śrīmadvālmīkīya rāmāyaṇē sundarakāṇḍam ।
atha dvāviṃśassargaḥ ।
sītāyā vachanaṃ śrutvā paruṣaṃ rākṣasādhipaḥ ।
pratyuvācha tataḥ sītāṃ vipriyaṃ priyadarśanām ॥ 1 ॥
yathā yathā sāntvayitā vaśyaḥ strīṇāṃ tathā tathā ।
yathā yathā priyaṃ vaktā paribhūtastathā tathā ॥ 2 ॥
sanniyachChati mē krōdhaṃ tvayi kāmaḥ samutthitaḥ ।
dravatō'mārgamāsādya hayāniva susārathiḥ ॥ 3 ॥
vāmaḥ kāmō manuṣyāṇāṃ yasmin kila nibadhyatē ।
janē tasmiṃstvanukrōśaḥ snēhaścha kila jāyatē ॥ 4 ॥
ētasmātkāraṇānna tvāṃ ghātayāmi varānanē ।
vadhārhāmavamānārhāṃ mithyāpravrajitē ratām ॥ 5 ॥
paruṣāṇīha vākyāni yāni yāni bravīṣi mām ।
tēṣu tēṣu vadhō yuktastava maithili dāruṇaḥ ॥ 6 ॥
ēvamuktvā tu vaidēhīṃ rāvaṇō rākṣasādhipaḥ ।
krōdhasaṃrambhasaṃyuktaḥ sītāmuttaramabravīt ॥ 7 ॥
dvau māsau rakṣitavyau mē yō'vadhistē mayā kṛtaḥ ।
tataḥ śayanamārōha mama tvaṃ varavarṇini ॥ 8 ॥
ūrdhvaṃ dvābhyāṃ tu māsābhyāṃ bhartāraṃ māmanichChatīm ।
mama tvāṃ prātarāśārthamālabhantē mahānasē ॥ 9 ॥
tāṃ tarjyamānāṃ samprēkṣya rākṣasēndrēṇa jānakīm ।
dēvagandharvakanyāstā viṣēdurvikṛtēkṣaṇāḥ ॥ 10 ॥
ōṣṭhaprakārairaparā vaktranētraistathāparāḥ ।
sītāmāśvāsayāmāsustarjitāṃ tēna rakṣasā ॥ 11 ॥
tābhirāśvāsitā sītā rāvaṇaṃ rākṣasādhipam ।
uvāchātmahitaṃ vākyaṃ vṛttaśauṇḍīryagarvitam ॥ 12 ॥
nūnaṃ na tē janaḥ kaśchidasti niḥśrēyasē sthitaḥ ।
nivārayati yō na tvāṃ karmaṇō'smādvigarhitāt ॥ 13 ॥
māṃ hi dharmātmanaḥ patnīṃ śachīmiva śachīpatēḥ ।
tvadanyastriṣu lōkēṣu prārthayēnmanasāpi kaḥ ॥ 14 ॥
rākṣasādhama rāmasya bhāryāmamitatējasaḥ ।
uktavānasi yatpāpaṃ kva gatastasya mōkṣyasē ॥ 15 ॥
yathā dṛptaścha mātaṅgaḥ śaśaścha saddṛśō yudhi ।
tathā mātaṅgavadrāmastvaṃ nīchaḥ śaśavat smṛtaḥ ॥ 16 ॥
sa tvamikṣvākunāthaṃ vai kṣipanniha na lajjasē ।
chakṣuṣōrviṣayaṃ tasya na tāvadupagachChasi ॥ 17 ॥
imē tē nayanē krūrē virūpē kṛṣṇapiṅgalē ।
kṣitau na patitē kasmānmāmanārya nirīkṣitaḥ ॥ 18 ॥
tasya dharmātmanaḥ patnīṃ snuṣāṃ daśarathasya cha ।
kathaṃ vyāharatō māṃ tē na jihvā vyavaśīryatē ॥ 19 ॥
asandēśāttu rāmasya tapasaśchānupālanāt ।
na tvāṃ kurmi daśagrīva bhasma bharmārha tējasā ॥ 20 ॥
nāpahartumahaṃ śakyā tvayā rāmasya dhīmataḥ ।
vidhistava vadhārthāya vihitō nātra saṃśayaḥ ॥ 21 ॥
śūrēṇa dhanadabhrātrā balaiḥ samuditēna cha ।
apōhya rāmaṃ kasmāddhi dārachauryaṃ tvayā kṛtam ॥ 22 ॥
sītāyā vachanaṃ śrutvā rāvaṇō rākṣasādhipaḥ ।
vivṛtya nayanē krūrē jānakīmanvavaikṣata ॥ 23 ॥
nīlajīmūtasaṅkāśō mahābhujaśirōdharaḥ ।
siṃhasattvagatiḥ śrīmān dīpta jihvāgralōchanaḥ ॥ 24 ॥
chalāgramakuṭaprāṃśuśchitramālyānulēpanaḥ ।
raktamālyāmbaradhara tatsaṅgadavibhūṣaṇaḥ ॥ 25 ॥
śrōṇisūtrēṇa mahatā mēchakēna susaṃvṛtaḥ ।
amṛtōtpādanaddhēna bhujagēnēva mandaraḥ ॥ 26 ॥
tābhyāṃ sa paripūrṇābhyāṃ bhujābhyāṃ rākṣasēśvaraḥ ।
śuśubhē'chalasaṅkāśaḥ śṛṅgābhyāmiva mandaraḥ ॥ 27 ॥
taruṇādityavarṇābhyāṃ kuṇḍalābhyāṃ vibhūṣitaḥ ।
raktapallavapuṣpābhyāmaśōkābhyāmivāchalaḥ ॥ 28 ॥
sa kalpavṛkṣapratimō vasanta iva mūrtimān ।
śmaśānachaityapratimō bhūṣitō'pi bhayaṅkaraḥ ॥ 29 ॥
avēkṣamāṇō vaidēhīṃ kōpasaṃraktalōchanaḥ ।
uvācha rāvaṇaḥ sītāṃ bhujaṅga iva niḥśvasan ॥ 30 ॥
anayēnābhisampannamarthahīnamanuvratē ।
nāśayāmyahamadya tvāṃ sūryaḥ sandhyāmivaujasā ॥ 31 ॥
ityuktvā maithilīṃ rājā rāvaṇaḥ śatrurāvaṇaḥ ।
sandidēśa tataḥ sarvā rākṣasīrghōradarśanāḥ ॥ 32 ॥
ēkākṣīmēkakarṇāṃ cha karṇaprāvaraṇāṃ tathā ।
gōkarṇīṃ hastikarṇīṃ cha lambakarṇīmakarṇikām ॥ 33 ॥
hastipādyaśvapādyau cha gōpādīṃ pādachūlikām ।
ēkākṣīmēkapādīṃ cha pṛthupādīmapādikām ॥ 34 ॥
atimātraśirōgrīvāmatimātrakuchōdarīm ।
atimātrāsyanētrāṃ cha dīrghajihvāmajihvikām ॥ 35 ॥
anāsikāṃ siṃhamukhīṃ gōmukhīṃ sūkarīmukhīm ।
yathā madvaśagā sītā kṣipraṃ bhavati jānakī ॥ 36 ॥
tathā kuruta rākṣasyaḥ sarvāḥ kṣipraṃ samētya cha ।
pratilōmānulōmaiścha sāmadānādibhēdanaiḥ ॥ 37 ॥
āvarjayata vaidēhīṃ daṇḍasyōdyamanēna cha ।
iti pratisamādiśya rākṣasēndraḥ punaḥ punaḥ ॥ 38 ॥
kāmamanyuparītātmā jānakīṃ paryatarjayat ।
upagamya tataḥ śīghraṃ rākṣasī dhānyamālinī ॥ 39 ॥
pariṣvajya daśagrīvamidaṃ vachanamabravīt ।
mayā krīḍa mahārāja sītayā kiṃ tavānayā ॥ 40 ॥
vivarṇayā kṛpaṇayā mānuṣyā rākṣasēśvara ।
nūnamasyā mahārāja na divyān bhōgasattamān ॥ 41 ॥
vidadhātyamaraśrēṣṭhastava bāhubalārjitān ।
akāmāṃ kāmayānasya śarīramupatapyatē ॥ 42 ॥
ichChantīṃ kāmayānasya prītirbhavati śōbhanā ।
ēvamuktastu rākṣasyā samutkṣiptastatō balī ॥ 43 ॥
prahasanmēghasaṅkāśō rākṣasaḥ sa nyavartata ।
prasthitaḥ sa daśagrīvaḥ kampayanniva mēdinīm ॥ 44 ॥
jvaladbhāskaravarṇābhaṃ pravivēśa nivēśanam ।
dēvagandharvakanyāścha nāgakanyāścha sarvataḥ ॥ 45 ॥
parivārya daśagrīvaṃ viviśustaṃ gṛhōttamam ।
sa maithilīṃ dharmaparāmavasthitāṃ prapēpamānāṃ paribhartsya rāvaṇaḥ ।
vihāya sītāṃ madanēna mōhitaḥ svamēva vēśma pravivēśa bhāsvaram ॥ 46 ॥
ityārṣē śrīmadrāmāyaṇē vālmīkīya ādikāvyē sundarakāṇḍē dvāviṃśassargaḥ ॥
