ශ්රීමද්වාල්මීකීය රාමායණේ බාලකාංඩම් ।
අථ පංචත්රිංශස්සර්ගඃ ।
උපාස්ය රාත්රිශේෂං තු ශෝණාකූලේ මහර්ෂිභිඃ ।
නිශායාං සුප්රභාතායාං විශ්වාමිත්රෝऽභ්යභාෂත ॥ 1 ॥
සුප්රභාතා නිශා රාම පූර්වා සංධ්යා ප්රවර්තතේ ।
උත්තිෂ්ඨෝත්තිෂ්ඨ භද්රං තේ ගමනායාභිරෝචය ॥ 2 ॥
තච්ඡ්රුත්වා වචනං තස්ය කෘත්වා පෞර්වාහ්ණිකීං ක්රියාම් ।
ගමනං රෝචයාමාස වාක්යං චේදමුවාච හ ॥ 3 ॥
අයං ශෝණශ්ශුභජලෝऽගාධඃ පුලිනමංඩිතඃ ।
කතරේණ පථා බ්රහ්මන් සංතරිෂ්යාමහේ වයම් ॥ 4 ॥
ඒවමුක්තස්තු රාමේණ විශ්වාමිත්රෝऽබ්රවීදිදම් ।
ඒෂ පංථා මයෝද්දිෂ්ටෝ යේන යාංති මහර්ෂයඃ ॥ 5 ॥
ඒවමුක්තා මහර්ෂයෝ විශ්වාමිත්රේණ ධීමතා ।
පශ්යංතස්තේ ප්රයාතා වෛ වනානි විවිධානි ච ॥ 6 ॥
තේ ගත්වා දූරමධ්වානං ගතේऽර්ධදිවසේ තදා ।
ජාහ්නවීං සරිතාං ශ්රේෂ්ඨාං දදෘශුර්මුනිසේවිතාම් ॥ 7 ॥
තාං දෘෂ්ට්වා පුණ්යසලිලාං හංසසාරසසේවිතාම් ।
බභූවුර්මුදිතා ස්සර්වේ මුනයස්සහ රාඝවාඃ ॥ 8 ॥
තස්යාස්තීරේ තතශ්චක්රුස්ත ආවාසපරිග්රහම් ।
තතස්ස්නාත්වා යථාන්යායං සංතර්ප්ය පිතෘදේවතාඃ ॥ 9 ॥
හුත්වා චෛවාග්නිහෝත්රාණි ප්රාශ්ය චාමෘතවද්ධවිඃ ।
විවිශුර්ජාහ්නවීතීරේ ශුචෞ මුදිතමානසාඃ ॥ 10 ॥
විශ්වාමිත්රං මහාත්මානං පරිවාර්ය සමංතතඃ ।
අථ තත්ර තදා රාමෝ විශ්වාමිත්රමථාබ්රවීත් ॥ 11 ॥
භගවන් ශ්රෝතුමිච්ඡාමි ගංගාං ත්රිපථගාං නදීම් ।
ත්රෛලෝක්යං කථමාක්රම්ය ගතා නදනදීපතිම් ॥ 12 ॥
චෝදිතෝ රාමවාක්යේන විශ්වාමිත්රෝ මහාමුනිඃ ।
වෘද්ධිං ජන්ම ච ගංගායා වක්තුමේවෝපචක්රමේ ॥ 13 ॥
ශෛලේංද්රෝ හිමවාන්නාම ධාතූනාමාකරෝ මහාන් ।
තස්ය කන්යාද්වයං රාම රූපේණාප්රතිමං භුවි ॥ 14 ॥
යා මේරුදුහිතා රාම තයෝර්මාතා සුමධ්යමා ।
නාම්නා මනෝරමා නාම පත්නී හිමවතඃ ප්රියා ॥ 15 ॥
තස්යාං ගංගේයමභවජ්ජ්යේෂ්ඨා හිමවතස්සුතා ।
උමා නාම ද්විතීයාභූන්නාම්නා තස්යෛව රාඝව ॥ 16 ॥
අථ ජ්යේෂ්ඨාං සුරාස්සර්වේ දේවතාර්ථචිකීර්ෂයා ।
ශෛලේංද්රං වරයාමාසුර්ගංගාං ත්රිපථගාං නදීම් ॥ 17 ॥
දදෞ ධර්මේණ හිමවාන් තනයාං ලෝකපාවනීම් ।
ස්වච්ඡංදපථගාං ගංගාං ත්රෛලෝක්යහිතකාම්යයා ॥ 18 ॥
ප්රතිගෘහ්ය තතෝ දේවාස්ත්රිලෝකහිතකාරිණඃ ।
ගංගාමාදාය තේऽගච්ඡන් කෘතාර්ථේනාංතරාත්මනා ॥ 19 ॥
යා චාන්යා ශෛලදුහිතා කන්යාසීද්රඝුනංදන ।
උග්රං සා ව්රතමාස්ථාය තපස්තේපේ තපෝධනා ॥ 20 ॥
උග්රේණ තපසා යුක්තාං දදෞ ශෛලවරස්සුතාම් ।
රුද්රායාප්රතිරූපාය උමාං ලෝකනමස්කෘතාම් ॥ 21 ॥
ඒතේ තේ ශෛලරාජස්ය සුතේ ලෝකනමස්කෘතේ ।
ගංගා ච සරිතාං ශ්රේෂ්ඨා උමාදේවී ච රාඝව ॥ 22 ॥
ඒතත්තේ සර්වමාඛ්යාතං යථා ත්රිපථගා නදී ।
ඛං ගතා ප්රථමං තාත ගතිං ගතිමතාං වර ॥ 23 ॥
සෛෂා සුරනදී රම්යා ශෛලේංද්රස්ය සුතා තදා ।
සුරලෝකං සමාරූඪා විපාපා ජලවාහිනී ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ පංචත්රිංශස්සර්ගඃ ॥
