શ્રીમદ્વાલ્મીકીય રામાયણે બાલકાંડમ્ ।
અથ પંચત્રિંશસ્સર્ગઃ ।
ઉપાસ્ય રાત્રિશેષં તુ શોણાકૂલે મહર્ષિભિઃ ।
નિશાયાં સુપ્રભાતાયાં વિશ્વામિત્રોઽભ્યભાષત ॥ 1 ॥
સુપ્રભાતા નિશા રામ પૂર્વા સંધ્યા પ્રવર્તતે ।
ઉત્તિષ્ઠોત્તિષ્ઠ ભદ્રં તે ગમનાયાભિરોચય ॥ 2 ॥
તચ્છ્રુત્વા વચનં તસ્ય કૃત્વા પૌર્વાહ્ણિકીં ક્રિયામ્ ।
ગમનં રોચયામાસ વાક્યં ચેદમુવાચ હ ॥ 3 ॥
અયં શોણશ્શુભજલોઽગાધઃ પુલિનમંડિતઃ ।
કતરેણ પથા બ્રહ્મન્ સંતરિષ્યામહે વયમ્ ॥ 4 ॥
એવમુક્તસ્તુ રામેણ વિશ્વામિત્રોઽબ્રવીદિદમ્ ।
એષ પંથા મયોદ્દિષ્ટો યેન યાંતિ મહર્ષયઃ ॥ 5 ॥
એવમુક્તા મહર્ષયો વિશ્વામિત્રેણ ધીમતા ।
પશ્યંતસ્તે પ્રયાતા વૈ વનાનિ વિવિધાનિ ચ ॥ 6 ॥
તે ગત્વા દૂરમધ્વાનં ગતેઽર્ધદિવસે તદા ।
જાહ્નવીં સરિતાં શ્રેષ્ઠાં દદૃશુર્મુનિસેવિતામ્ ॥ 7 ॥
તાં દૃષ્ટ્વા પુણ્યસલિલાં હંસસારસસેવિતામ્ ।
બભૂવુર્મુદિતા સ્સર્વે મુનયસ્સહ રાઘવાઃ ॥ 8 ॥
તસ્યાસ્તીરે તતશ્ચક્રુસ્ત આવાસપરિગ્રહમ્ ।
તતસ્સ્નાત્વા યથાન્યાયં સંતર્પ્ય પિતૃદેવતાઃ ॥ 9 ॥
હુત્વા ચૈવાગ્નિહોત્રાણિ પ્રાશ્ય ચામૃતવદ્ધવિઃ ।
વિવિશુર્જાહ્નવીતીરે શુચૌ મુદિતમાનસાઃ ॥ 10 ॥
વિશ્વામિત્રં મહાત્માનં પરિવાર્ય સમંતતઃ ।
અથ તત્ર તદા રામો વિશ્વામિત્રમથાબ્રવીત્ ॥ 11 ॥
ભગવન્ શ્રોતુમિચ્છામિ ગંગાં ત્રિપથગાં નદીમ્ ।
ત્રૈલોક્યં કથમાક્રમ્ય ગતા નદનદીપતિમ્ ॥ 12 ॥
ચોદિતો રામવાક્યેન વિશ્વામિત્રો મહામુનિઃ ।
વૃદ્ધિં જન્મ ચ ગંગાયા વક્તુમેવોપચક્રમે ॥ 13 ॥
શૈલેંદ્રો હિમવાન્નામ ધાતૂનામાકરો મહાન્ ।
તસ્ય કન્યાદ્વયં રામ રૂપેણાપ્રતિમં ભુવિ ॥ 14 ॥
યા મેરુદુહિતા રામ તયોર્માતા સુમધ્યમા ।
નામ્ના મનોરમા નામ પત્ની હિમવતઃ પ્રિયા ॥ 15 ॥
તસ્યાં ગંગેયમભવજ્જ્યેષ્ઠા હિમવતસ્સુતા ।
ઉમા નામ દ્વિતીયાભૂન્નામ્ના તસ્યૈવ રાઘવ ॥ 16 ॥
અથ જ્યેષ્ઠાં સુરાસ્સર્વે દેવતાર્થચિકીર્ષયા ।
શૈલેંદ્રં વરયામાસુર્ગંગાં ત્રિપથગાં નદીમ્ ॥ 17 ॥
દદૌ ધર્મેણ હિમવાન્ તનયાં લોકપાવનીમ્ ।
સ્વચ્છંદપથગાં ગંગાં ત્રૈલોક્યહિતકામ્યયા ॥ 18 ॥
પ્રતિગૃહ્ય તતો દેવાસ્ત્રિલોકહિતકારિણઃ ।
ગંગામાદાય તેઽગચ્છન્ કૃતાર્થેનાંતરાત્મના ॥ 19 ॥
યા ચાન્યા શૈલદુહિતા કન્યાસીદ્રઘુનંદન ।
ઉગ્રં સા વ્રતમાસ્થાય તપસ્તેપે તપોધના ॥ 20 ॥
ઉગ્રેણ તપસા યુક્તાં દદૌ શૈલવરસ્સુતામ્ ।
રુદ્રાયાપ્રતિરૂપાય ઉમાં લોકનમસ્કૃતામ્ ॥ 21 ॥
એતે તે શૈલરાજસ્ય સુતે લોકનમસ્કૃતે ।
ગંગા ચ સરિતાં શ્રેષ્ઠા ઉમાદેવી ચ રાઘવ ॥ 22 ॥
એતત્તે સર્વમાખ્યાતં યથા ત્રિપથગા નદી ।
ખં ગતા પ્રથમં તાત ગતિં ગતિમતાં વર ॥ 23 ॥
સૈષા સુરનદી રમ્યા શૈલેંદ્રસ્ય સુતા તદા ।
સુરલોકં સમારૂઢા વિપાપા જલવાહિની ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે પંચત્રિંશસ્સર્ગઃ ॥
