ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଅଷ୍ଟଷଷ୍ଟିତମସ୍ସର୍ଗଃ ।
ଜନକେନ ସମାଦିଷ୍ଟା ଦୂତାସ୍ତେ କ୍ଲାଂତଵାହନାଃ ।
ତ୍ରିରାତ୍ରମୁଷିତା ମାର୍ଗେ ତେଽୟୋଧ୍ୟାଂ ପ୍ରାଵିଶନ୍ ପୁରୀମ୍ ॥ 1 ॥
ରାଜ୍ଞୋ ଭଵନମାସାଦ୍ୟ ଦ୍ଵାରସ୍ଥାନିଦମବ୍ରୁଵନ୍ ।
ଶୀଘ୍ରଂ ନିଵେଦ୍ୟତାଂ ରାଜ୍ଞେ ଦୂତାନ୍ନୋ ଜନକସ୍ୟ ଚ ॥ 2 ॥
ଇତ୍ୟୁକ୍ତା ଦ୍ଵାରପାଲାସ୍ତେ ରାଘଵାୟ ନ୍ୟଵେଦୟନ୍ ।
ତେ ରାଜଵଚନାଦ୍ଦୂତା ରାଜଵେଶ୍ମପ୍ରଵେଶିତାଃ ।
ଦଦୃଶୁର୍ଦେଵସଂକାଶଂ ଵୃଦ୍ଧଂ ଦଶରଥଂ ନୃପମ୍ ॥ 3 ॥
ବଦ୍ଧାଂଜଲିପୁଟା ସ୍ସର୍ଵେ ଦୂତା ଵିଗତସାଧ୍ଵସାଃ ।
ରାଜାନଂ ପ୍ରୟତା ଵାକ୍ୟମବ୍ରୁଵନ୍ମଧୁରାକ୍ଷରମ୍ ॥ 4 ॥
ମୈଥିଲୋ ଜନକୋ ରାଜା ସାଗ୍ନିହୋତ୍ରପୁରସ୍କୃତମ୍ ।
କୁଶଲଂ ଚାଵ୍ୟୟଂ ଚୈଵ ସୋପାଧ୍ୟାୟପୁରୋହିତମ୍ ॥ 5 ॥
ମୁହୁର୍ମୁହୁର୍ମଧୁରୟା ସ୍ନେହସଂୟୁକ୍ତୟା ଗିରା ।
ଜନକସ୍ତ୍ଵାଂ ମହାରାଜ ପୃଚ୍ଛତେ ସପୁରସ୍ସରମ୍ ॥ 6 ॥
ପୃଷ୍ଟ୍ଵା କୁଶଲମଵ୍ୟଗ୍ରଂ ଵୈଦେହୋ ମିଥିଲାଧିପଃ ।
କୌଶିକାନୁମତେ ଵାକ୍ୟଂ ଭଵଂତମିଦମବ୍ରଵୀତ୍ ॥ 7 ॥
ପୂର୍ଵଂ ପ୍ରତିଜ୍ଞା ଵିଦିତା ଵୀର୍ୟଶୁଲ୍କା ମମାତ୍ମଜା ।
ରାଜାନଶ୍ଚ କୃତାମର୍ଷାନିର୍ଵୀର୍ୟା ଵିମୁଖୀକୃତାଃ ॥ 8 ॥
ସେୟଂ ମମ ସୁତା ରାଜନ୍ ଵିଶ୍ଵାମିତ୍ରପୁରସ୍ସରୈଃ ।
ୟଦୃଚ୍ଛୟାଗତୈର୍ଵୀରୈର୍ନିର୍ଜିତା ତଵ ପୁତ୍ରକୈଃ ॥ 9 ॥
ତଚ୍ଚ ରାଜନ୍ ଧନୁର୍ଦିଵ୍ୟଂ ମଧ୍ୟେ ଭଗ୍ନଂ ମହାତ୍ମନା ।
ରାମେଣ ହି ମହାରାଜ ମହତ୍ୟାଂ ଜନସଂସଦି ॥ 10 ॥
ଅସ୍ମୈ ଦେୟା ମୟା ସୀତା ଵୀର୍ୟଶୁଲ୍କା ମହାତ୍ମନେ ।
ପ୍ରତିଜ୍ଞାଂ କର୍ତୁମିଚ୍ଛାମି ତଦନୁଜ୍ଞାତୁମର୍ହସି ॥ 11 ॥
ସୋପାଧ୍ୟାୟୋ ମହାରାଜ ପୁରୋହିତପୁରସ୍ସରଃ ।
ଶୀଘ୍ରମାଗଚ୍ଛ ଭଦ୍ରଂ ତେ ଦ୍ରଷ୍ଟୁମର୍ହସି ରାଘଵୌ ॥ 12 ॥
ପ୍ରୀତିଂ ଚ ମମ ରାଜେଂଦ୍ର ନିର୍ଵର୍ତୟିତୁମର୍ହସି ।
ପୁତ୍ରୟୋରୁଭୟୋରେଵ ପ୍ରୀତିଂ ତ୍ଵମପି ଲପ୍ସ୍ୟସେ ॥ 13 ॥
ଏଵଂ ଵିଦେହାଧିପତିର୍ମଧୁରଂ ଵାକ୍ୟମବ୍ରଵୀତ୍ ॥ 14 ॥
ଵିଶ୍ଵାମିତ୍ରାଭ୍ୟନୁଜ୍ଞାତ ଶ୍ଶତାନଂଦମତେ ସ୍ଥିତଃ ।
ଇତ୍ୟୁକ୍ତ୍ଵା ଵିରତା ଦୂତା ରାଜଗୌରଵଶଂକିତାଃ ॥ 15 ॥
ଦୂତଵାକ୍ୟଂ ଚ ତଚ୍ଛ୍ରୁତ୍ଵା ରାଜା ପରମହର୍ଷିତଃ ।
ଵସିଷ୍ଠଂ ଵାମଦେଵଂ ଚ ମଂତ୍ରିଣୋଽନ୍ୟାଂଶ୍ଚ ସୋଽବ୍ରଵୀତ୍ ॥ 16 ॥
ଗୁପ୍ତଃ କୁଶିକପୁତ୍ରେଣ କୌସଲ୍ୟାନଂଦଵର୍ଧନଃ ।
ଲକ୍ଷ୍ମଣେନ ସହ ଭ୍ରାତ୍ରା ଵିଦେହେଷୁ ଵସତ୍ୟସୌ ॥ 17 ॥
ଦୃଷ୍ଟଵୀର୍ୟସ୍ତୁ କାକୁତ୍ସ୍ଥୋ ଜନକେନ ମହାତ୍ମନା ।
ସଂପ୍ରଦାନଂ ସୁତାୟାସ୍ତୁ ରାଘଵେ କର୍ତୁମିଚ୍ଛତି ॥ 18 ॥
ୟଦି ଵୋ ରୋଚତେ ଵୃତ୍ତଂ ଜନକସ୍ୟ ମହାତ୍ମନଃ ।
ପୁରୀଂ ଗଚ୍ଛାମହେ ଶୀଘ୍ରଂ ମା ଭୂତ୍କାଲସ୍ୟ ପର୍ୟୟଃ ॥ 19 ॥
ମଂତ୍ରିଣୋ ବାଢମିତ୍ୟାହୁଃ ସହ ସର୍ଵୈର୍ମହର୍ଷିଭିଃ ।
ସୁପ୍ରୀତଶ୍ଚାବ୍ରଵୀଦ୍ରାଜା ଶ୍ଵୋ ୟାତ୍ରେତି ସ ମଂତ୍ରିଣଃ ॥ 20 ॥
ମଂତ୍ରିଣସ୍ତୁ ନରେଂଦ୍ରସ୍ୟ ରାତ୍ରିଂ ପରମସତ୍କୃତାଃ ।
ଊଷୁ ସ୍ତେମୁଦିତା ସ୍ସର୍ଵେ ଗୁଣୈ ସ୍ସର୍ଵୈସ୍ସମନ୍ଵିତାଃ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଅଷ୍ଟଷଷ୍ଟିତମସ୍ସର୍ଗଃ ॥
