ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚତ୍ରିଂଶସ୍ସର୍ଗଃ ।
ଉପାସ୍ୟ ରାତ୍ରିଶେଷଂ ତୁ ଶୋଣାକୂଲେ ମହର୍ଷିଭିଃ ।
ନିଶାୟାଂ ସୁପ୍ରଭାତାୟାଂ ଵିଶ୍ଵାମିତ୍ରୋଽଭ୍ୟଭାଷତ ॥ 1 ॥
ସୁପ୍ରଭାତା ନିଶା ରାମ ପୂର୍ଵା ସଂଧ୍ୟା ପ୍ରଵର୍ତତେ ।
ଉତ୍ତିଷ୍ଠୋତ୍ତିଷ୍ଠ ଭଦ୍ରଂ ତେ ଗମନାୟାଭିରୋଚୟ ॥ 2 ॥
ତଚ୍ଛ୍ରୁତ୍ଵା ଵଚନଂ ତସ୍ୟ କୃତ୍ଵା ପୌର୍ଵାହ୍ଣିକୀଂ କ୍ରିୟାମ୍ ।
ଗମନଂ ରୋଚୟାମାସ ଵାକ୍ୟଂ ଚେଦମୁଵାଚ ହ ॥ 3 ॥
ଅୟଂ ଶୋଣଶ୍ଶୁଭଜଲୋଽଗାଧଃ ପୁଲିନମଂଡିତଃ ।
କତରେଣ ପଥା ବ୍ରହ୍ମନ୍ ସଂତରିଷ୍ୟାମହେ ଵୟମ୍ ॥ 4 ॥
ଏଵମୁକ୍ତସ୍ତୁ ରାମେଣ ଵିଶ୍ଵାମିତ୍ରୋଽବ୍ରଵୀଦିଦମ୍ ।
ଏଷ ପଂଥା ମୟୋଦ୍ଦିଷ୍ଟୋ ୟେନ ୟାଂତି ମହର୍ଷୟଃ ॥ 5 ॥
ଏଵମୁକ୍ତା ମହର୍ଷୟୋ ଵିଶ୍ଵାମିତ୍ରେଣ ଧୀମତା ।
ପଶ୍ୟଂତସ୍ତେ ପ୍ରୟାତା ଵୈ ଵନାନି ଵିଵିଧାନି ଚ ॥ 6 ॥
ତେ ଗତ୍ଵା ଦୂରମଧ୍ଵାନଂ ଗତେଽର୍ଧଦିଵସେ ତଦା ।
ଜାହ୍ନଵୀଂ ସରିତାଂ ଶ୍ରେଷ୍ଠାଂ ଦଦୃଶୁର୍ମୁନିସେଵିତାମ୍ ॥ 7 ॥
ତାଂ ଦୃଷ୍ଟ୍ଵା ପୁଣ୍ୟସଲିଲାଂ ହଂସସାରସସେଵିତାମ୍ ।
ବଭୂଵୁର୍ମୁଦିତା ସ୍ସର୍ଵେ ମୁନୟସ୍ସହ ରାଘଵାଃ ॥ 8 ॥
ତସ୍ୟାସ୍ତୀରେ ତତଶ୍ଚକ୍ରୁସ୍ତ ଆଵାସପରିଗ୍ରହମ୍ ।
ତତସ୍ସ୍ନାତ୍ଵା ୟଥାନ୍ୟାୟଂ ସଂତର୍ପ୍ୟ ପିତୃଦେଵତାଃ ॥ 9 ॥
ହୁତ୍ଵା ଚୈଵାଗ୍ନିହୋତ୍ରାଣି ପ୍ରାଶ୍ୟ ଚାମୃତଵଦ୍ଧଵିଃ ।
ଵିଵିଶୁର୍ଜାହ୍ନଵୀତୀରେ ଶୁଚୌ ମୁଦିତମାନସାଃ ॥ 10 ॥
ଵିଶ୍ଵାମିତ୍ରଂ ମହାତ୍ମାନଂ ପରିଵାର୍ୟ ସମଂତତଃ ।
ଅଥ ତତ୍ର ତଦା ରାମୋ ଵିଶ୍ଵାମିତ୍ରମଥାବ୍ରଵୀତ୍ ॥ 11 ॥
ଭଗଵନ୍ ଶ୍ରୋତୁମିଚ୍ଛାମି ଗଂଗାଂ ତ୍ରିପଥଗାଂ ନଦୀମ୍ ।
ତ୍ରୈଲୋକ୍ୟଂ କଥମାକ୍ରମ୍ୟ ଗତା ନଦନଦୀପତିମ୍ ॥ 12 ॥
ଚୋଦିତୋ ରାମଵାକ୍ୟେନ ଵିଶ୍ଵାମିତ୍ରୋ ମହାମୁନିଃ ।
ଵୃଦ୍ଧିଂ ଜନ୍ମ ଚ ଗଂଗାୟା ଵକ୍ତୁମେଵୋପଚକ୍ରମେ ॥ 13 ॥
ଶୈଲେଂଦ୍ରୋ ହିମଵାନ୍ନାମ ଧାତୂନାମାକରୋ ମହାନ୍ ।
ତସ୍ୟ କନ୍ୟାଦ୍ଵୟଂ ରାମ ରୂପେଣାପ୍ରତିମଂ ଭୁଵି ॥ 14 ॥
ୟା ମେରୁଦୁହିତା ରାମ ତୟୋର୍ମାତା ସୁମଧ୍ୟମା ।
ନାମ୍ନା ମନୋରମା ନାମ ପତ୍ନୀ ହିମଵତଃ ପ୍ରିୟା ॥ 15 ॥
ତସ୍ୟାଂ ଗଂଗେୟମଭଵଜ୍ଜ୍ୟେଷ୍ଠା ହିମଵତସ୍ସୁତା ।
ଉମା ନାମ ଦ୍ଵିତୀୟାଭୂନ୍ନାମ୍ନା ତସ୍ୟୈଵ ରାଘଵ ॥ 16 ॥
ଅଥ ଜ୍ୟେଷ୍ଠାଂ ସୁରାସ୍ସର୍ଵେ ଦେଵତାର୍ଥଚିକୀର୍ଷୟା ।
ଶୈଲେଂଦ୍ରଂ ଵରୟାମାସୁର୍ଗଂଗାଂ ତ୍ରିପଥଗାଂ ନଦୀମ୍ ॥ 17 ॥
ଦଦୌ ଧର୍ମେଣ ହିମଵାନ୍ ତନୟାଂ ଲୋକପାଵନୀମ୍ ।
ସ୍ଵଚ୍ଛଂଦପଥଗାଂ ଗଂଗାଂ ତ୍ରୈଲୋକ୍ୟହିତକାମ୍ୟୟା ॥ 18 ॥
ପ୍ରତିଗୃହ୍ୟ ତତୋ ଦେଵାସ୍ତ୍ରିଲୋକହିତକାରିଣଃ ।
ଗଂଗାମାଦାୟ ତେଽଗଚ୍ଛନ୍ କୃତାର୍ଥେନାଂତରାତ୍ମନା ॥ 19 ॥
ୟା ଚାନ୍ୟା ଶୈଲଦୁହିତା କନ୍ୟାସୀଦ୍ରଘୁନଂଦନ ।
ଉଗ୍ରଂ ସା ଵ୍ରତମାସ୍ଥାୟ ତପସ୍ତେପେ ତପୋଧନା ॥ 20 ॥
ଉଗ୍ରେଣ ତପସା ୟୁକ୍ତାଂ ଦଦୌ ଶୈଲଵରସ୍ସୁତାମ୍ ।
ରୁଦ୍ରାୟାପ୍ରତିରୂପାୟ ଉମାଂ ଲୋକନମସ୍କୃତାମ୍ ॥ 21 ॥
ଏତେ ତେ ଶୈଲରାଜସ୍ୟ ସୁତେ ଲୋକନମସ୍କୃତେ ।
ଗଂଗା ଚ ସରିତାଂ ଶ୍ରେଷ୍ଠା ଉମାଦେଵୀ ଚ ରାଘଵ ॥ 22 ॥
ଏତତ୍ତେ ସର୍ଵମାଖ୍ୟାତଂ ୟଥା ତ୍ରିପଥଗା ନଦୀ ।
ଖଂ ଗତା ପ୍ରଥମଂ ତାତ ଗତିଂ ଗତିମତାଂ ଵର ॥ 23 ॥
ସୈଷା ସୁରନଦୀ ରମ୍ୟା ଶୈଲେଂଦ୍ରସ୍ୟ ସୁତା ତଦା ।
ସୁରଲୋକଂ ସମାରୂଢା ଵିପାପା ଜଲଵାହିନୀ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚତ୍ରିଂଶସ୍ସର୍ଗଃ ॥
