শ্রীমদ্বাল্মীকীয় রামাযণে বালকাংডম্ ।
অথ পংচত্রিংশস্সর্গঃ ।
উপাস্য় রাত্রিশেষং তু শোণাকূলে মহর্ষিভিঃ ।
নিশায়াং সুপ্রভাতায়াং বিশ্বামিত্রোঽভ্যভাষত ॥ 1 ॥
সুপ্রভাতা নিশা রাম পূর্বা সংধ্য়া প্রবর্ততে ।
উত্তিষ্ঠোত্তিষ্ঠ ভদ্রং তে গমনায়াভিরোচয় ॥ 2 ॥
তচ্ছ্রুত্বা বচনং তস্য় কৃত্বা পৌর্বাহ্ণিকীং ক্রিয়াম্ ।
গমনং রোচয়ামাস বাক্য়ং চেদমুবাচ হ ॥ 3 ॥
অয়ং শোণশ্শুভজলোঽগাধঃ পুলিনমংডিতঃ ।
কতরেণ পথা ব্রহ্মন্ সংতরিষ্য়ামহে বযম্ ॥ 4 ॥
এবমুক্তস্তু রামেণ বিশ্বামিত্রোঽব্রবীদিদম্ ।
এষ পংথা ময়োদ্দিষ্টো যেন যাংতি মহর্ষয়ঃ ॥ 5 ॥
এবমুক্তা মহর্ষয়ো বিশ্বামিত্রেণ ধীমতা ।
পশ্য়ংতস্তে প্রয়াতা বৈ বনানি বিবিধানি চ ॥ 6 ॥
তে গত্বা দূরমধ্বানং গতেঽর্ধদিবসে তদা ।
জাহ্নবীং সরিতাং শ্রেষ্ঠাং দদৃশুর্মুনিসেবিতাম্ ॥ 7 ॥
তাং দৃষ্ট্বা পুণ্যসলিলাং হংসসারসসেবিতাম্ ।
বভূবুর্মুদিতা স্সর্বে মুনযস্সহ রাঘবাঃ ॥ 8 ॥
তস্য়াস্তীরে ততশ্চক্রুস্ত আবাসপরিগ্রহম্ ।
ততস্স্নাত্বা যথান্য়ায়ং সংতর্প্য় পিতৃদেবতাঃ ॥ 9 ॥
হুত্বা চৈবাগ্নিহোত্রাণি প্রাশ্য় চামৃতবদ্ধবিঃ ।
বিবিশুর্জাহ্নবীতীরে শুচৌ মুদিতমানসাঃ ॥ 10 ॥
বিশ্বামিত্রং মহাত্মানং পরিবার্য় সমংততঃ ।
অথ তত্র তদা রামো বিশ্বামিত্রমথাব্রবীত্ ॥ 11 ॥
ভগবন্ শ্রোতুমিচ্ছামি গংগাং ত্রিপথগাং নদীম্ ।
ত্রৈলোক্য়ং কথমাক্রম্য় গতা নদনদীপতিম্ ॥ 12 ॥
চোদিতো রামবাক্য়েন বিশ্বামিত্রো মহামুনিঃ ।
বৃদ্ধিং জন্ম চ গংগায়া বক্তুমেবোপচক্রমে ॥ 13 ॥
শৈলেংদ্রো হিমবান্নাম ধাতূনামাকরো মহান্ ।
তস্য় কন্য়াদ্বয়ং রাম রূপেণাপ্রতিমং ভুবি ॥ 14 ॥
যা মেরুদুহিতা রাম তয়োর্মাতা সুমধ্যমা ।
নাম্না মনোরমা নাম পত্নী হিমবতঃ প্রিয়া ॥ 15 ॥
তস্য়াং গংগেযমভবজ্জ্য়েষ্ঠা হিমবতস্সুতা ।
উমা নাম দ্বিতীয়াভূন্নাম্না তস্য়ৈব রাঘব ॥ 16 ॥
অথ জ্য়েষ্ঠাং সুরাস্সর্বে দেবতার্থচিকীর্ষয়া ।
শৈলেংদ্রং বরয়ামাসুর্গংগাং ত্রিপথগাং নদীম্ ॥ 17 ॥
দদৌ ধর্মেণ হিমবান্ তনয়াং লোকপাবনীম্ ।
স্বচ্ছংদপথগাং গংগাং ত্রৈলোক্যহিতকাম্যয়া ॥ 18 ॥
প্রতিগৃহ্য় ততো দেবাস্ত্রিলোকহিতকারিণঃ ।
গংগামাদায় তেঽগচ্ছন্ কৃতার্থেনাংতরাত্মনা ॥ 19 ॥
যা চান্য়া শৈলদুহিতা কন্য়াসীদ্রঘুনংদন ।
উগ্রং সা ব্রতমাস্থায় তপস্তেপে তপোধনা ॥ 20 ॥
উগ্রেণ তপসা যুক্তাং দদৌ শৈলবরস্সুতাম্ ।
রুদ্রায়াপ্রতিরূপায় উমাং লোকনমস্কৃতাম্ ॥ 21 ॥
এতে তে শৈলরাজস্য় সুতে লোকনমস্কৃতে ।
গংগা চ সরিতাং শ্রেষ্ঠা উমাদেবী চ রাঘব ॥ 22 ॥
এতত্তে সর্বমাখ্য়াতং যথা ত্রিপথগা নদী ।
খং গতা প্রথমং তাত গতিং গতিমতাং বর ॥ 23 ॥
সৈষা সুরনদী রম্য়া শৈলেংদ্রস্য় সুতা তদা ।
সুরলোকং সমারূঢা বিপাপা জলবাহিনী ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে পংচত্রিংশস্সর্গঃ ॥
