ශ්රීමද්වාල්මීකීය රාමායණේ සුංදරකාංඩම් ।
අථ චතුර්විංශස්සර්ගඃ ।
තතඃ සීතාමුපාගම්ය රාක්ෂස්යෝ විකෘතානනාඃ ।
පරුෂං පරුෂා නාර්ය ඌචුස්තාං වාක්යමප්රියම් ॥ 1 ॥
කිං ත්වමංතඃපුරේ සීතේ සර්වභූතමනෝහරේ ।
මහාර්හශයනෝපේතේ න වාසමනුමන්යසේ ॥ 2 ॥
මානුෂී මානුෂස්යෛව භාර්යාත්වං බහුමන්යසේ ।
ප්රත්යාහර මනෝ රාමාන්න ත්වං ජාතු භවිෂ්යසි ॥ 3 ॥
ත්රෛලෝක්යවසුභෝක්තාරං රාවණං රාක්ෂසේශ්වරම් ।
භර්තාරමුපසංගම්ය විහරස්ව යථාසුඛම් ॥ 4 ॥
මානුෂී මානුෂං තං තු රාමමිච්ඡසි ශෝභනේ ।
රාජ්යාද්භ්ර්රෂ්ටමසිද්ධාර්ථං වික්ලබං ත්වමනිංදිතේ ॥ 5 ॥
රාක්ෂසීනාං වචඃ ශ්රුත්වා සීතා පද්මනිභේක්ෂණා ।
නේත්රාභ්යාමශ්රුපූර්ණාභ්යාමිදං වචනමබ්රවීත් ॥ 6 ॥
යදිදං ලෝකවිද්විෂ්ටමුදාහරථ සංගතාඃ ।
නෛතන්මනසි වාක්යං මේ කිල්බිෂං ප්රතිභාති වඃ ॥ 7 ॥
න මානුෂී රාක්ෂසස්ය භාර්යා භවිතුමර්හති ।
කාමං ඛාදත මාං සර්වා න කරිෂ්යාමි වෝ වචඃ ॥ 8 ॥
දීනෝ වා රාජ්යහීනෝ වා යෝ මේ භර්තා ස මේ ගුරුඃ ।
තං නිත්යමනුරක්තාස්මි යථා සූර්යං සුවර්චලා ॥ 9 ॥
යථා ශචී මහාභාගා ශක්රං සමුපතිෂ්ඨති ।
අරුංධතී වසිෂ්ඨං ච රෝහිණී ශශිනං යථා ॥ 10 ॥
ලෝපාමුද්රා යථාගස්ත්යං සුකන්යා ච්යවනං යථා ।
සාවිත්රී සත්යවංතං ච කපිලං ශ්රීමතී යථා ॥ 11 ॥
සෞදාසං මදයංතීව කේශිනී සගරං යථා ।
නෛෂධං දමයංතීව භෛමී පතිමනුව්රතා ॥ 12 ॥
තථාऽහමික්ෂ්වාකුවරං රාමං පතිමනුව්රතා ।
සීතායා වචනං ශ්රුත්වා රාක්ෂස්යඃ ක්රෝධමූර්ඡිතාඃ ॥ 13 ॥
භර්ත්සයංති ස්ම පරුෂෛර්වාක්යෛ රාවණචෝදිතාඃ ।
අවලීනඃ ස නිර්වාක්යෝ හනූමාන් ශිංශුපාද්රුමේ ॥ 14 ॥
යසීතාං සංතර්ජයංතීස්තා රාක්ෂසීරශෘණෝත් කපිඃ ।
තාමභික්රම්ය සංකෘද්ධා වේපමානාං සමංතතඃ ॥ 15 ॥
භෘශං සංලිලිහුර්දීප්තාන් ප්රලංබාන් දශනච්ඡදාන් ।
ඌචුශ්ච පරමක්රුද්ධාඃ ප්රගෘහ්යාශු පරශ්වධාන් ॥ 16 ॥
නේයමර්හති භර්තාරං රාවණං රාක්ෂසාධිපම් ।
සා භර්ත්ස්යමානා භීමාභී රාක්ෂසීභිර්වරානනා ॥ 17 ॥
සබාෂ්පමප සර්පංතී ශිංශුපාං තාමුපාගමත් ।
තතස්තාං ශිංශුපාං සීතා රාක්ෂසීභිඃ සමාවෘතා ॥ 18 ॥
අභිගම්ය විශාලාක්ෂී තස්ථෞ ශෝකපරිප්ලුතා ।
තාං කෘශාං දීනවදනාං මලිනාංබරධාරිණීම් ॥ 19 ॥
භර්ත්සයාංචක්රිරේ සීතාං රාක්ෂස්යස්තාං සමංතතඃ ।
තතස්තාං විනතා නාම රාක්ෂසී භීමදර්ශනා ॥ 20 ॥
අබ්රවීත්කුපිතාකාරා කරාලා නිර්ණතෝදරී ।
සීතේ පර්යාප්තමේතාවද්භර්තුඃ ස්නේහෝ නිදර්ශිතඃ ॥ 21 ॥
සර්වාත්රාතිකෘතං භද්රේ ව්යසනායෝපකල්පතේ පරිතුෂ්ටාස්මි භද්රං තේ මානුෂස්තේ කෘතෝ විධිඃ ॥ 22 ॥
මමාපි තු වචඃ පථ්යං බ්රුවංත්යාඃ කුරු මෛථිලි ।
රාවණං භජ භර්තාරං භර්තාරං සර්වරක්ෂසාම් ॥ 23 ॥
වික්රාංතං රූපවංතං ච සුරේශමිව වාසවම් ।
දක්ෂිණං ත්යාගශීලං ච සර්වස්ය ප්රියදර්ශනම් ॥ 24 ॥
මානුෂං කෘපණං රාමං ත්යක්ත්වා, රාවණමාශ්රය ।
දිව්යාංගරාගා වෛදේහි දිව්යාභරණභූෂිතා ॥ 25 ॥
අද්යප්රභෘති සර්වේෂාං ලෝකානාමීශ්වරී භව ।
අග්නේඃ ස්වාහා යථා දේවී ශචී වේංද්රස්ය ශෝභනේ ॥ 26 ॥
කිං තේ රාමේණ වෛදේහි කෘපණේන ගතායුෂා ।
ඒතදුක්තං ච මේ වාක්යං යදි ත්වං න කරිෂ්යසි ॥ 27 ॥
අස්මින්මුහූර්තේ සර්වාස්ත්වාං භක්ෂයිෂ්යාමහේ වයම් ।
අන්යා තු විකටා නාම ලංබමානපයෝධරා ॥ 28 ॥
අබ්රවීත්කුපිතා සීතාං මුෂ්ටිමුද්යම්ය ගර්ජතී ।
බහූන්යප්රියරූපාණි වචනානි සුදුර්මතේ ॥ 29 ॥
අනුක්රෝශාන්මෘදුත්වාච්ච සෝඪානි තව මෛථිලි ।
න ච නඃ කුරුෂේ වාක්යං හිතං කාලපුරස්කෘතම් ॥ 30 ॥
ආනීතාසි සමුද්රස්ය පාරමන්යෛර්දුරාසදම් ।
රාවණාංතඃපුරං ඝෝරං ප්රවිෂ්ටා චාසි මෛථිලි ॥ 31 ॥
රාවණස්ය ගෘහේ රුද්ධාමස්මාභිස්තු සුරක්ෂිතාම් ।
න ත්වාං ශක්තඃ පරිත්රාතුමපි සාක්ෂාත්පුරංදරඃ ॥ 32 ॥
කුරුෂ්ව හිතවාදින්යා වචනං මම මෛථිලි ।
අලමශ්රුප්රපාතේන ත්යජ ශෝකමනර්ථකම් ॥ 33 ॥
භජ ප්රීතිං ච හර්ෂං ච ත්යජෛතාං නිත්යදෛන්යතාම් ।
සීතේ රාක්ෂසරාජේන සහ ක්රීඩ යථාසුඛම් ॥ 34 ॥
ජානාසි හි යථා භීරු ස්ත්රීණාං යෞවනමධ්රුවම් ।
යාවන්න තේ ව්යතික්රාමේත්තාවත්සුඛමවාප්නුහි ॥ 35 ॥
උද්යානානි ච රම්යාණි පර්වතෝපවනානි ච ।
සහ රාක්ෂසරාජේන චර ත්වං මදිරේක්ෂණේ ॥ 36 ॥
ස්ත්රී සහස්රාණි තේ සප්ත වශේ ස්ථාස්යංති සුංදරි ।
රාවණං භජ භර්තාරං භර්තාරං සර්වරක්ෂසාම් ॥ 37 ॥
උත්පාට්ය වා තේ හෘදයං භක්ෂයිෂ්යාමි මෛථිලි ।
යදි මේ ව්යාහෘතං වාක්යං න යථාවත්කරිෂ්යසි ॥ 38 ॥
තතශ්චංඩෝදරී නාම රාක්ෂසී ක්රෝධමූර්ඡිතා ।
භ්රාමයංතී මහච්ඡූලමිදං වචනමබ්රවීත් ॥ 39 ॥
ඉමාං හරිණලෝලාක්ෂීං ත්රාසෝත්කංපිපයෝධරාම් ।
රාවණේන හෘතාං දෘෂ්ටවා දෞහෘදෝ මේ මහානභූත් ॥ 40 ॥
යකෘත්ප්ලීහමථෝත්පීඩං හෘදයං ච සබංධනම් ।
ආංත්රාණ්යපි තථා ශීර්ෂං ඛාදේයමිති මේ මතිඃ ॥ 41 ॥
තතස්තු ප්රඝසා නාම රාක්ෂසී වාක්යමබ්රවීත් ।
කංඨමස්යා නෘශංසායාඃ පීඩයාම කිමාස්යතේ ॥ 42 ॥
නිවේද්යතාං තතෝ රාජ්ඤේ මානුෂී සා මෘතේති හ ।
නාත්ර කශ්චන සංදේහඃ ඛාදතේති ස වක්ෂ්යති ॥ 43 ॥
තතස්ත්වජාමුඛී නාම රාක්ෂසී වාක්යමබ්රවීත් ।
විශස්යේමාං තතඃ සර්වාඃ සමාන් කුරුත පිංඩකාන් ॥ 44 ॥
විභජාම තතඃ සර්වා විවාදෝ මේ න රෝචතේ ।
පේයමානීයතාං ක්ෂිප්රං ලේහ්යමුච්චාවචං බහු ॥ 45 ॥
තතඃ ශූර්පණඛා නාම රාක්ෂසී වාක්යමබ්රවීත් ।
අජාමුඛ්යා යදුක්තං හි තදේව මම රෝචතේ ॥ 46 ॥
සුරා චානීයතාං ක්ෂිප්රං සර්වශෝකවිනාශිනී ।
මානුෂං මාංසමාස්වාද්ය නෘත්යාමෝऽථ නිකුංභිලාම් ॥ 47 ॥
ඒවං සංභර්ත්ස්යමානා සා සීතා සුරසුතෝපමා ।
රාක්ෂසීභිඃ සුඝෝරාභිර්දෛර්යමුත්සෘජ්ය රෝදිති ॥ 48 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ චතුර්විංශස්සර්ගඃ ॥
