ශ්රීමද්වාල්මීකීය රාමායණේ සුංදරකාංඩම් ।
අථ පංචමස්සර්ගඃ ।
තතඃ ස මධ්යංගතමංශුමංතං ජ්යෝත්ස්නාවිතානං මහදුද්වමංතම් ।
දදර්ශ ධීමාන් දිවි භානුමංතං ගෝෂ්ඨේ වෘෂං මත්තමිව භ්රමංතම් ॥ 1 ॥
ලෝකස්ය පාපානි විනාශයංතං මහෝදධිං චාපි සමේධයංතම් ।
භූතානි සර්වාණි විරාජයංතං දදර්ශ ශීතාංශුමථාභියාංතම් ॥ 2 ॥
යා භාති ලක්ෂ්මීර්භුවි මංදරස්ථා තථා ප්රදෝෂේෂු ච සාගරස්ථා ।
තථෛව තෝයේෂු ච පුෂ්කරස්ථා රරාජ සා චාරුනිශාකරස්ථා ॥ 3 ॥
හංසෝ යථා රාජතපංජරස්ථඃ සිංහෝ යථා මංදරකංදරස්ථඃ ।
වීරෝ යථා ගර්විතකුංජරස්ථ චංද්රෝऽපි බභ්රාජ තථාංබරස්ථඃ ॥ 4 ॥
ස්ථිතඃ කකුද්මානිව තීක්ෂ්ණශෘංගෝ මහාචලඃ ශ්වේත ඉවෝච්චශෘංගඃ ।
හස්තීව ජාංබූනදබද්ධශෘංගෝ රරාජ චංද්රඃ පරිපූර්ණශෘංගඃ ॥ 5 ॥
විනෂ්ටශීතාංබුතුෂාරපංකෝ මහාග්රහග්රාහවිනෂ්ටපංකඃ ।
ප්රකාශලක්ෂ්ම්යාශ්රයනිර්මලාංකඃ රරාජ චංද්රෝ භගවාන් ශශාංකඃ ॥ 6 ॥
ශිලාතලං ප්රාප්ය යථා මෘගේංද්රෝ මහාරණං ප්රාප්ය යථා ගජේංද්රඃ ।
රාජ්යං සමාසාද්ය යථා නරේංද්ර ස්තථාප්රකාශෝ විරරාජ චංද්රඃ ॥ 7 ॥
ප්රකාශචංද්රෝදයනෂ්ටදෝෂඃ ප්රවෘත්තරක්ෂඃ පිශිතාශදෝෂඃ ।
රාමාභිරාමේරිතචිත්තදෝෂඃ ස්වර්ගප්රකාශෝ භගවාන් ප්රදෝෂඃ ॥ 8 ॥
තංත්රීස්වනාඃ කර්ණසුඛාඃ ප්රවෘත්තාඃ ස්වපංති නාර්යඃ පතිභිඃ සුවෘත්තාඃ ।
නක්තංචරාශ්චාපි තථා ප්රවෘත්තාඃ විහර්තුමත්යද්භුතරෞද්රවෘත්තාඃ ॥ 9 ॥
මත්තප්රමත්තානි සමාකුලානි රථාශ්වභද්රාසනසංකුලානි ।
වීරශ්රියා චාපි සමාකුලානි දදර්ශ ධීමාන් ස කපිඃ කුලානි ॥ 10 ॥
පරස්පරං චාධිකමාක්ෂිපංති භුජාංශ්ච පීනානධිකං ක්ෂිපංති ।
මත්තප්රලාපානධිකං ක්ෂිපංති මත්තානි චාන්යෝන්යමධික්ෂිපංති ॥ 11 ॥
රක්ෂාංසි වක්ෂාංසි ච වික්ෂිපංති ගාත්රාණි කාංතාසු ච වික්ෂිපංති ।
රූපාණි චිත්රාණි ච වික්ෂිපංති දෘඪානි චාපානි ච වික්ෂිපංති ॥ 12 ॥
දදර්ශ කාංතාශ්ච සමාලභංත්ය ස්තථා පරාස්තත්ර පුනඃ ස්වපංත්යඃ ।
සුරූපවක්ත්රාශ්ච තථා හසංත්යඃ ක්රුද්ධාඃ පරාශ්චාපි විනිඃශ්වසංත්ය ॥ 13 ॥
මහාගජෛශ්චාපි තථා නදද්භිඃ සුපූජිතෛශ්චාපි තථා සුසද්භිඃ ।
රරාජ වීරෛශ්ච විනිඃශ්වසද්භිඃ හ්රදෝ භුජංගෛරිව නිඃශ්වසද්භිඃ ॥ 14 ॥
බුද්ධිප්රධානාන් රුචිරාභිධානාන් සංශ්රද්ධධානාන් ජගතඃ ප්රධානාන් ।
නානාවිධානාන් රුචිරාභිධානාන් දදර්ශ තස්යාං පුරි යාතුධානාන් ॥ 15 ॥
නනංද දෘෂ්ට්වා ස ච තාන් සුරූපාන්නානාගුණානාත්මගුණානුරූපාන් ।
විද්යෝතමානාන්ස තදානුරූපාන් දදර්ශ කාංශ්චිච්ච පුනර්විරූපාන් ॥ 16 ॥
තතෝ වරාර්හාඃ සුවිශුද්ධභාවා ස්තේෂාං ස්ත්රියස්තත්ර මහානුභාවාඃ ।
ප්රියේෂු පානේෂු ච සක්තභාවා දදර්ශ තාරා ඉව සුප්රභාවාඃ ॥ 17 ॥
ශ්රියා ජ්වලංතීස්ත්රපයෝපගූඪා නිශීථකාලේ රමණෝපගූඪාඃ ।
දදර්ශ කාශ්චිත්ප්රමදෝපගූඪා යථා විහංගාඃ කුසුමෝපගූඪාඃ ॥ 18 ॥
අන්යාඃ පුනර්හර්ම්යතලෝපවිෂ්ටා ස්තත්ර ප්රියාංකේෂු සුඛෝපවිෂ්ටාඃ ।
භර්තුඃ ප්රියා ධර්මපරා නිවිෂ්ටා දදර්ශ ධීමාන් මදනාභිවිෂ්ටාඃ ॥ 19 ॥
අප්රාවෘතාඃ කාංචනරාජිවර්ණාඃ කාශ්චිත්පරාර්ථ්යාස්තපනීයවර්ණාඃ ।
පුනශ්ච කාශ්චිච්ඡශලක්ෂ්මවර්ණාඃ කාංතප්රහීණා රුචිරාංගවර්ණාඃ ॥ 20 ॥
තතඃ ප්රියාන් ප්රාප්ය මනෝභිරාමාඃ සුප්රීතියුක්තාඃ ප්රසමීක්ෂ්යරාමාඃ ।
ගෘහේෂු හෘෂ්ටාඃ පරමාභිරාමාඃ හරිප්රවීරඃ ස දදර්ශ රාමාඃ ॥ 21 ॥
චංද්රප්රකාශාශ්ච හි වක්ත්රමාලාඃ වක්රාක්ෂිපක්ෂ්මාශ්ච සුනේත්රමාලාඃ ।
විභූෂණානාං ච දදර්ශ මාලාඃ ශතහ්රදානාමිව චාරුමාලාඃ ॥ 22 ॥
න ත්වේව සීතාං පරමාභිජාතාං පථි ස්ථිතේ රාජකුලේ ප්රජාතාම් ।
ලතාං ප්රපුල්ලාමිව සාධු ජාතාං දදර්ශ තන්වීං මනසාභිජාතාම් ॥ 23 ॥
සනාතනේ වර්ත්මනි සන්නිවිෂ්ටාං රාමේක්ෂණාං තාං මදනාභිවිෂ්ටාම් ।
භර්තුර්මනඃ ශ්රීමදනුප්රවිෂ්ටාං ස්ත්රීභ්යෝ වරාභ්යශ්ච සදා විශිෂ්ටාම් ॥ 24 ॥
උෂ්ණාර්දිතාං සානුසෘතාස්රකංඨීං පුරා වරාර්හෝත්තමනිෂ්කකංඨීම් ।
සුජාතපක්ෂ්මාමභිරක්තකංඨීං වනේऽප්රවෘත්තාමිව නීලකංඨීම් ॥ 25 ॥
අව්යක්තරේඛාමිව චංද්රරේඛාං පාංසුප්රදිග්ධාමිව හේමරේඛාම් ।
ක්ෂතප්රරූඪාමිව බාණරේඛාං වායුප්රභින්නාමිව මේඝරේඛාම් ॥ 26 ॥
සීතාමපශ්යන් මනුජේශ්වරස්ය රාමස්ය පත්නීං වදතාං වරස්ය ।
බභූව දුඃඛාභිහතශ්චිරස්ය ප්ලවංගමෝ මංද ඉවාචිරස්ය ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ පංචමස්සර්ගඃ ॥
