శ్రీమద్వాల్మీకీయ రామాయణే సుందరకాండమ్ ।
అథ ఏకోనత్రింశస్సర్గః ।
తథాగతాం తాం వ్యథితామనిందితాం వ్యపేతహర్షాం పరిదీనమానసామ్ ।
శుభాం నిమిత్తాని శుభాని భేజిరే నరం శ్రియా జుష్టమివోపజీవినః ॥ 1 ॥
తస్యాః శుభం వామమరాలపక్ష్మ రాజీవృతం కృష్ణవిశాలశుక్లమ్ ।
ప్రాస్పందతైకం నయనం సుకేశ్యా మీనాహతం పద్మమివాభితామ్రమ్ ॥ 2 ॥
భుజశ్చ చార్వంచితపీనవృత్తః పరార్థ్యకాలాగరుచందనార్హః ।
అనుత్తమేనాధ్యుషితః ప్రియేణ చిరేణ వామః సమవేపతాఽశు ॥ 3 ॥
గజేంద్రహస్తప్రతిమశ్చ పీన స్తయోర్ద్వయోః సమ్హతయోః సుజాతః ।
ప్రస్పందమానః పునరూరురస్యా రామం పురస్తాత్ స్థితమాచచక్షే ॥ 4 ॥
శుభం పునర్హేమసమానవర్ణ మీషద్రజోధ్వస్తమివామలాక్ష్యాః ।
వాస స్స్థితాయా శ్శిఖరాగ్రదంత్యాః కించిత్పరిస్రంసత చారుగాత్య్రాః ॥ 5 ॥
ఏతైర్నిమిత్తైరపరైశ్చ సుభ్రూః సంబోధితా ప్రాగపి సాధు సిద్ధైః ।
వాతాతపక్లాంతమివ ప్రణష్టం వర్షేణ బీజం ప్రతిసంజహర్ష ॥ 6 ॥
తస్యాః పునర్బింబఫలాధరోష్ఠం స్వక్షిభ్రుకేశాంతమరాలపక్ష్మ ।
వక్త్రం బభాసే సితశుక్లదంష్ట్రం రాహోర్ముఖాచ్చంద్ర ఇవ ప్రముక్తః ॥ 7 ॥
సా వీతశోకా వ్యపనీతతంద్రీ శాంతజ్వరా హర్షవిబుద్ధసత్త్వా ।
అశోభతార్యా వదనేన శుక్లే శీతాంశునా రాత్రిరివోదితేన ॥ 8 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సుందరకాండే ఏకోనత్రింశస్సర్గః ॥
