෛඃ කාංචනෛර්දිව්යෛර්ලතාපඞ්ත්කිවිචිත්රිතෛඃ ।
දදර්ශ හනුමාන් ලංකාං දිවි දේවපුරීං යථා ॥ 18 ॥
ගිරිමූර්ධ්නිං ස්ථිතාං ලංකාං පාංඩුරෛර්භවනෛඃ ශුභෛඃ ।
දදර්ශ ස කපිශ්රේෂ්ඨඃ පුරමාකාශගං යථා ॥ 19 ॥
පාලිතාං රාක්ෂසේංද්රේණ නිර්මිතාං විශ්වකර්මණා ।
ප්ලවමානමිවාකාශේ දදර්ශ හනුමාන් පුරීම් ॥ 20 ॥
වප්රප්රාකාරජඝනාං විපුලාංබුනවාංබරාම් ।
ශතඝ්නීශූලකේශාංතාමට්ටාලකවතංසකාම් ॥ 21 ॥
මනසේව කෘතාං ලංකාං නිර්මිතාං විශ්වකර්මණා ।
ද්වාරමුත්තරමාසාද්ය චිංතයාමාස වානරඃ ॥ 22 ॥
කෛලාසශිඛරප්රඛ්යාමාලිඛංතීමිවාංබරම් ।
ඩීයමානාමිවාකාශමුච්ඡ්රිතෛර්භවනෝත්තමෛඃ ॥ 23 ॥
සංපූර්ණාං රාක්ෂසෛර්ඝෝරෛර්නාගෛර්භෝගවතීමිව ।
අචිංත්යාං සුකෘතාං ස්පෂ්ටාං කුබේරාධ්යුෂිතාං පුරා ॥ 24 ॥
දංෂ්ට්රිභිර්බහුභිඃ ශූරෛඃ ශූලපට්ටසපාණිභිඃ ।
රක්ෂිතාං රාක්ෂසෛර්ඝෝරෛර්ගුහාමාශීවිෂෛරිව ॥ 25 ॥
තස්යාශ්ච මහතීං ගුප්තිං සාගරං ච නිරීක්ෂ්ය සඃ ।
රාවණං ච රිපුං ඝෝරං චිංතයාමාස වානරඃ ॥ 26 ॥
ආගත්යාපීහ හරයෝ භවිෂ්යංති නිරර්ථකාඃ ।
න හි යුද්ධේන වෛ ලංකා ශක්යා ජේතුං සුරෛරපි ॥ 27 ॥
ඉමාං තු විෂමාං දුර්ගාං ලංකාං රාවණපාලිතාම් ।
ප්රාප්යාපි ස මහාබාහුඃ කිං කරිෂ්යති රාඝවඃ ॥ 28 ॥
අවකාශෝ නසාංත්වස්ය රාක්ෂසේෂ්වභිගම්යතේ ।
න දානස්ය න භේදස්ය නෛව යුද්ධස්ය දෘශ්යතේ ॥ 29 ॥
චතුර්ණාමේව හි ගතිර්වානරාණාං මහාත්මනාම් ।
වාලිපුත්රස්ය නීලස්ය මම රාජ්ඤශ්ච ධීමතඃ ॥ 30 ॥
යාවජ්ජානාමි වෛදේහීං යදි ජීවති වා න වා ।
තත්රෛව චිංතයිෂ්යාමි දෘෂ්ට්වා තාං ජනකාත්මජාම් ॥ 31 ॥
තතඃ ස චිංතයාමාස මුහූර්තං කපිකුංජරඃ ।
ගිරිශෘංගේ ස්ථිතස්තස්මින් රාමස්යාභ්යුදයේ රතඃ ॥ 32 ॥
අනේන රූපේණ මයා න ශක්යා රක්ෂසාං පුරී ।
ප්රවේෂ්ටුං රාක්ෂසෛර්ගුප්තා ක්රූරෛර්බලසමන්විතෛඃ ॥ 33 ॥
උග්රෞජසෝ මහාවීර්යා බලවංතශ්ච රාක්ෂසාඃ ।
වංචනීයා මයා සර්වේ ජානකීං පරිමාර්ගතා ॥ 34 ॥
ලක්ෂ්යාලක්ෂ්යේණ රූපේණ රාත්රෞ ලංකා පුරී මයා ।
ප්රවේෂ්ටුං ප්රාප්තකාලං මේ කෘත්යං සාධයිතුං මහත් ॥ 35 ॥
තාං පුරීං තාදෘශීං දෘෂ්ට්වා දුරාධර්ෂාං සුරාසුරෛඃ ।
හනුමාන් චිංතයාමාස විනිශ්චිත්ය මුහුර්මුහුඃ ॥ 36 ॥
කේනෝපායේන පශ්යේයං මෛථිලීං ජනකාත්මජාම් ।
අදෘෂ්ටෝ රාක්ෂසේංද්රේණ රාවණේන දුරාත්මනා ॥ 37 ॥
න විනශ්යේත්කථං කාර්යං රාමස්ය විදිතාත්මනඃ ।
ඒකාමේකශ්ච වශ්යේයං රහිතේ ජනකාත්මජාම් ॥ 38 ॥
භූතාශ්චාර්ථා විපද්යංතේ දේශකාලවිරෝධිතාඃ ।
වික්ලබං දූතමාසාද්ය තමඃ සූර්යෝදයේ යථා ॥ 39 ॥
අර්ථානර්ථාංතරේ බුද්ධිර්නිශ්චිතාපි න ශෝභතේ ।
ඝාතයංති හි කාර්යාණි දූතාඃ පංඩිතමානිනඃ ॥ 40 ॥
න විනශ්යේත්කථං කාර්යං වෛක්ලබ්යං න කථං භවේත් ।
ලංඝනං ච සමුද්රස්ය කථං නු න වෘථා භවේත් ॥ 41 ॥
මයි දෘෂ්ටේ තු රක්ෂෝභී රාමස්ය විදිතාත්මනඃ ।
භවේද්ව්යර්ථමිදං කාර්යං රාවණානර්ථමිච්ඡතඃ ॥ 42 ॥
න හි ශක්යං ක්වචිත් ස්ථාතුමවිජ්ඤාතේන රාක්ෂසෛඃ ।
අපි රාක්ෂසරූපේණ කිමුතාන්යේන කේනචිත් ॥ 43 ॥
වායුරප්යත්ර නාජ්ඤාතශ්චරේදිති මතිර්මම ।
න හ්ය ස්ත්යවිදිතං කිංචිද්රාක්ෂසානාං බලීයසාම් ॥ 44 ॥
ඉහාහං යදි තිෂ්ඨාමි ස්වේන රූපේණ සංවෘතඃ ।
විනාශමුපයාස්යාමි භර්තුරර්ථශ්ච හීයතේ ॥ 45 ॥
තදහං ස්වේන රූපේණ රජන්යාං හ්රස්වතාං ගතඃ ।
ලංකාමභිපතිෂ්යාමි රාඝවස්යාර්ථසිද්ධයේ ॥ 46 ॥
රාවණස්ය පුරීං රාත්රෞ ප්රවිශ්ය සුදුරාසදාම් ।
විචින්වන් භවනං සර්වං ද්රක්ෂ්යාමි ජනකාත්මජාම් ॥ 47 ॥
ඉති සංචිංත්ය හනුමාන් සූර්යස්යාස්තමයං කපිඃ ।
ආචකාංක්ෂේ තදා වීරෝ වෛදේහ්යා දර්ශනෝත්සුකඃ ॥ 48 ॥
සූර්යේ චාස්තං ගතේ රාත්රෞ දේහං සංක්ෂිප්ය මාරුතිඃ ।
පෘෂදංශකමාත්රඃ සන් බභූවාද්භුතදර්ශනඃ ॥ 49 ॥
ප්රදෝෂකාලේ හනුමාංස්තූර්ණමුත්ප්ලුත්ය වීර්යවාන් ।
ප්රවිවේශ පුරීං රම්යාං සුවිභක්තමහාපථාම් ॥ 50 ॥
ප්රාසාදමාලාවිතතාං ස්තංභෛඃ කාංචනරාජතෛඃ ।
ශාතකුංභමයෛර්ජාලෛර්ගංථර්වනගරෝපමාම් ॥ 51 ॥
සප්තභෞමාෂ්ටභෞමෛශ්ච ස දදර්ශ මහාපුරීම් ।
තලෛඃ ස්ඵාටිකසංකීර්ණෛඃ කාර්තස්වරවිභූෂිතෛඃ ॥ 52 ॥
වෛඩූර්යමණිචිත්රෛශ්ච මුක්තාජාලවිභූෂිතෛඃ ।
තලෛඃ ශුශුභිරේ තානි භවනාන්යත්ර රක්ෂසාම් ॥ 53 ॥
කාංචනානි ච චිත්රාණි තෝරණානි ච රක්ෂසාම් ।
ලංකාමුද්යෝතයාමාසුඃ සර්වතඃ සමලංකෘතාම් ॥ 54 ॥
අචිංත්යාමද්භුතාකාරාං දෘෂ්ටවා ලංකාං මහාකපිඃ ।
ආසීද්විෂණ්ණෝ හෘෂ්ටශ්ච වෛදේහ්යා දර්ශනෝත්සුකඃ ॥ 55 ॥
ස පාංඩුරාවිද්ධවිමානමාලිනීං මහාර්හජාංබූනදජාලතෝරණාම් ।
යශස්විනීං රාවණබාහුපාලිතාං ක්ෂපාචරෛර්භීමබලෛඃ සමාවෘතාම් ॥ 56 ॥
චංද්රෝऽපි සාචිව්යමිවාස්ය කුර්වංස්තාරාගණෛර්මධ්යගතෝ විරාජන් ।
ජ්යෝත්ස්නාවිතානේන විතත්ය ලෝක මුත්තිෂ්ඨතේ නෛකසහස්රරශ්මිඃ ॥ 57 ॥
ශංඛප්රභං ක්ෂීරමෘණාලවර්ණ මුද්ගච්ඡමානං ව්යවභාසමානම් ।
දදර්ශ චංද්රං ස හරිප්රවීරඃ පෝප්ලූයමානං සරසීව හංසම් ॥ 58 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්විතීයස්සර්ගඃ ॥
