ශ්රීමද්වාල්මීකීය රාමායණේ සුංදරකාංඩම් ।
අථ ද්වාවිංශස්සර්ගඃ ।
සීතායා වචනං ශ්රුත්වා පරුෂං රාක්ෂසාධිපඃ ।
ප්රත්යුවාච තතඃ සීතාං විප්රියං ප්රියදර්ශනාම් ॥ 1 ॥
යථා යථා සාංත්වයිතා වශ්යඃ ස්ත්රීණාං තථා තථා ।
යථා යථා ප්රියං වක්තා පරිභූතස්තථා තථා ॥ 2 ॥
සන්නියච්ඡති මේ ක්රෝධං ත්වයි කාමඃ සමුත්ථිතඃ ।
ද්රවතෝऽමාර්ගමාසාද්ය හයානිව සුසාරථිඃ ॥ 3 ॥
වාමඃ කාමෝ මනුෂ්යාණාං යස්මින් කිල නිබධ්යතේ ।
ජනේ තස්මිංස්ත්වනුක්රෝශඃ ස්නේහශ්ච කිල ජායතේ ॥ 4 ॥
ඒතස්මාත්කාරණාන්න ත්වාං ඝාතයාමි වරානනේ ।
වධාර්හාමවමානාර්හාං මිථ්යාප්රව්රජිතේ රතාම් ॥ 5 ॥
පරුෂාණීහ වාක්යානි යානි යානි බ්රවීෂි මාම් ।
තේෂු තේෂු වධෝ යුක්තස්තව මෛථිලි දාරුණඃ ॥ 6 ॥
ඒවමුක්ත්වා තු වෛදේහීං රාවණෝ රාක්ෂසාධිපඃ ।
ක්රෝධසංරංභසංයුක්තඃ සීතාමුත්තරමබ්රවීත් ॥ 7 ॥
ද්වෞ මාසෞ රක්ෂිතව්යෞ මේ යෝऽවධිස්තේ මයා කෘතඃ ।
තතඃ ශයනමාරෝහ මම ත්වං වරවර්ණිනි ॥ 8 ॥
ඌර්ධ්වං ද්වාභ්යාං තු මාසාභ්යාං භර්තාරං මාමනිච්ඡතීම් ।
මම ත්වාං ප්රාතරාශාර්ථමාලභංතේ මහානසේ ॥ 9 ॥
තාං තර්ජ්යමානාං සංප්රේක්ෂ්ය රාක්ෂසේංද්රේණ ජානකීම් ।
දේවගංධර්වකන්යාස්තා විෂේදුර්විකෘතේක්ෂණාඃ ॥ 10 ॥
ඕෂ්ඨප්රකාරෛරපරා වක්ත්රනේත්රෛස්තථාපරාඃ ।
සීතාමාශ්වාසයාමාසුස්තර්ජිතාං තේන රක්ෂසා ॥ 11 ॥
තාභිරාශ්වාසිතා සීතා රාවණං රාක්ෂසාධිපම් ।
උවාචාත්මහිතං වාක්යං වෘත්තශෞංඩීර්යගර්විතම් ॥ 12 ॥
නූනං න තේ ජනඃ කශ්චිදස්ති නිඃශ්රේයසේ ස්ථිතඃ ।
නිවාරයති යෝ න ත්වාං කර්මණෝऽස්මාද්විගර්හිතාත් ॥ 13 ॥
මාං හි ධර්මාත්මනඃ පත්නීං ශචීමිව ශචීපතේඃ ।
ත්වදන්යස්ත්රිෂු ලෝකේෂු ප්රාර්ථයේන්මනසාපි කඃ ॥ 14 ॥
රාක්ෂසාධම රාමස්ය භාර්යාමමිතතේජසඃ ।
උක්තවානසි යත්පාපං ක්ව ගතස්තස්ය මෝක්ෂ්යසේ ॥ 15 ॥
යථා දෘප්තශ්ච මාතංගඃ ශශශ්ච සද්දෘශෝ යුධි ।
තථා මාතංගවද්රාමස්ත්වං නීචඃ ශශවත් ස්මෘතඃ ॥ 16 ॥
ස ත්වමික්ෂ්වාකුනාථං වෛ ක්ෂිපන්නිහ න ලජ්ජසේ ।
චක්ෂුෂෝර්විෂයං තස්ය න තාවදුපගච්ඡසි ॥ 17 ॥
ඉමේ තේ නයනේ ක්රූරේ විරූපේ කෘෂ්ණපිංගලේ ।
ක්ෂිතෞ න පතිතේ කස්මාන්මාමනාර්ය නිරීක්ෂිතඃ ॥ 18 ॥
තස්ය ධර්මාත්මනඃ පත්නීං ස්නුෂාං දශරථස්ය ච ।
කථං ව්යාහරතෝ මාං තේ න ජිහ්වා ව්යවශීර්යතේ ॥ 19 ॥
අසංදේශාත්තු රාමස්ය තපසශ්චානුපාලනාත් ।
න ත්වාං කුර්මි දශග්රීව භස්ම භර්මාර්හ තේජසා ॥ 20 ॥
නාපහර්තුමහං ශක්යා ත්වයා රාමස්ය ධීමතඃ ।
විධිස්තව වධාර්ථාය විහිතෝ නාත්ර සංශයඃ ॥ 21 ॥
ශූරේණ ධනදභ්රාත්රා බලෛඃ සමුදිතේන ච ।
අපෝහ්ය රාමං කස්මාද්ධි දාරචෞර්යං ත්වයා කෘතම් ॥ 22 ॥
සීතායා වචනං ශ්රුත්වා රාවණෝ රාක්ෂසාධිපඃ ।
විවෘත්ය නයනේ ක්රූරේ ජානකීමන්වවෛක්ෂත ॥ 23 ॥
නීලජීමූතසංකාශෝ මහාභුජශිරෝධරඃ ।
සිංහසත්ත්වගතිඃ ශ්රීමාන් දීප්ත ජිහ්වාග්රලෝචනඃ ॥ 24 ॥
චලාග්රමකුටප්රාංශුශ්චිත්රමාල්යානුලේපනඃ ।
රක්තමාල්යාංබරධර තත්සංගදවිභූෂණඃ ॥ 25 ॥
ශ්රෝණිසූත්රේණ මහතා මේචකේන සුසංවෘතඃ ।
අමෘතෝත්පාදනද්ධේන භුජගේනේව මංදරඃ ॥ 26 ॥
තාභ්යාං ස පරිපූර්ණාභ්යාං භුජාභ්යාං රාක්ෂසේශ්වරඃ ।
ශුශුභේऽචලසංකාශඃ ශෘංගාභ්යාමිව මංදරඃ ॥ 27 ॥
තරුණාදිත්යවර්ණාභ්යාං කුංඩලාභ්යාං විභූෂිතඃ ।
රක්තපල්ලවපුෂ්පාභ්යාමශෝකාභ්යාමිවාචලඃ ॥ 28 ॥
ස කල්පවෘක්ෂප්රතිමෝ වසංත ඉව මූර්තිමාන් ।
ශ්මශානචෛත්යප්රතිමෝ භූෂිතෝऽපි භයංකරඃ ॥ 29 ॥
අවේක්ෂමාණෝ වෛදේහීං කෝපසංරක්තලෝචනඃ ।
උවාච රාවණඃ සීතාං භුජංග ඉව නිඃශ්වසන් ॥ 30 ॥
අනයේනාභිසංපන්නමර්ථහීනමනුව්රතේ ।
නාශයාම්යහමද්ය ත්වාං සූර්යඃ සංධ්යාමිවෞජසා ॥ 31 ॥
ඉත්යුක්ත්වා මෛථිලීං රාජා රාවණඃ ශත්රුරාවණඃ ।
සංදිදේශ තතඃ සර්වා රාක්ෂසීර්ඝෝරදර්ශනාඃ ॥ 32 ॥
ඒකාක්ෂීමේකකර්ණාං ච කර්ණප්රාවරණාං තථා ।
ගෝකර්ණීං හස්තිකර්ණීං ච ලංබකර්ණීමකර්ණිකාම් ॥ 33 ॥
හස්තිපාද්යශ්වපාද්යෞ ච ගෝපාදීං පාදචූලිකාම් ।
ඒකාක්ෂීමේකපාදීං ච පෘථුපාදීමපාදිකාම් ॥ 34 ॥
අතිමාත්රශිරෝග්රීවාමතිමාත්රකුචෝදරීම් ।
අතිමාත්රාස්යනේත්රාං ච දීර්ඝජිහ්වාමජිහ්විකාම් ॥ 35 ॥
අනාසිකාං සිංහමුඛීං ගෝමුඛීං සූකරීමුඛීම් ।
යථා මද්වශගා සීතා ක්ෂිප්රං භවති ජානකී ॥ 36 ॥
තථා කුරුත රාක්ෂස්යඃ සර්වාඃ ක්ෂිප්රං සමේත්ය ච ।
ප්රතිලෝමානුලෝමෛශ්ච සාමදානාදිභේදනෛඃ ॥ 37 ॥
ආවර්ජයත වෛදේහීං දංඩස්යෝද්යමනේන ච ।
ඉති ප්රතිසමාදිශ්ය රාක්ෂසේංද්රඃ පුනඃ පුනඃ ॥ 38 ॥
කාමමන්යුපරීතාත්මා ජානකීං පර්යතර්ජයත් ।
උපගම්ය තතඃ ශීඝ්රං රාක්ෂසී ධාන්යමාලිනී ॥ 39 ॥
පරිෂ්වජ්ය දශග්රීවමිදං වචනමබ්රවීත් ।
මයා ක්රීඩ මහාරාජ සීතයා කිං තවානයා ॥ 40 ॥
විවර්ණයා කෘපණයා මානුෂ්යා රාක්ෂසේශ්වර ।
නූනමස්යා මහාරාජ න දිව්යාන් භෝගසත්තමාන් ॥ 41 ॥
විදධාත්යමරශ්රේෂ්ඨස්තව බාහුබලාර්ජිතාන් ।
අකාමාං කාමයානස්ය ශරීරමුපතප්යතේ ॥ 42 ॥
ඉච්ඡංතීං කාමයානස්ය ප්රීතිර්භවති ශෝභනා ।
ඒවමුක්තස්තු රාක්ෂස්යා සමුත්ක්ෂිප්තස්තතෝ බලී ॥ 43 ॥
ප්රහසන්මේඝසංකාශෝ රාක්ෂසඃ ස න්යවර්තත ।
ප්රස්ථිතඃ ස දශග්රීවඃ කංපයන්නිව මේදිනීම් ॥ 44 ॥
ජ්වලද්භාස්කරවර්ණාභං ප්රවිවේශ නිවේශනම් ।
දේවගංධර්වකන්යාශ්ච නාගකන්යාශ්ච සර්වතඃ ॥ 45 ॥
පරිවාර්ය දශග්රීවං විවිශුස්තං ගෘහෝත්තමම් ।
ස මෛථිලීං ධර්මපරාමවස්ථිතාං ප්රපේපමානාං පරිභර්ත්ස්ය රාවණඃ ।
විහාය සීතාං මදනේන මෝහිතඃ ස්වමේව වේශ්ම ප්රවිවේශ භාස්වරම් ॥ 46 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්වාවිංශස්සර්ගඃ ॥
