ශ්රීමද්වාල්මීකීය රාමායණේ බාලකාංඩම් ।
අථ ද්වාවිංශස්සර්ගඃ ।
තථා වසිෂ්ඨේ බ්රුවති රාජා දශරථස්සුතම ප්රහෘෂ්ටවදනෝ රාමමාජුහාව සලක්ෂ්මණම් ॥ 1 ॥
කෘතස්වස්ත්යයනං මාත්රා පිත්රා දශරථේන ච ।
පුරෝධසා වසිෂ්ඨේන මංගලෛරභිමංත්රිතම් ॥ 2 ॥
ස පුත්රං මූර්ධ්න්යුපාඝ්රාය රාජා දශරථඃ ප්රියම් ।
දදෞ කුශිකපුත්රාය සුප්රීතේනාංතරාත්මනා ॥ 3 ॥
තතෝ වායුස්සුඛස්පර්ශෝ නීරජස්කෝ වවෞ තදා ।
විශ්වාමිත්රගතං දෘෂ්ට්වා රාමං රාජීවලෝචනම් ॥ 4 ॥
පුෂ්පවෘෂ්ටිර්මහත්යාසීද්දේවදුංදුභිනිස්වනෛඃ ।
ශංඛදුංදුභිනිර්ඝෝෂඃ ප්රයාතේ තු මහාත්මනි ॥ 5 ॥
විශ්වාමිත්රෝ යයාවග්රේ තතෝ රාමෝ ධනුර්ධරඃ ।
කාකපක්ෂධරෝ ධන්වී තං ච සෞමිත්රිරන්වගාත් ॥ 6 ॥
කලාපිනෞ ධනුෂ්පාණී ශෝභමානෞ දිශෝ දශ ।
විශ්වාමිත්රං මහාත්මානං ත්රිශීර්ෂාවිව පන්නගෞ ॥ 7 ॥
අනුජග්මතුරක්ෂුද්රෞ පිතාමහමිවාශ්විනෞ ।
තදා කුශිකපුත්රං තු ධනුෂ්පාණී ස්වලංකෘතෞ ॥ 8 ॥
බද්ධගෝධාංගුලිත්රාණෞ ඛඩ්ගවංතෞ මහාද්යුතී ।
කුමාරෞ චාරුවපුෂෞ භ්රාතරෞ රාමලක්ෂ්මණෞ ॥ 9 ॥
අනුයාතෞ ශ්රියා දීප්තෞ ශෝභයේතාමනිංදිතෞ ।
ස්ථාණුං දේවමිවාචිංත්යං කුමාරාවිව පාවකී ॥ 10 ॥
අධ්යර්ධයෝජනං ගත්වා සරය්වා දක්ෂිණේ තටේ ।
රාමේති මධුරාං වාණීං විශ්වාමිත්රෝऽභ්යභාෂත ॥ 11 ॥
ගෘහාණ වත්ස සලිලං මා භූත්කාලස්ය පර්යයඃ ।
මංත්රග්රාමං ගෘහාණ ත්වං බලාමතිබලාං තථා ॥ 12 ॥
න ශ්රමෝ න ජ්වරෝ වා තේ න රූපස්ය විපර්යයඃ ।
න ච සුප්තං ප්රමත්තං වා ධර්ෂයිෂ්යංති නෛරෘතාඃ ॥ 13 ॥
න බාහ්වෝස්සදෘශෝ වීර්යේ පෘථිව්යාමස්ති කශ්චන ।
ත්රිෂු ලෝකේෂු වෛ රාම න භවේත්සදෘශස්තව ॥ 14 ॥
න සෞභාග්යේ න දාක්ෂිණ්යේ න ජ්ඤානේ බුද්ධිනිශ්චයේ ।
නෝත්තරේ ප්රතිවක්තව්යේ සමෝ ලෝකේ තවාऽනඝ ॥ 15 ॥
ඒතද්විද්යාද්වයේ ලබ්ධේ භවිතා නාස්ති තේ සමඃ ।
බලාත්වතිබලා චෛව සර්වජ්ඤානස්ය මාතරෞ ॥ 16 ॥
ක්ෂුත්පිපාසේ න තේ රාම භවිෂ්යේතේ නරෝත්තම ।
බලාමතිබලාං චෛව පඨතඃ පථි රාඝව ॥ 17 ॥
විද්යාද්වයමධීයානේ යශශ්චාප්යතුලං ත්වයි ।
පිතාමහසුතේ හ්යේතේ විද්යේ තේජස්සමන්විතේ ॥ 18 ॥
ප්රදාතුං තව කාකුත්ස්ථ සදෘශස්ත්වං හි ධාර්මික ।
කාමං බහුගුණාස්සර්වේ ත්වය්යේතේ නාත්ර සංශයඃ ।
තපසා සංභෘතේ චෛතේ බහුරූපේ භවිෂ්යතඃ ॥ 19 ॥
තතෝ රාමෝ ජලං ස්පෘෂ්ට්වා ප්රහෘෂ්ටවදනශ්ශුචිඃ ।
ප්රතිජග්රාහ තේ විද්යේ මහර්ෂේර්භාවිතාත්මනඃ ॥ 20 ॥
විද්යාසමුදිතෝ රාමශ්ශුශුභේ භූරිවික්රමඃ ।
සහස්රරශ්මිර්භගවාන් ශරදීව දිවාකරඃ ॥ 21 ॥
ගුරුකාර්යාණි සර්වාණි නියුජ්ය කුශිකාත්මජේ ।
ඌෂුස්තාං රජනීං තත්ර සරය්වාං සුසුඛං ත්රයඃ ॥ 22 ॥
දශරථනෘපසූනුසත්තමාභ්යාං තෘණශයනේऽනුචිතේ සහෝෂිතාභ්යාම් ।
කුශිකසුතවචෝऽනුලාලිතාභ්යාං සුඛමිව සා විබභෞ විභාවරී ච ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ද්වාවිංශස්සර්ගඃ ॥
