ஶ்ரீமத்³வால்மீகீய ராமாயணே ஸுந்த³ரகாண்ட³ம் ।
அத² த்³வாவிம்ஶஸ்ஸர்க:³ ।
ஸீதாயா வசனம் ஶ்ருத்வா பருஷம் ராக்ஷஸாதி⁴ப: ।
ப்ரத்யுவாச தத: ஸீதாம் விப்ரியம் ப்ரியத³ர்ஶனாம் ॥ 1 ॥
யதா² யதா² ஸாந்த்வயிதா வஶ்ய: ஸ்த்ரீணாம் ததா² ததா² ।
யதா² யதா² ப்ரியம் வக்தா பரிபூ⁴தஸ்ததா² ததா² ॥ 2 ॥
ஸன்னியச்ச²தி மே க்ரோத⁴ம் த்வயி காம: ஸமுத்தி²த: ।
த்³ரவதோமார்க³மாஸாத்³ய ஹயானிவ ஸுஸாரதி²: ॥ 3 ॥
வாம: காமோ மனுஷ்யாணாம் யஸ்மின் கில நிப³த்⁴யதே ।
ஜனே தஸ்மிம்ஸ்த்வனுக்ரோஶ: ஸ்னேஹஶ்ச கில ஜாயதே ॥ 4 ॥
ஏதஸ்மாத்காரணான்ன த்வாம் கா⁴தயாமி வரானநே ।
வதா⁴ர்ஹாமவமானார்ஹாம் மித்²யாப்ரவ்ரஜிதே ரதாம் ॥ 5 ॥
பருஷாணீஹ வாக்யானி யானி யானி ப்³ரவீஷி மாம் ।
தேஷு தேஷு வதோ⁴ யுக்தஸ்தவ மைதி²லி தா³ருண: ॥ 6 ॥
ஏவமுக்த்வா து வைதே³ஹீம் ராவணோ ராக்ஷஸாதி⁴ப: ।
க்ரோத⁴ஸம்ரம்ப⁴ஸம்யுக்த: ஸீதாமுத்தரமப்³ரவீத் ॥ 7 ॥
த்³வௌ மாஸௌ ரக்ஷிதவ்யௌ மே யோவதி⁴ஸ்தே மயா க்ருத: ।
தத: ஶயனமாரோஹ மம த்வம் வரவர்ணினி ॥ 8 ॥
ஊர்த்⁴வம் த்³வாப்⁴யாம் து மாஸாப்⁴யாம் ப⁴ர்தாரம் மாமனிச்ச²தீம் ।
மம த்வாம் ப்ராதராஶார்த²மாலப⁴ந்தே மஹானஸே ॥ 9 ॥
தாம் தர்ஜ்யமானாம் ஸம்ப்ரேக்ஷ்ய ராக்ஷஸேந்த்³ரேண ஜானகீம் ।
தே³வக³ந்த⁴ர்வகன்யாஸ்தா விஷேது³ர்விக்ருதேக்ஷணா: ॥ 1௦ ॥
ஓஷ்ட²ப்ரகாரைரபரா வக்த்ரனேத்ரைஸ்ததா²பரா: ।
ஸீதாமாஶ்வாஸயாமாஸுஸ்தர்ஜிதாம் தேன ரக்ஷஸா ॥ 11 ॥
தாபி⁴ராஶ்வாஸிதா ஸீதா ராவணம் ராக்ஷஸாதி⁴பம் ।
உவாசாத்மஹிதம் வாக்யம் வ்ருத்தஶௌண்டீ³ர்யக³ர்விதம் ॥ 12 ॥
நூனம் ந தே ஜன: கஶ்சித³ஸ்தி நி:ஶ்ரேயஸே ஸ்தி²த: ।
நிவாரயதி யோ ந த்வாம் கர்மணோஸ்மாத்³விக³ர்ஹிதாத் ॥ 13 ॥
மாம் ஹி த⁴ர்மாத்மன: பத்னீம் ஶசீமிவ ஶசீபதே: ।
த்வத³ன்யஸ்த்ரிஷு லோகேஷு ப்ரார்த²யேன்மனஸாபி க: ॥ 14 ॥
ராக்ஷஸாத⁴ம ராமஸ்ய பா⁴ர்யாமமிததேஜஸ: ।
உக்தவானஸி யத்பாபம் க்வ க³தஸ்தஸ்ய மோக்ஷ்யஸே ॥ 15 ॥
யதா² த்³ருப்தஶ்ச மாதங்க:³ ஶஶஶ்ச ஸத்³த்³ருஶோ யுதி⁴ ।
ததா² மாதங்க³வத்³ராமஸ்த்வம் நீச: ஶஶவத் ஸ்ம்ருத: ॥ 16 ॥
ஸ த்வமிக்ஷ்வாகுனாத²ம் வை க்ஷிபன்னிஹ ந லஜ்ஜஸே ।
சக்ஷுஷோர்விஷயம் தஸ்ய ந தாவது³பக³ச்ச²ஸி ॥ 17 ॥
இமே தே நயனே க்ரூரே விரூபே க்ருஷ்ணபிங்க³லே ।
க்ஷிதௌ ந பதிதே கஸ்மான்மாமனார்ய நிரீக்ஷித: ॥ 18 ॥
தஸ்ய த⁴ர்மாத்மன: பத்னீம் ஸ்னுஷாம் த³ஶரத²ஸ்ய ச ।
கத²ம் வ்யாஹரதோ மாம் தே ந ஜிஹ்வா வ்யவஶீர்யதே ॥ 19 ॥
அஸந்தே³ஶாத்து ராமஸ்ய தபஸஶ்சானுபாலனாத் ।
ந த்வாம் குர்மி த³ஶக்³ரீவ ப⁴ஸ்ம ப⁴ர்மார்ஹ தேஜஸா ॥ 2௦ ॥
நாபஹர்துமஹம் ஶக்யா த்வயா ராமஸ்ய தீ⁴மத: ।
விதி⁴ஸ்தவ வதா⁴ர்தா²ய விஹிதோ நாத்ர ஸம்ஶய: ॥ 21 ॥
ஶூரேண த⁴னத³ப்⁴ராத்ரா ப³லை: ஸமுதி³தேன ச ।
அபோஹ்ய ராமம் கஸ்மாத்³தி⁴ தா³ரசௌர்யம் த்வயா க்ருதம் ॥ 22 ॥
ஸீதாயா வசனம் ஶ்ருத்வா ராவணோ ராக்ஷஸாதி⁴ப: ।
விவ்ருத்ய நயனே க்ரூரே ஜானகீமன்வவைக்ஷத ॥ 23 ॥
நீலஜீமூதஸங்காஶோ மஹாபு⁴ஜஶிரோத⁴ர: ।
ஸிம்ஹஸத்த்வக³தி: ஶ்ரீமான் தீ³ப்த ஜிஹ்வாக்³ரலோசன: ॥ 24 ॥
சலாக்³ரமகுடப்ராம்ஶுஶ்சித்ரமால்யானுலேபன: ।
ரக்தமால்யாம்ப³ரத⁴ர தத்ஸங்க³த³விபூ⁴ஷண: ॥ 25 ॥
ஶ்ரோணிஸூத்ரேண மஹதா மேசகேன ஸுஸம்வ்ருத: ।
அம்ருதோத்பாத³னத்³தே⁴ன பு⁴ஜகே³னேவ மந்த³ர: ॥ 26 ॥
தாப்⁴யாம் ஸ பரிபூர்ணாப்⁴யாம் பு⁴ஜாப்⁴யாம் ராக்ஷஸேஶ்வர: ।
ஶுஶுபே⁴சலஸங்காஶ: ஶ்ருங்கா³ப்⁴யாமிவ மந்த³ர: ॥ 27 ॥
தருணாதி³த்யவர்ணாப்⁴யாம் குண்ட³லாப்⁴யாம் விபூ⁴ஷித: ।
ரக்தபல்லவபுஷ்பாப்⁴யாமஶோகாப்⁴யாமிவாசல: ॥ 28 ॥
ஸ கல்பவ்ருக்ஷப்ரதிமோ வஸந்த இவ மூர்திமான் ।
ஶ்மஶானசைத்யப்ரதிமோ பூ⁴ஷிதோபி ப⁴யங்கர: ॥ 29 ॥
அவேக்ஷமாணோ வைதே³ஹீம் கோபஸம்ரக்தலோசன: ।
உவாச ராவண: ஸீதாம் பு⁴ஜங்க³ இவ நி:ஶ்வஸன் ॥ 3௦ ॥
அனயேனாபி⁴ஸம்பன்னமர்த²ஹீனமனுவ்ரதே ।
நாஶயாம்யஹமத்³ய த்வாம் ஸூர்ய: ஸந்த்⁴யாமிவௌஜஸா ॥ 31 ॥
இத்யுக்த்வா மைதி²லீம் ராஜா ராவண: ஶத்ருராவண: ।
ஸந்தி³தே³ஶ தத: ஸர்வா ராக்ஷஸீர்கோ⁴ரத³ர்ஶனா: ॥ 32 ॥
ஏகாக்ஷீமேககர்ணாம் ச கர்ணப்ராவரணாம் ததா² ।
கோ³கர்ணீம் ஹஸ்திகர்ணீம் ச லம்ப³கர்ணீமகர்ணிகாம் ॥ 33 ॥
ஹஸ்திபாத்³யஶ்வபாத்³யௌ ச கோ³பாதீ³ம் பாத³சூலிகாம் ।
ஏகாக்ஷீமேகபாதீ³ம் ச ப்ருது²பாதீ³மபாதி³காம் ॥ 34 ॥
அதிமாத்ரஶிரோக்³ரீவாமதிமாத்ரகுசோத³ரீம் ।
அதிமாத்ராஸ்யனேத்ராம் ச தீ³ர்கஜ⁴ிஹ்வாமஜிஹ்விகாம் ॥ 35 ॥
அனாஸிகாம் ஸிம்ஹமுகீ²ம் கோ³முகீ²ம் ஸூகரீமுகீ²ம் ।
யதா² மத்³வஶகா³ ஸீதா க்ஷிப்ரம் ப⁴வதி ஜானகீ ॥ 36 ॥
ததா² குருத ராக்ஷஸ்ய: ஸர்வா: க்ஷிப்ரம் ஸமேத்ய ச ।
ப்ரதிலோமானுலோமைஶ்ச ஸாமதா³னாதி³பே⁴த³னை: ॥ 37 ॥
ஆவர்ஜயத வைதே³ஹீம் த³ண்ட³ஸ்யோத்³யமனேன ச ।
இதி ப்ரதிஸமாதி³ஶ்ய ராக்ஷஸேந்த்³ர: புன: புன: ॥ 38 ॥
காமமன்யுபரீதாத்மா ஜானகீம் பர்யதர்ஜயத் ।
உபக³ம்ய தத: ஶீக்⁴ரம் ராக்ஷஸீ தா⁴ன்யமாலினீ ॥ 39 ॥
பரிஷ்வஜ்ய த³ஶக்³ரீவமித³ம் வசனமப்³ரவீத் ।
மயா க்ரீட³ மஹாராஜ ஸீதயா கிம் தவானயா ॥ 4௦ ॥
விவர்ணயா க்ருபணயா மானுஷ்யா ராக்ஷஸேஶ்வர ।
நூனமஸ்யா மஹாராஜ ந தி³வ்யான் போ⁴க³ஸத்தமான் ॥ 41 ॥
வித³தா⁴த்யமரஶ்ரேஷ்ட²ஸ்தவ பா³ஹுப³லார்ஜிதான் ।
அகாமாம் காமயானஸ்ய ஶரீரமுபதப்யதே ॥ 42 ॥
இச்ச²ந்தீம் காமயானஸ்ய ப்ரீதிர்ப⁴வதி ஶோப⁴னா ।
ஏவமுக்தஸ்து ராக்ஷஸ்யா ஸமுத்க்ஷிப்தஸ்ததோ ப³லீ ॥ 43 ॥
ப்ரஹஸன்மேக⁴ஸங்காஶோ ராக்ஷஸ: ஸ ந்யவர்தத ।
ப்ரஸ்தி²த: ஸ த³ஶக்³ரீவ: கம்பயன்னிவ மேதி³னீம் ॥ 44 ॥
ஜ்வலத்³பா⁴ஸ்கரவர்ணாப⁴ம் ப்ரவிவேஶ நிவேஶனம் ।
தே³வக³ந்த⁴ர்வகன்யாஶ்ச நாக³கன்யாஶ்ச ஸர்வத: ॥ 45 ॥
பரிவார்ய த³ஶக்³ரீவம் விவிஶுஸ்தம் க்³ருஹோத்தமம் ।
ஸ மைதி²லீம் த⁴ர்மபராமவஸ்தி²தாம் ப்ரபேபமானாம் பரிப⁴ர்த்ஸ்ய ராவண: ।
விஹாய ஸீதாம் மத³னேன மோஹித: ஸ்வமேவ வேஶ்ம ப்ரவிவேஶ பா⁴ஸ்வரம் ॥ 46 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே ஸுந்த³ரகாண்டே³ த்³வாவிம்ஶஸ்ஸர்க:³ ॥
