ശ്രീമദ്വാല്മീകീയ രാമായണേ സുംദരകാംഡമ് ।
അഥ ഏകോനത്രിംശസ്സര്ഗഃ ।
തഥാഗതാം താം വ്യഥിതാമനിംദിതാം വ്യപേതഹര്ഷാം പരിദീനമാനസാമ് ।
ശുഭാം നിമിത്താനി ശുഭാനി ഭേജിരേ നരം ശ്രിയാ ജുഷ്ടമിവോപജീവിനഃ ॥ 1 ॥
തസ്യാഃ ശുഭം വാമമരാലപക്ഷ്മ രാജീവൃതം കൃഷ്ണവിശാലശുക്ലമ് ।
പ്രാസ്പംദതൈകം നയനം സുകേശ്യാ മീനാഹതം പദ്മമിവാഭിതാമ്രമ് ॥ 2 ॥
ഭുജശ്ച ചാർവംചിതപീനവൃത്തഃ പരാര്ഥ്യകാലാഗരുചംദനാര്ഹഃ ।
അനുത്തമേനാധ്യുഷിതഃ പ്രിയേണ ചിരേണ വാമഃ സമവേപതാഽശു ॥ 3 ॥
ഗജേംദ്രഹസ്തപ്രതിമശ്ച പീന സ്തയോര്ദ്വയോഃ സമ്ഹതയോഃ സുജാതഃ ।
പ്രസ്പംദമാനഃ പുനരൂരുരസ്യാ രാമം പുരസ്താത് സ്ഥിതമാചചക്ഷേ ॥ 4 ॥
ശുഭം പുനര്ഹേമസമാനവര്ണ മീഷദ്രജോധ്വസ്തമിവാമലാക്ഷ്യാഃ ।
വാസ സ്സ്ഥിതായാ ശ്ശിഖരാഗ്രദംത്യാഃ കിംചിത്പരിസ്രംസത ചാരുഗാത്യ്രാഃ ॥ 5 ॥
ഏതൈര്നിമിത്തൈരപരൈശ്ച സുഭ്രൂഃ സംബോധിതാ പ്രാഗപി സാധു സിദ്ധൈഃ ।
വാതാതപക്ലാംതമിവ പ്രണഷ്ടം വര്ഷേണ ബീജം പ്രതിസംജഹര്ഷ ॥ 6 ॥
തസ്യാഃ പുനര്ബിംബഫലാധരോഷ്ഠം സ്വക്ഷിഭ്രുകേശാംതമരാലപക്ഷ്മ ।
വക്ത്രം ബഭാസേ സിതശുക്ലദംഷ്ട്രം രാഹോര്മുഖാച്ചംദ്ര ഇവ പ്രമുക്തഃ ॥ 7 ॥
സാ വീതശോകാ വ്യപനീതതംദ്രീ ശാംതജ്വരാ ഹര്ഷവിബുദ്ധസത്ത്വാ ।
അശോഭതാര്യാ വദനേന ശുക്ലേ ശീതാംശുനാ രാത്രിരിവോദിതേന ॥ 8 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ഏകോനത്രിംശസ്സര്ഗഃ ॥
