ශ්රීමද්වාල්මීකීය රාමායණේ බාලකාංඩම් ।
අථ අෂ්ටෂෂ්ටිතමස්සර්ගඃ ।
ජනකේන සමාදිෂ්ටා දූතාස්තේ ක්ලාංතවාහනාඃ ।
ත්රිරාත්රමුෂිතා මාර්ගේ තේऽයෝධ්යාං ප්රාවිශන් පුරීම් ॥ 1 ॥
රාජ්ඤෝ භවනමාසාද්ය ද්වාරස්ථානිදමබ්රුවන් ।
ශීඝ්රං නිවේද්යතාං රාජ්ඤේ දූතාන්නෝ ජනකස්ය ච ॥ 2 ॥
ඉත්යුක්තා ද්වාරපාලාස්තේ රාඝවාය න්යවේදයන් ।
තේ රාජවචනාද්දූතා රාජවේශ්මප්රවේශිතාඃ ।
දදෘශුර්දේවසංකාශං වෘද්ධං දශරථං නෘපම් ॥ 3 ॥
බද්ධාංජලිපුටා ස්සර්වේ දූතා විගතසාධ්වසාඃ ।
රාජානං ප්රයතා වාක්යමබ්රුවන්මධුරාක්ෂරම් ॥ 4 ॥
මෛථිලෝ ජනකෝ රාජා සාග්නිහෝත්රපුරස්කෘතම් ।
කුශලං චාව්යයං චෛව සෝපාධ්යායපුරෝහිතම් ॥ 5 ॥
මුහුර්මුහුර්මධුරයා ස්නේහසංයුක්තයා ගිරා ।
ජනකස්ත්වාං මහාරාජ පෘච්ඡතේ සපුරස්සරම් ॥ 6 ॥
පෘෂ්ට්වා කුශලමව්යග්රං වෛදේහෝ මිථිලාධිපඃ ।
කෞශිකානුමතේ වාක්යං භවංතමිදමබ්රවීත් ॥ 7 ॥
පූර්වං ප්රතිජ්ඤා විදිතා වීර්යශුල්කා මමාත්මජා ।
රාජානශ්ච කෘතාමර්ෂානිර්වීර්යා විමුඛීකෘතාඃ ॥ 8 ॥
සේයං මම සුතා රාජන් විශ්වාමිත්රපුරස්සරෛඃ ।
යදෘච්ඡයාගතෛර්වීරෛර්නිර්ජිතා තව පුත්රකෛඃ ॥ 9 ॥
තච්ච රාජන් ධනුර්දිව්යං මධ්යේ භග්නං මහාත්මනා ।
රාමේණ හි මහාරාජ මහත්යාං ජනසංසදි ॥ 10 ॥
අස්මෛ දේයා මයා සීතා වීර්යශුල්කා මහාත්මනේ ।
ප්රතිජ්ඤාං කර්තුමිච්ඡාමි තදනුජ්ඤාතුමර්හසි ॥ 11 ॥
සෝපාධ්යායෝ මහාරාජ පුරෝහිතපුරස්සරඃ ।
ශීඝ්රමාගච්ඡ භද්රං තේ ද්රෂ්ටුමර්හසි රාඝවෞ ॥ 12 ॥
ප්රීතිං ච මම රාජේංද්ර නිර්වර්තයිතුමර්හසි ।
පුත්රයෝරුභයෝරේව ප්රීතිං ත්වමපි ලප්ස්යසේ ॥ 13 ॥
ඒවං විදේහාධිපතිර්මධුරං වාක්යමබ්රවීත් ॥ 14 ॥
විශ්වාමිත්රාභ්යනුජ්ඤාත ශ්ශතානංදමතේ ස්ථිතඃ ।
ඉත්යුක්ත්වා විරතා දූතා රාජගෞරවශංකිතාඃ ॥ 15 ॥
දූතවාක්යං ච තච්ඡ්රුත්වා රාජා පරමහර්ෂිතඃ ।
වසිෂ්ඨං වාමදේවං ච මංත්රිණෝऽන්යාංශ්ච සෝऽබ්රවීත් ॥ 16 ॥
ගුප්තඃ කුශිකපුත්රේණ කෞසල්යානංදවර්ධනඃ ।
ලක්ෂ්මණේන සහ භ්රාත්රා විදේහේෂු වසත්යසෞ ॥ 17 ॥
දෘෂ්ටවීර්යස්තු කාකුත්ස්ථෝ ජනකේන මහාත්මනා ।
සංප්රදානං සුතායාස්තු රාඝවේ කර්තුමිච්ඡති ॥ 18 ॥
යදි වෝ රෝචතේ වෘත්තං ජනකස්ය මහාත්මනඃ ।
පුරීං ගච්ඡාමහේ ශීඝ්රං මා භූත්කාලස්ය පර්යයඃ ॥ 19 ॥
මංත්රිණෝ බාඪමිත්යාහුඃ සහ සර්වෛර්මහර්ෂිභිඃ ।
සුප්රීතශ්චාබ්රවීද්රාජා ශ්වෝ යාත්රේති ස මංත්රිණඃ ॥ 20 ॥
මංත්රිණස්තු නරේංද්රස්ය රාත්රිං පරමසත්කෘතාඃ ।
ඌෂු ස්තේමුදිතා ස්සර්වේ ගුණෛ ස්සර්වෛස්සමන්විතාඃ ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටෂෂ්ටිතමස්සර්ගඃ ॥
