શ્રીમદ્વાલ્મીકીય રામાયણે સુંદરકાંડમ્ ।
અથ એકોનત્રિંશસ્સર્ગઃ ।
તથાગતાં તાં વ્યથિતામનિંદિતાં વ્યપેતહર્ષાં પરિદીનમાનસામ્ ।
શુભાં નિમિત્તાનિ શુભાનિ ભેજિરે નરં શ્રિયા જુષ્ટમિવોપજીવિનઃ ॥ 1 ॥
તસ્યાઃ શુભં વામમરાલપક્ષ્મ રાજીવૃતં કૃષ્ણવિશાલશુક્લમ્ ।
પ્રાસ્પંદતૈકં નયનં સુકેશ્યા મીનાહતં પદ્મમિવાભિતામ્રમ્ ॥ 2 ॥
ભુજશ્ચ ચાર્વંચિતપીનવૃત્તઃ પરાર્થ્યકાલાગરુચંદનાર્હઃ ।
અનુત્તમેનાધ્યુષિતઃ પ્રિયેણ ચિરેણ વામઃ સમવેપતાઽશુ ॥ 3 ॥
ગજેંદ્રહસ્તપ્રતિમશ્ચ પીન સ્તયોર્દ્વયોઃ સમ્હતયોઃ સુજાતઃ ।
પ્રસ્પંદમાનઃ પુનરૂરુરસ્યા રામં પુરસ્તાત્ સ્થિતમાચચક્ષે ॥ 4 ॥
શુભં પુનર્હેમસમાનવર્ણ મીષદ્રજોધ્વસ્તમિવામલાક્ષ્યાઃ ।
વાસ સ્સ્થિતાયા શ્શિખરાગ્રદંત્યાઃ કિંચિત્પરિસ્રંસત ચારુગાત્ય્રાઃ ॥ 5 ॥
એતૈર્નિમિત્તૈરપરૈશ્ચ સુભ્રૂઃ સંબોધિતા પ્રાગપિ સાધુ સિદ્ધૈઃ ।
વાતાતપક્લાંતમિવ પ્રણષ્ટં વર્ષેણ બીજં પ્રતિસંજહર્ષ ॥ 6 ॥
તસ્યાઃ પુનર્બિંબફલાધરોષ્ઠં સ્વક્ષિભ્રુકેશાંતમરાલપક્ષ્મ ।
વક્ત્રં બભાસે સિતશુક્લદંષ્ટ્રં રાહોર્મુખાચ્ચંદ્ર ઇવ પ્રમુક્તઃ ॥ 7 ॥
સા વીતશોકા વ્યપનીતતંદ્રી શાંતજ્વરા હર્ષવિબુદ્ધસત્ત્વા ।
અશોભતાર્યા વદનેન શુક્લે શીતાંશુના રાત્રિરિવોદિતેન ॥ 8 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે એકોનત્રિંશસ્સર્ગઃ ॥
