શ્રીમદ્વાલ્મીકીય રામાયણે બાલકાંડમ્ ।
અથ અષ્ટષષ્ટિતમસ્સર્ગઃ ।
જનકેન સમાદિષ્ટા દૂતાસ્તે ક્લાંતવાહનાઃ ।
ત્રિરાત્રમુષિતા માર્ગે તેઽયોધ્યાં પ્રાવિશન્ પુરીમ્ ॥ 1 ॥
રાજ્ઞો ભવનમાસાદ્ય દ્વારસ્થાનિદમબ્રુવન્ ।
શીઘ્રં નિવેદ્યતાં રાજ્ઞે દૂતાન્નો જનકસ્ય ચ ॥ 2 ॥
ઇત્યુક્તા દ્વારપાલાસ્તે રાઘવાય ન્યવેદયન્ ।
તે રાજવચનાદ્દૂતા રાજવેશ્મપ્રવેશિતાઃ ।
દદૃશુર્દેવસંકાશં વૃદ્ધં દશરથં નૃપમ્ ॥ 3 ॥
બદ્ધાંજલિપુટા સ્સર્વે દૂતા વિગતસાધ્વસાઃ ।
રાજાનં પ્રયતા વાક્યમબ્રુવન્મધુરાક્ષરમ્ ॥ 4 ॥
મૈથિલો જનકો રાજા સાગ્નિહોત્રપુરસ્કૃતમ્ ।
કુશલં ચાવ્યયં ચૈવ સોપાધ્યાયપુરોહિતમ્ ॥ 5 ॥
મુહુર્મુહુર્મધુરયા સ્નેહસંયુક્તયા ગિરા ।
જનકસ્ત્વાં મહારાજ પૃચ્છતે સપુરસ્સરમ્ ॥ 6 ॥
પૃષ્ટ્વા કુશલમવ્યગ્રં વૈદેહો મિથિલાધિપઃ ।
કૌશિકાનુમતે વાક્યં ભવંતમિદમબ્રવીત્ ॥ 7 ॥
પૂર્વં પ્રતિજ્ઞા વિદિતા વીર્યશુલ્કા મમાત્મજા ।
રાજાનશ્ચ કૃતામર્ષાનિર્વીર્યા વિમુખીકૃતાઃ ॥ 8 ॥
સેયં મમ સુતા રાજન્ વિશ્વામિત્રપુરસ્સરૈઃ ।
યદૃચ્છયાગતૈર્વીરૈર્નિર્જિતા તવ પુત્રકૈઃ ॥ 9 ॥
તચ્ચ રાજન્ ધનુર્દિવ્યં મધ્યે ભગ્નં મહાત્મના ।
રામેણ હિ મહારાજ મહત્યાં જનસંસદિ ॥ 10 ॥
અસ્મૈ દેયા મયા સીતા વીર્યશુલ્કા મહાત્મને ।
પ્રતિજ્ઞાં કર્તુમિચ્છામિ તદનુજ્ઞાતુમર્હસિ ॥ 11 ॥
સોપાધ્યાયો મહારાજ પુરોહિતપુરસ્સરઃ ।
શીઘ્રમાગચ્છ ભદ્રં તે દ્રષ્ટુમર્હસિ રાઘવૌ ॥ 12 ॥
પ્રીતિં ચ મમ રાજેંદ્ર નિર્વર્તયિતુમર્હસિ ।
પુત્રયોરુભયોરેવ પ્રીતિં ત્વમપિ લપ્સ્યસે ॥ 13 ॥
એવં વિદેહાધિપતિર્મધુરં વાક્યમબ્રવીત્ ॥ 14 ॥
વિશ્વામિત્રાભ્યનુજ્ઞાત શ્શતાનંદમતે સ્થિતઃ ।
ઇત્યુક્ત્વા વિરતા દૂતા રાજગૌરવશંકિતાઃ ॥ 15 ॥
દૂતવાક્યં ચ તચ્છ્રુત્વા રાજા પરમહર્ષિતઃ ।
વસિષ્ઠં વામદેવં ચ મંત્રિણોઽન્યાંશ્ચ સોઽબ્રવીત્ ॥ 16 ॥
ગુપ્તઃ કુશિકપુત્રેણ કૌસલ્યાનંદવર્ધનઃ ।
લક્ષ્મણેન સહ ભ્રાત્રા વિદેહેષુ વસત્યસૌ ॥ 17 ॥
દૃષ્ટવીર્યસ્તુ કાકુત્સ્થો જનકેન મહાત્મના ।
સંપ્રદાનં સુતાયાસ્તુ રાઘવે કર્તુમિચ્છતિ ॥ 18 ॥
યદિ વો રોચતે વૃત્તં જનકસ્ય મહાત્મનઃ ।
પુરીં ગચ્છામહે શીઘ્રં મા ભૂત્કાલસ્ય પર્યયઃ ॥ 19 ॥
મંત્રિણો બાઢમિત્યાહુઃ સહ સર્વૈર્મહર્ષિભિઃ ।
સુપ્રીતશ્ચાબ્રવીદ્રાજા શ્વો યાત્રેતિ સ મંત્રિણઃ ॥ 20 ॥
મંત્રિણસ્તુ નરેંદ્રસ્ય રાત્રિં પરમસત્કૃતાઃ ।
ઊષુ સ્તેમુદિતા સ્સર્વે ગુણૈ સ્સર્વૈસ્સમન્વિતાઃ ॥ 21 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે અષ્ટષષ્ટિતમસ્સર્ગઃ ॥
