श्रीमद्वाल्मीकीय रामायणे सुंदरकांडम् ।
अथ द्विपंचाशस्सर्गः ।
तस्य तद्वचनं श्रुत्वा वानरस्य महात्मनः ।
आज्ञापयद्वधं तस्य रावणः क्रोधमूर्छितः ॥ 1 ॥
वधे तस्य समाज्ञप्ते रावणेन दुरात्मना ।
निवेदितवतो दौत्यं नानुमेने विभीषणः ॥ 2 ॥
तं रक्षोधिपतिं क्रुद्धं तच्च कार्यमुपस्थितम् ।
विदित्वा चिंतयामास कार्यं कार्यविधौ स्थितः ॥ 3 ॥
निश्चितार्थस्ततस्साम्ना पूज्यं शत्रुजिदग्रजम् ।
उवाच हितमत्यर्थं वाक्यं वाक्यविशारदः ॥ 4 ॥
क्षमस्व रोषं त्यज राक्षसेंद्र प्रसीद मद्वाक्यमिदं शृणुष्व ।
वधं न कुर्वंति परावरज्ञा दूतस्य संतो वसुधाधिपेंद्राः ॥ 5 ॥
राजधर्मविरुद्धं च लोकवृत्तेश्च गर्हितम् ।
तव चासदृशं वीर कपेरस्य प्रमापणम् ॥ 6 ॥
धर्मज्ञश्च कृतज्ञश्च राजधर्मविशारदः ।
परावरज्ञो भूतानां त्वमेव परमार्थवित् ॥ 7 ॥
गृह्यंते यदि रोषेण त्वादृशोऽपि विचक्षणः ।
तत श्शास्त्रविपश्चित्त्वं श्रम एव हि केवलम् ॥ 8 ॥
तस्मात्प्रसीद शत्रुघ्न राक्षसेंद्र दुरासद ।
युक्तायुक्तं विनिश्चित्य दूतदंडो विधीयताम् ॥ 9 ॥
विभीषणवचः श्रुत्वा रावणो राक्षसेश्वरः ।
रोषेण महताविष्टो वाक्यमुत्तरमब्रवीत् ॥ 10 ॥
न पापानां वधे पापं विद्यते शत्रुसूदन ।
तस्मादेनं वधिष्यामि वानरं पापचारिणम् ॥ 11 ॥
अधर्ममूलं बहुदोषयुक्तमनार्यजुष्टं वचनं निशम्य ।
उवाच वाक्यं परमार्थतत्त्वं विभीषणो बुद्धिमतां वरिष्ठः ॥ 12 ॥
प्रसीद लंकेश्वर राक्षसेंद्र धर्मार्थयुक्तं वचनं शृणुष्व ।
दूतानवध्यान् समयेषु राजन् सर्वेषु सर्वत्र वदंति संतः ॥ 13 ॥
असंशयं शत्रुरयं प्रवृद्धः कृतं ह्यनेनाप्रियमप्रमेयम् ।
न दूतवध्यां प्रवदंति संतो दूतस्य दृष्टा बहवो हि दंडाः ॥ 14 ॥
वैरूप्यमंगेषु कशाभिघातो मौंड्यं तथा लक्षणसन्निपातः ।
एतान् हि दूते प्रवदंति दंडान् वधस्तु दूतस्य न नः श्रुतोऽस्ति ॥ 15 ॥
कथं च धर्मार्थविनीतबुद्धिः परावरप्रत्ययनिश्चितार्थः ।
भवद्विधः कोपवशे हि तिष्ठेत् कोपं नियच्छंति हि सत्त्ववंतः ॥ 16 ॥
न धर्मवादे न च लोकवृत्ते न शास्त्रबुद्धिग्रहणेषु चापि ।
विद्येत कश्चित्तव वीर तुल्य स्त्वंह्युत्तमस्सर्वसुरासुराणाम् ॥ 17 ॥
शूरेण वीरेण निशाचरेंद्र सुरासुराणामपि दुर्जयेन ।
त्वया प्रगल्भाः सुरदैत्यसंघा जिताश्च युद्धेष्वसकृन्नरेंद्राः ॥ 18 ॥
न चाप्यस्य कपेर्घाते कंचित्पश्याम्यहं गुणम् ।
तेष्वयं पात्यतां दंडो यैरयं प्रेषितः कपिः ॥ 19 ॥
साधुर्वा यदि वाऽसाधुः परैरेष समर्पितः ।
ब्रुवन् परार्थं परवान्न दूतो वधमर्हति ॥ 20 ॥
अपि चास्मिन् हते राजन्नान्यं पश्यामि खेचरम् ।
इह यः पुनरागच्छेत्परं पारं महोदधेः ॥ 21 ॥
तस्मान्नास्य वधे यत्नः कार्यः परपुरंजय ।
भवान् सेंद्रेषु देवेषु यत्नमास्थातुमर्हति ॥ 22 ॥
अस्मिन्विनष्टे न हि वीरमन्यं पश्यामि यस्तौ वरराजपुत्रौ ।
युद्धाय युद्धप्रियदुर्विनीतावुद्योजयेद्धीर्घपथावरुद्धौ ॥ 23 ॥
पराक्रमोत्साहमनस्विनां च सुरासुराणामपि दुर्जयेन ।
त्वया मनोनंदन नैतानां युद्धायतिर्नाशयतुं न युक्ता ॥ 24 ॥
हिताश्च शूराश्च समाहिताश्च कुलेषु जाताश्च महागुणेषु ।
मनस्विनश्शस्त्रभृतां वरिष्ठाः कोट्यग्रतस्ते सुभृताश्च योधाः ॥ 25 ॥
तदेकदेशेन बलस्य तावत्केचित्तवाऽऽदेशकृतोऽभियांतु तौ राजपुत्रौ विनिगृह्य मूढौ परेषु ते भावयितुं प्रभावम् ॥ 26 ॥
निशाचराणामधिपोऽनुजस्य विभीषणस्योत्तमवाक्यमिष्टम् ।
जग्राह बुद्ध्या सुरलोकशत्रु र्महाबलो राक्षसराजमुख्यः ॥ 27 ॥
इत्यार्षे श्रीमद्रामायणे वाल्मीकीय आदिकाव्ये सुंदरकांडे द्विपंचाशस्सर्गः ॥
