ശ്രീമദ്വാല്മീകീയ രാമായണേ ബാലകാംഡമ് ।
അഥ പംചത്രിംശസ്സര്ഗഃ ।
ഉപാസ്യ രാത്രിശേഷം തു ശോണാകൂലേ മഹര്ഷിഭിഃ ।
നിശായാം സുപ്രഭാതായാം വിശ്വാമിത്രോഽഭ്യഭാഷത ॥ 1 ॥
സുപ്രഭാതാ നിശാ രാമ പൂർവാ സംധ്യാ പ്രവര്തതേ ।
ഉത്തിഷ്ഠോത്തിഷ്ഠ ഭദ്രം തേ ഗമനായാഭിരോചയ ॥ 2 ॥
തച്ഛ്രുത്വാ വചനം തസ്യ കൃത്വാ പൌർവാഹ്ണികീം ക്രിയാമ് ।
ഗമനം രോചയാമാസ വാക്യം ചേദമുവാച ഹ ॥ 3 ॥
അയം ശോണശ്ശുഭജലോഽഗാധഃ പുലിനമംഡിതഃ ।
കതരേണ പഥാ ബ്രഹ്മന് സംതരിഷ്യാമഹേ വയമ് ॥ 4 ॥
ഏവമുക്തസ്തു രാമേണ വിശ്വാമിത്രോഽബ്രവീദിദമ് ।
ഏഷ പംഥാ മയോദ്ദിഷ്ടോ യേന യാംതി മഹര്ഷയഃ ॥ 5 ॥
ഏവമുക്താ മഹര്ഷയോ വിശ്വാമിത്രേണ ധീമതാ ।
പശ്യംതസ്തേ പ്രയാതാ വൈ വനാനി വിവിധാനി ച ॥ 6 ॥
തേ ഗത്വാ ദൂരമധ്വാനം ഗതേഽര്ധദിവസേ തദാ ।
ജാഹ്നവീം സരിതാം ശ്രേഷ്ഠാം ദദൃശുര്മുനിസേവിതാമ് ॥ 7 ॥
താം ദൃഷ്ട്വാ പുണ്യസലിലാം ഹംസസാരസസേവിതാമ് ।
ബഭൂവുര്മുദിതാ സ്സർവേ മുനയസ്സഹ രാഘവാഃ ॥ 8 ॥
തസ്യാസ്തീരേ തതശ്ചക്രുസ്ത ആവാസപരിഗ്രഹമ് ।
തതസ്സ്നാത്വാ യഥാന്യായം സംതര്പ്യ പിതൃദേവതാഃ ॥ 9 ॥
ഹുത്വാ ചൈവാഗ്നിഹോത്രാണി പ്രാശ്യ ചാമൃതവദ്ധവിഃ ।
വിവിശുര്ജാഹ്നവീതീരേ ശുചൌ മുദിതമാനസാഃ ॥ 10 ॥
വിശ്വാമിത്രം മഹാത്മാനം പരിവാര്യ സമംതതഃ ।
അഥ തത്ര തദാ രാമോ വിശ്വാമിത്രമഥാബ്രവീത് ॥ 11 ॥
ഭഗവന് ശ്രോതുമിച്ഛാമി ഗംഗാം ത്രിപഥഗാം നദീമ് ।
ത്രൈലോക്യം കഥമാക്രമ്യ ഗതാ നദനദീപതിമ് ॥ 12 ॥
ചോദിതോ രാമവാക്യേന വിശ്വാമിത്രോ മഹാമുനിഃ ।
വൃദ്ധിം ജന്മ ച ഗംഗായാ വക്തുമേവോപചക്രമേ ॥ 13 ॥
ശൈലേംദ്രോ ഹിമവാന്നാമ ധാതൂനാമാകരോ മഹാന് ।
തസ്യ കന്യാദ്വയം രാമ രൂപേണാപ്രതിമം ഭുവി ॥ 14 ॥
യാ മേരുദുഹിതാ രാമ തയോര്മാതാ സുമധ്യമാ ।
നാമ്നാ മനോരമാ നാമ പത്നീ ഹിമവതഃ പ്രിയാ ॥ 15 ॥
തസ്യാം ഗംഗേയമഭവജ്ജ്യേഷ്ഠാ ഹിമവതസ്സുതാ ।
ഉമാ നാമ ദ്വിതീയാഭൂന്നാമ്നാ തസ്യൈവ രാഘവ ॥ 16 ॥
അഥ ജ്യേഷ്ഠാം സുരാസ്സർവേ ദേവതാര്ഥചികീര്ഷയാ ।
ശൈലേംദ്രം വരയാമാസുര്ഗംഗാം ത്രിപഥഗാം നദീമ് ॥ 17 ॥
ദദൌ ധര്മേണ ഹിമവാന് തനയാം ലോകപാവനീമ് ।
സ്വച്ഛംദപഥഗാം ഗംഗാം ത്രൈലോക്യഹിതകാമ്യയാ ॥ 18 ॥
പ്രതിഗൃഹ്യ തതോ ദേവാസ്ത്രിലോകഹിതകാരിണഃ ।
ഗംഗാമാദായ തേഽഗച്ഛന് കൃതാര്ഥേനാംതരാത്മനാ ॥ 19 ॥
യാ ചാന്യാ ശൈലദുഹിതാ കന്യാസീദ്രഘുനംദന ।
ഉഗ്രം സാ വ്രതമാസ്ഥായ തപസ്തേപേ തപോധനാ ॥ 20 ॥
ഉഗ്രേണ തപസാ യുക്താം ദദൌ ശൈലവരസ്സുതാമ് ।
രുദ്രായാപ്രതിരൂപായ ഉമാം ലോകനമസ്കൃതാമ് ॥ 21 ॥
ഏതേ തേ ശൈലരാജസ്യ സുതേ ലോകനമസ്കൃതേ ।
ഗംഗാ ച സരിതാം ശ്രേഷ്ഠാ ഉമാദേവീ ച രാഘവ ॥ 22 ॥
ഏതത്തേ സർവമാഖ്യാതം യഥാ ത്രിപഥഗാ നദീ ।
ഖം ഗതാ പ്രഥമം താത ഗതിം ഗതിമതാം വര ॥ 23 ॥
സൈഷാ സുരനദീ രമ്യാ ശൈലേംദ്രസ്യ സുതാ തദാ ।
സുരലോകം സമാരൂഢാ വിപാപാ ജലവാഹിനീ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചത്രിംശസ്സര്ഗഃ ॥
