শ্রীমদ্বাল্মীকীয় রামাযণে বালকাংডম্ ।
অথ দ্বাবিংশস্সর্গঃ ।
তথা বসিষ্ঠে ব্রুবতি রাজা দশরথস্সুতম প্রহৃষ্টবদনো রামমাজুহাব সলক্ষ্মণম্ ॥ 1 ॥
কৃতস্বস্ত্যযনং মাত্রা পিত্রা দশরথেন চ ।
পুরোধসা বসিষ্ঠেন মংগলৈরভিমংত্রিতম্ ॥ 2 ॥
স পুত্রং মূর্ধ্ন্য়ুপাঘ্রায় রাজা দশরথঃ প্রিযম্ ।
দদৌ কুশিকপুত্রায় সুপ্রীতেনাংতরাত্মনা ॥ 3 ॥
ততো বায়ুস্সুখস্পর্শো নীরজস্কো ববৌ তদা ।
বিশ্বামিত্রগতং দৃষ্ট্বা রামং রাজীবলোচনম্ ॥ 4 ॥
পুষ্পবৃষ্টির্মহত্য়াসীদ্দেবদুংদুভিনিস্বনৈঃ ।
শংখদুংদুভিনির্ঘোষঃ প্রয়াতে তু মহাত্মনি ॥ 5 ॥
বিশ্বামিত্রো যয়াবগ্রে ততো রামো ধনুর্ধরঃ ।
কাকপক্ষধরো ধন্বী তং চ সৌমিত্রিরন্বগাত্ ॥ 6 ॥
কলাপিনৌ ধনুষ্পাণী শোভমানৌ দিশো দশ ।
বিশ্বামিত্রং মহাত্মানং ত্রিশীর্ষাবিব পন্নগৌ ॥ 7 ॥
অনুজগ্মতুরক্ষুদ্রৌ পিতামহমিবাশ্বিনৌ ।
তদা কুশিকপুত্রং তু ধনুষ্পাণী স্বলংকৃতৌ ॥ 8 ॥
বদ্ধগোধাংগুলিত্রাণৌ খড্গবংতৌ মহাদ্য়ুতী ।
কুমারৌ চারুবপুষৌ ভ্রাতরৌ রামলক্ষ্মণৌ ॥ 9 ॥
অনুয়াতৌ শ্রিয়া দীপ্তৌ শোভয়েতামনিংদিতৌ ।
স্থাণুং দেবমিবাচিংত্য়ং কুমারাবিব পাবকী ॥ 10 ॥
অধ্যর্ধয়োজনং গত্বা সরয়্বা দক্ষিণে তটে ।
রামেতি মধুরাং বাণীং বিশ্বামিত্রোঽভ্যভাষত ॥ 11 ॥
গৃহাণ বত্স সলিলং মা ভূত্কালস্য় পর্যয়ঃ ।
মংত্রগ্রামং গৃহাণ ত্বং বলামতিবলাং তথা ॥ 12 ॥
ন শ্রমো ন জ্বরো বা তে ন রূপস্য় বিপর্যয়ঃ ।
ন চ সুপ্তং প্রমত্তং বা ধর্ষয়িষ্য়ংতি নৈরৃতাঃ ॥ 13 ॥
ন বাহ্বোস্সদৃশো বীর্য়ে পৃথিব্য়ামস্তি কশ্চন ।
ত্রিষু লোকেষু বৈ রাম ন ভবেত্সদৃশস্তব ॥ 14 ॥
ন সৌভাগ্য়ে ন দাক্ষিণ্য়ে ন জ্ঞানে বুদ্ধিনিশ্চয়ে ।
নোত্তরে প্রতিবক্তব্য়ে সমো লোকে তবাঽনঘ ॥ 15 ॥
এতদ্বিদ্য়াদ্বয়ে লব্ধে ভবিতা নাস্তি তে সমঃ ।
বলাত্বতিবলা চৈব সর্বজ্ঞানস্য় মাতরৌ ॥ 16 ॥
ক্ষুত্পিপাসে ন তে রাম ভবিষ্য়েতে নরোত্তম ।
বলামতিবলাং চৈব পঠতঃ পথি রাঘব ॥ 17 ॥
বিদ্য়াদ্বযমধীয়ানে যশশ্চাপ্যতুলং ত্বয়ি ।
পিতামহসুতে হ্য়েতে বিদ্য়ে তেজস্সমন্বিতে ॥ 18 ॥
প্রদাতুং তব কাকুত্স্থ সদৃশস্ত্বং হি ধার্মিক ।
কামং বহুগুণাস্সর্বে ত্বয়্য়েতে নাত্র সংশয়ঃ ।
তপসা সংভৃতে চৈতে বহুরূপে ভবিষ্যতঃ ॥ 19 ॥
ততো রামো জলং স্পৃষ্ট্বা প্রহৃষ্টবদনশ্শুচিঃ ।
প্রতিজগ্রাহ তে বিদ্য়ে মহর্ষের্ভাবিতাত্মনঃ ॥ 20 ॥
বিদ্য়াসমুদিতো রামশ্শুশুভে ভূরিবিক্রমঃ ।
সহস্ররশ্মির্ভগবান্ শরদীব দিবাকরঃ ॥ 21 ॥
গুরুকার্য়াণি সর্বাণি নিয়ুজ্য় কুশিকাত্মজে ।
ঊষুস্তাং রজনীং তত্র সরয়্বাং সুসুখং ত্রয়ঃ ॥ 22 ॥
দশরথনৃপসূনুসত্তমাভ্য়াং তৃণশযনেঽনুচিতে সহোষিতাভ্য়াম্ ।
কুশিকসুতবচোঽনুলালিতাভ্য়াং সুখমিব সা বিবভৌ বিভাবরী চ ॥ 23 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে দ্বাবিংশস্সর্গঃ ॥
