శ్రీమద్వాల్మీకీయ రామాయణే బాలకాండమ్ ।
అథ అష్టషష్టితమస్సర్గః ।
జనకేన సమాదిష్టా దూతాస్తే క్లాంతవాహనాః ।
త్రిరాత్రముషితా మార్గే తేఽయోధ్యాం ప్రావిశన్ పురీమ్ ॥ 1 ॥
రాజ్ఞో భవనమాసాద్య ద్వారస్థానిదమబ్రువన్ ।
శీఘ్రం నివేద్యతాం రాజ్ఞే దూతాన్నో జనకస్య చ ॥ 2 ॥
ఇత్యుక్తా ద్వారపాలాస్తే రాఘవాయ న్యవేదయన్ ।
తే రాజవచనాద్దూతా రాజవేశ్మప్రవేశితాః ।
దదృశుర్దేవసంకాశం వృద్ధం దశరథం నృపమ్ ॥ 3 ॥
బద్ధాంజలిపుటా స్సర్వే దూతా విగతసాధ్వసాః ।
రాజానం ప్రయతా వాక్యమబ్రువన్మధురాక్షరమ్ ॥ 4 ॥
మైథిలో జనకో రాజా సాగ్నిహోత్రపురస్కృతమ్ ।
కుశలం చావ్యయం చైవ సోపాధ్యాయపురోహితమ్ ॥ 5 ॥
ముహుర్ముహుర్మధురయా స్నేహసంయుక్తయా గిరా ।
జనకస్త్వాం మహారాజ పృచ్ఛతే సపురస్సరమ్ ॥ 6 ॥
పృష్ట్వా కుశలమవ్యగ్రం వైదేహో మిథిలాధిపః ।
కౌశికానుమతే వాక్యం భవంతమిదమబ్రవీత్ ॥ 7 ॥
పూర్వం ప్రతిజ్ఞా విదితా వీర్యశుల్కా మమాత్మజా ।
రాజానశ్చ కృతామర్షానిర్వీర్యా విముఖీకృతాః ॥ 8 ॥
సేయం మమ సుతా రాజన్ విశ్వామిత్రపురస్సరైః ।
యదృచ్ఛయాగతైర్వీరైర్నిర్జితా తవ పుత్రకైః ॥ 9 ॥
తచ్చ రాజన్ ధనుర్దివ్యం మధ్యే భగ్నం మహాత్మనా ।
రామేణ హి మహారాజ మహత్యాం జనసంసది ॥ 10 ॥
అస్మై దేయా మయా సీతా వీర్యశుల్కా మహాత్మనే ।
ప్రతిజ్ఞాం కర్తుమిచ్ఛామి తదనుజ్ఞాతుమర్హసి ॥ 11 ॥
సోపాధ్యాయో మహారాజ పురోహితపురస్సరః ।
శీఘ్రమాగచ్ఛ భద్రం తే ద్రష్టుమర్హసి రాఘవౌ ॥ 12 ॥
ప్రీతిం చ మమ రాజేంద్ర నిర్వర్తయితుమర్హసి ।
పుత్రయోరుభయోరేవ ప్రీతిం త్వమపి లప్స్యసే ॥ 13 ॥
ఏవం విదేహాధిపతిర్మధురం వాక్యమబ్రవీత్ ॥ 14 ॥
విశ్వామిత్రాభ్యనుజ్ఞాత శ్శతానందమతే స్థితః ।
ఇత్యుక్త్వా విరతా దూతా రాజగౌరవశంకితాః ॥ 15 ॥
దూతవాక్యం చ తచ్ఛ్రుత్వా రాజా పరమహర్షితః ।
వసిష్ఠం వామదేవం చ మంత్రిణోఽన్యాంశ్చ సోఽబ్రవీత్ ॥ 16 ॥
గుప్తః కుశికపుత్రేణ కౌసల్యానందవర్ధనః ।
లక్ష్మణేన సహ భ్రాత్రా విదేహేషు వసత్యసౌ ॥ 17 ॥
దృష్టవీర్యస్తు కాకుత్స్థో జనకేన మహాత్మనా ।
సంప్రదానం సుతాయాస్తు రాఘవే కర్తుమిచ్ఛతి ॥ 18 ॥
యది వో రోచతే వృత్తం జనకస్య మహాత్మనః ।
పురీం గచ్ఛామహే శీఘ్రం మా భూత్కాలస్య పర్యయః ॥ 19 ॥
మంత్రిణో బాఢమిత్యాహుః సహ సర్వైర్మహర్షిభిః ।
సుప్రీతశ్చాబ్రవీద్రాజా శ్వో యాత్రేతి స మంత్రిణః ॥ 20 ॥
మంత్రిణస్తు నరేంద్రస్య రాత్రిం పరమసత్కృతాః ।
ఊషు స్తేముదితా స్సర్వే గుణై స్సర్వైస్సమన్వితాః ॥ 21 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే అష్టషష్టితమస్సర్గః ॥
