śrīmadvālmīkīya rāmāyaṇē bālakāṇḍam ।
atha pañchatriṃśassargaḥ ।
upāsya rātriśēṣaṃ tu śōṇākūlē maharṣibhiḥ ।
niśāyāṃ suprabhātāyāṃ viśvāmitrō'bhyabhāṣata ॥ 1 ॥
suprabhātā niśā rāma pūrvā sandhyā pravartatē ।
uttiṣṭhōttiṣṭha bhadraṃ tē gamanāyābhirōchaya ॥ 2 ॥
tachChrutvā vachanaṃ tasya kṛtvā paurvāhṇikīṃ kriyām ।
gamanaṃ rōchayāmāsa vākyaṃ chēdamuvācha ha ॥ 3 ॥
ayaṃ śōṇaśśubhajalō'gādhaḥ pulinamaṇḍitaḥ ।
katarēṇa pathā brahman santariṣyāmahē vayam ॥ 4 ॥
ēvamuktastu rāmēṇa viśvāmitrō'bravīdidam ।
ēṣa panthā mayōddiṣṭō yēna yānti maharṣayaḥ ॥ 5 ॥
ēvamuktā maharṣayō viśvāmitrēṇa dhīmatā ।
paśyantastē prayātā vai vanāni vividhāni cha ॥ 6 ॥
tē gatvā dūramadhvānaṃ gatē'rdhadivasē tadā ।
jāhnavīṃ saritāṃ śrēṣṭhāṃ dadṛśurmunisēvitām ॥ 7 ॥
tāṃ dṛṣṭvā puṇyasalilāṃ haṃsasārasasēvitām ।
babhūvurmuditā ssarvē munayassaha rāghavāḥ ॥ 8 ॥
tasyāstīrē tataśchakrusta āvāsaparigraham ।
tatassnātvā yathānyāyaṃ santarpya pitṛdēvatāḥ ॥ 9 ॥
hutvā chaivāgnihōtrāṇi prāśya chāmṛtavaddhaviḥ ।
viviśurjāhnavītīrē śuchau muditamānasāḥ ॥ 10 ॥
viśvāmitraṃ mahātmānaṃ parivārya samantataḥ ।
atha tatra tadā rāmō viśvāmitramathābravīt ॥ 11 ॥
bhagavan śrōtumichChāmi gaṅgāṃ tripathagāṃ nadīm ।
trailōkyaṃ kathamākramya gatā nadanadīpatim ॥ 12 ॥
chōditō rāmavākyēna viśvāmitrō mahāmuniḥ ।
vṛddhiṃ janma cha gaṅgāyā vaktumēvōpachakramē ॥ 13 ॥
śailēndrō himavānnāma dhātūnāmākarō mahān ।
tasya kanyādvayaṃ rāma rūpēṇāpratimaṃ bhuvi ॥ 14 ॥
yā mēruduhitā rāma tayōrmātā sumadhyamā ।
nāmnā manōramā nāma patnī himavataḥ priyā ॥ 15 ॥
tasyāṃ gaṅgēyamabhavajjyēṣṭhā himavatassutā ।
umā nāma dvitīyābhūnnāmnā tasyaiva rāghava ॥ 16 ॥
atha jyēṣṭhāṃ surāssarvē dēvatārthachikīrṣayā ।
śailēndraṃ varayāmāsurgaṅgāṃ tripathagāṃ nadīm ॥ 17 ॥
dadau dharmēṇa himavān tanayāṃ lōkapāvanīm ।
svachChandapathagāṃ gaṅgāṃ trailōkyahitakāmyayā ॥ 18 ॥
pratigṛhya tatō dēvāstrilōkahitakāriṇaḥ ।
gaṅgāmādāya tē'gachChan kṛtārthēnāntarātmanā ॥ 19 ॥
yā chānyā śailaduhitā kanyāsīdraghunandana ।
ugraṃ sā vratamāsthāya tapastēpē tapōdhanā ॥ 20 ॥
ugrēṇa tapasā yuktāṃ dadau śailavarassutām ।
rudrāyāpratirūpāya umāṃ lōkanamaskṛtām ॥ 21 ॥
ētē tē śailarājasya sutē lōkanamaskṛtē ।
gaṅgā cha saritāṃ śrēṣṭhā umādēvī cha rāghava ॥ 22 ॥
ētattē sarvamākhyātaṃ yathā tripathagā nadī ।
khaṃ gatā prathamaṃ tāta gatiṃ gatimatāṃ vara ॥ 23 ॥
saiṣā suranadī ramyā śailēndrasya sutā tadā ।
suralōkaṃ samārūḍhā vipāpā jalavāhinī ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchatriṃśassargaḥ ॥
