śrīmadvālmīkīya rāmāyaṇē bālakāṇḍam ।
atha aṣṭaṣaṣṭitamassargaḥ ।
janakēna samādiṣṭā dūtāstē klāntavāhanāḥ ।
trirātramuṣitā mārgē tē'yōdhyāṃ prāviśan purīm ॥ 1 ॥
rājñō bhavanamāsādya dvārasthānidamabruvan ।
śīghraṃ nivēdyatāṃ rājñē dūtānnō janakasya cha ॥ 2 ॥
ityuktā dvārapālāstē rāghavāya nyavēdayan ।
tē rājavachanāddūtā rājavēśmapravēśitāḥ ।
dadṛśurdēvasaṅkāśaṃ vṛddhaṃ daśarathaṃ nṛpam ॥ 3 ॥
baddhāñjalipuṭā ssarvē dūtā vigatasādhvasāḥ ।
rājānaṃ prayatā vākyamabruvanmadhurākṣaram ॥ 4 ॥
maithilō janakō rājā sāgnihōtrapuraskṛtam ।
kuśalaṃ chāvyayaṃ chaiva sōpādhyāyapurōhitam ॥ 5 ॥
muhurmuhurmadhurayā snēhasaṃyuktayā girā ।
janakastvāṃ mahārāja pṛchChatē sapurassaram ॥ 6 ॥
pṛṣṭvā kuśalamavyagraṃ vaidēhō mithilādhipaḥ ।
kauśikānumatē vākyaṃ bhavantamidamabravīt ॥ 7 ॥
pūrvaṃ pratijñā viditā vīryaśulkā mamātmajā ।
rājānaścha kṛtāmarṣānirvīryā vimukhīkṛtāḥ ॥ 8 ॥
sēyaṃ mama sutā rājan viśvāmitrapurassaraiḥ ।
yadṛchChayāgatairvīrairnirjitā tava putrakaiḥ ॥ 9 ॥
tachcha rājan dhanurdivyaṃ madhyē bhagnaṃ mahātmanā ।
rāmēṇa hi mahārāja mahatyāṃ janasaṃsadi ॥ 10 ॥
asmai dēyā mayā sītā vīryaśulkā mahātmanē ।
pratijñāṃ kartumichChāmi tadanujñātumarhasi ॥ 11 ॥
sōpādhyāyō mahārāja purōhitapurassaraḥ ।
śīghramāgachCha bhadraṃ tē draṣṭumarhasi rāghavau ॥ 12 ॥
prītiṃ cha mama rājēndra nirvartayitumarhasi ।
putrayōrubhayōrēva prītiṃ tvamapi lapsyasē ॥ 13 ॥
ēvaṃ vidēhādhipatirmadhuraṃ vākyamabravīt ॥ 14 ॥
viśvāmitrābhyanujñāta śśatānandamatē sthitaḥ ।
ityuktvā viratā dūtā rājagauravaśaṅkitāḥ ॥ 15 ॥
dūtavākyaṃ cha tachChrutvā rājā paramaharṣitaḥ ।
vasiṣṭhaṃ vāmadēvaṃ cha mantriṇō'nyāṃścha sō'bravīt ॥ 16 ॥
guptaḥ kuśikaputrēṇa kausalyānandavardhanaḥ ।
lakṣmaṇēna saha bhrātrā vidēhēṣu vasatyasau ॥ 17 ॥
dṛṣṭavīryastu kākutsthō janakēna mahātmanā ।
sampradānaṃ sutāyāstu rāghavē kartumichChati ॥ 18 ॥
yadi vō rōchatē vṛttaṃ janakasya mahātmanaḥ ।
purīṃ gachChāmahē śīghraṃ mā bhūtkālasya paryayaḥ ॥ 19 ॥
mantriṇō bāḍhamityāhuḥ saha sarvairmaharṣibhiḥ ।
suprītaśchābravīdrājā śvō yātrēti sa mantriṇaḥ ॥ 20 ॥
mantriṇastu narēndrasya rātriṃ paramasatkṛtāḥ ।
ūṣu stēmuditā ssarvē guṇai ssarvaissamanvitāḥ ॥ 21 ॥
ityārṣē śrīmadrāmāyaṇē vālmīkīya ādikāvyē bālakāṇḍē aṣṭaṣaṣṭitamassargaḥ ॥
