śrīmadvālmīkīya rāmāyaṇē sundarakāṇḍam ।
atha ēkōnatriṃśassargaḥ ।
tathāgatāṃ tāṃ vyathitāmaninditāṃ vyapētaharṣāṃ paridīnamānasām ।
śubhāṃ nimittāni śubhāni bhējirē naraṃ śriyā juṣṭamivōpajīvinaḥ ॥ 1 ॥
tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam ।
prāspandataikaṃ nayanaṃ sukēśyā mīnāhataṃ padmamivābhitāmram ॥ 2 ॥
bhujaścha chārvañchitapīnavṛttaḥ parārthyakālāgaruchandanārhaḥ ।
anuttamēnādhyuṣitaḥ priyēṇa chirēṇa vāmaḥ samavēpatā'śu ॥ 3 ॥
gajēndrahastapratimaścha pīna stayōrdvayōḥ samhatayōḥ sujātaḥ ।
praspandamānaḥ punarūrurasyā rāmaṃ purastāt sthitamāchachakṣē ॥ 4 ॥
śubhaṃ punarhēmasamānavarṇa mīṣadrajōdhvastamivāmalākṣyāḥ ।
vāsa ssthitāyā śśikharāgradantyāḥ kiñchitparisraṃsata chārugātyrāḥ ॥ 5 ॥
ētairnimittairaparaiścha subhrūḥ sambōdhitā prāgapi sādhu siddhaiḥ ।
vātātapaklāntamiva praṇaṣṭaṃ varṣēṇa bījaṃ pratisañjaharṣa ॥ 6 ॥
tasyāḥ punarbimbaphalādharōṣṭhaṃ svakṣibhrukēśāntamarālapakṣma ।
vaktraṃ babhāsē sitaśukladaṃṣṭraṃ rāhōrmukhāchchandra iva pramuktaḥ ॥ 7 ॥
sā vītaśōkā vyapanītatandrī śāntajvarā harṣavibuddhasattvā ।
aśōbhatāryā vadanēna śuklē śītāṃśunā rātririvōditēna ॥ 8 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkōnatriṃśassargaḥ ॥
