ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଏକୋନତ୍ରିଂଶସ୍ସର୍ଗଃ ।
ତଥାଗତାଂ ତାଂ ଵ୍ୟଥିତାମନିଂଦିତାଂ ଵ୍ୟପେତହର୍ଷାଂ ପରିଦୀନମାନସାମ୍ ।
ଶୁଭାଂ ନିମିତ୍ତାନି ଶୁଭାନି ଭେଜିରେ ନରଂ ଶ୍ରିୟା ଜୁଷ୍ଟମିଵୋପଜୀଵିନଃ ॥ 1 ॥
ତସ୍ୟାଃ ଶୁଭଂ ଵାମମରାଲପକ୍ଷ୍ମ ରାଜୀଵୃତଂ କୃଷ୍ଣଵିଶାଲଶୁକ୍ଲମ୍ ।
ପ୍ରାସ୍ପଂଦତୈକଂ ନୟନଂ ସୁକେଶ୍ୟା ମୀନାହତଂ ପଦ୍ମମିଵାଭିତାମ୍ରମ୍ ॥ 2 ॥
ଭୁଜଶ୍ଚ ଚାର୍ଵଂଚିତପୀନଵୃତ୍ତଃ ପରାର୍ଥ୍ୟକାଲାଗରୁଚଂଦନାର୍ହଃ ।
ଅନୁତ୍ତମେନାଧ୍ୟୁଷିତଃ ପ୍ରିୟେଣ ଚିରେଣ ଵାମଃ ସମଵେପତାଽଶୁ ॥ 3 ॥
ଗଜେଂଦ୍ରହସ୍ତପ୍ରତିମଶ୍ଚ ପୀନ ସ୍ତୟୋର୍ଦ୍ଵୟୋଃ ସମ୍ହତୟୋଃ ସୁଜାତଃ ।
ପ୍ରସ୍ପଂଦମାନଃ ପୁନରୂରୁରସ୍ୟା ରାମଂ ପୁରସ୍ତାତ୍ ସ୍ଥିତମାଚଚକ୍ଷେ ॥ 4 ॥
ଶୁଭଂ ପୁନର୍ହେମସମାନଵର୍ଣ ମୀଷଦ୍ରଜୋଧ୍ଵସ୍ତମିଵାମଲାକ୍ଷ୍ୟାଃ ।
ଵାସ ସ୍ସ୍ଥିତାୟା ଶ୍ଶିଖରାଗ୍ରଦଂତ୍ୟାଃ କିଂଚିତ୍ପରିସ୍ରଂସତ ଚାରୁଗାତ୍ୟ୍ରାଃ ॥ 5 ॥
ଏତୈର୍ନିମିତ୍ତୈରପରୈଶ୍ଚ ସୁଭ୍ରୂଃ ସଂବୋଧିତା ପ୍ରାଗପି ସାଧୁ ସିଦ୍ଧୈଃ ।
ଵାତାତପକ୍ଲାଂତମିଵ ପ୍ରଣଷ୍ଟଂ ଵର୍ଷେଣ ବୀଜଂ ପ୍ରତିସଂଜହର୍ଷ ॥ 6 ॥
ତସ୍ୟାଃ ପୁନର୍ବିଂବଫଲାଧରୋଷ୍ଠଂ ସ୍ଵକ୍ଷିଭ୍ରୁକେଶାଂତମରାଲପକ୍ଷ୍ମ ।
ଵକ୍ତ୍ରଂ ବଭାସେ ସିତଶୁକ୍ଲଦଂଷ୍ଟ୍ରଂ ରାହୋର୍ମୁଖାଚ୍ଚଂଦ୍ର ଇଵ ପ୍ରମୁକ୍ତଃ ॥ 7 ॥
ସା ଵୀତଶୋକା ଵ୍ୟପନୀତତଂଦ୍ରୀ ଶାଂତଜ୍ଵରା ହର୍ଷଵିବୁଦ୍ଧସତ୍ତ୍ଵା ।
ଅଶୋଭତାର୍ୟା ଵଦନେନ ଶୁକ୍ଲେ ଶୀତାଂଶୁନା ରାତ୍ରିରିଵୋଦିତେନ ॥ 8 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଏକୋନତ୍ରିଂଶସ୍ସର୍ଗଃ ॥
