శ్రీమద్వాల్మీకీయ రామాయణే బాలకాండమ్ ।
అథ పంచత్రింశస్సర్గః ।
ఉపాస్య రాత్రిశేషం తు శోణాకూలే మహర్షిభిః ।
నిశాయాం సుప్రభాతాయాం విశ్వామిత్రోఽభ్యభాషత ॥ 1 ॥
సుప్రభాతా నిశా రామ పూర్వా సంధ్యా ప్రవర్తతే ।
ఉత్తిష్ఠోత్తిష్ఠ భద్రం తే గమనాయాభిరోచయ ॥ 2 ॥
తచ్ఛ్రుత్వా వచనం తస్య కృత్వా పౌర్వాహ్ణికీం క్రియామ్ ।
గమనం రోచయామాస వాక్యం చేదమువాచ హ ॥ 3 ॥
అయం శోణశ్శుభజలోఽగాధః పులినమండితః ।
కతరేణ పథా బ్రహ్మన్ సంతరిష్యామహే వయమ్ ॥ 4 ॥
ఏవముక్తస్తు రామేణ విశ్వామిత్రోఽబ్రవీదిదమ్ ।
ఏష పంథా మయోద్దిష్టో యేన యాంతి మహర్షయః ॥ 5 ॥
ఏవముక్తా మహర్షయో విశ్వామిత్రేణ ధీమతా ।
పశ్యంతస్తే ప్రయాతా వై వనాని వివిధాని చ ॥ 6 ॥
తే గత్వా దూరమధ్వానం గతేఽర్ధదివసే తదా ।
జాహ్నవీం సరితాం శ్రేష్ఠాం దదృశుర్మునిసేవితామ్ ॥ 7 ॥
తాం దృష్ట్వా పుణ్యసలిలాం హంససారససేవితామ్ ।
బభూవుర్ముదితా స్సర్వే మునయస్సహ రాఘవాః ॥ 8 ॥
తస్యాస్తీరే తతశ్చక్రుస్త ఆవాసపరిగ్రహమ్ ।
తతస్స్నాత్వా యథాన్యాయం సంతర్ప్య పితృదేవతాః ॥ 9 ॥
హుత్వా చైవాగ్నిహోత్రాణి ప్రాశ్య చామృతవద్ధవిః ।
వివిశుర్జాహ్నవీతీరే శుచౌ ముదితమానసాః ॥ 10 ॥
విశ్వామిత్రం మహాత్మానం పరివార్య సమంతతః ।
అథ తత్ర తదా రామో విశ్వామిత్రమథాబ్రవీత్ ॥ 11 ॥
భగవన్ శ్రోతుమిచ్ఛామి గంగాం త్రిపథగాం నదీమ్ ।
త్రైలోక్యం కథమాక్రమ్య గతా నదనదీపతిమ్ ॥ 12 ॥
చోదితో రామవాక్యేన విశ్వామిత్రో మహామునిః ।
వృద్ధిం జన్మ చ గంగాయా వక్తుమేవోపచక్రమే ॥ 13 ॥
శైలేంద్రో హిమవాన్నామ ధాతూనామాకరో మహాన్ ।
తస్య కన్యాద్వయం రామ రూపేణాప్రతిమం భువి ॥ 14 ॥
యా మేరుదుహితా రామ తయోర్మాతా సుమధ్యమా ।
నామ్నా మనోరమా నామ పత్నీ హిమవతః ప్రియా ॥ 15 ॥
తస్యాం గంగేయమభవజ్జ్యేష్ఠా హిమవతస్సుతా ।
ఉమా నామ ద్వితీయాభూన్నామ్నా తస్యైవ రాఘవ ॥ 16 ॥
అథ జ్యేష్ఠాం సురాస్సర్వే దేవతార్థచికీర్షయా ।
శైలేంద్రం వరయామాసుర్గంగాం త్రిపథగాం నదీమ్ ॥ 17 ॥
దదౌ ధర్మేణ హిమవాన్ తనయాం లోకపావనీమ్ ।
స్వచ్ఛందపథగాం గంగాం త్రైలోక్యహితకామ్యయా ॥ 18 ॥
ప్రతిగృహ్య తతో దేవాస్త్రిలోకహితకారిణః ।
గంగామాదాయ తేఽగచ్ఛన్ కృతార్థేనాంతరాత్మనా ॥ 19 ॥
యా చాన్యా శైలదుహితా కన్యాసీద్రఘునందన ।
ఉగ్రం సా వ్రతమాస్థాయ తపస్తేపే తపోధనా ॥ 20 ॥
ఉగ్రేణ తపసా యుక్తాం దదౌ శైలవరస్సుతామ్ ।
రుద్రాయాప్రతిరూపాయ ఉమాం లోకనమస్కృతామ్ ॥ 21 ॥
ఏతే తే శైలరాజస్య సుతే లోకనమస్కృతే ।
గంగా చ సరితాం శ్రేష్ఠా ఉమాదేవీ చ రాఘవ ॥ 22 ॥
ఏతత్తే సర్వమాఖ్యాతం యథా త్రిపథగా నదీ ।
ఖం గతా ప్రథమం తాత గతిం గతిమతాం వర ॥ 23 ॥
సైషా సురనదీ రమ్యా శైలేంద్రస్య సుతా తదా ।
సురలోకం సమారూఢా విపాపా జలవాహినీ ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే పంచత్రింశస్సర్గః ॥
