ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടഷഷ്ടിതമസ്സര്ഗഃ ।
ജനകേന സമാദിഷ്ടാ ദൂതാസ്തേ ക്ലാംതവാഹനാഃ ।
ത്രിരാത്രമുഷിതാ മാര്ഗേ തേഽയോധ്യാം പ്രാവിശന് പുരീമ് ॥ 1 ॥
രാജ്ഞോ ഭവനമാസാദ്യ ദ്വാരസ്ഥാനിദമബ്രുവന് ।
ശീഘ്രം നിവേദ്യതാം രാജ്ഞേ ദൂതാന്നോ ജനകസ്യ ച ॥ 2 ॥
ഇത്യുക്താ ദ്വാരപാലാസ്തേ രാഘവായ ന്യവേദയന് ।
തേ രാജവചനാദ്ദൂതാ രാജവേശ്മപ്രവേശിതാഃ ।
ദദൃശുര്ദേവസംകാശം വൃദ്ധം ദശരഥം നൃപമ് ॥ 3 ॥
ബദ്ധാംജലിപുടാ സ്സർവേ ദൂതാ വിഗതസാധ്വസാഃ ।
രാജാനം പ്രയതാ വാക്യമബ്രുവന്മധുരാക്ഷരമ് ॥ 4 ॥
മൈഥിലോ ജനകോ രാജാ സാഗ്നിഹോത്രപുരസ്കൃതമ് ।
കുശലം ചാവ്യയം ചൈവ സോപാധ്യായപുരോഹിതമ് ॥ 5 ॥
മുഹുര്മുഹുര്മധുരയാ സ്നേഹസംയുക്തയാ ഗിരാ ।
ജനകസ്ത്വാം മഹാരാജ പൃച്ഛതേ സപുരസ്സരമ് ॥ 6 ॥
പൃഷ്ട്വാ കുശലമവ്യഗ്രം വൈദേഹോ മിഥിലാധിപഃ ।
കൌശികാനുമതേ വാക്യം ഭവംതമിദമബ്രവീത് ॥ 7 ॥
പൂർവം പ്രതിജ്ഞാ വിദിതാ വീര്യശുല്കാ മമാത്മജാ ।
രാജാനശ്ച കൃതാമര്ഷാനിർവീര്യാ വിമുഖീകൃതാഃ ॥ 8 ॥
സേയം മമ സുതാ രാജന് വിശ്വാമിത്രപുരസ്സരൈഃ ।
യദൃച്ഛയാഗതൈർവീരൈര്നിര്ജിതാ തവ പുത്രകൈഃ ॥ 9 ॥
തച്ച രാജന് ധനുര്ദിവ്യം മധ്യേ ഭഗ്നം മഹാത്മനാ ।
രാമേണ ഹി മഹാരാജ മഹത്യാം ജനസംസദി ॥ 10 ॥
അസ്മൈ ദേയാ മയാ സീതാ വീര്യശുല്കാ മഹാത്മനേ ।
പ്രതിജ്ഞാം കര്തുമിച്ഛാമി തദനുജ്ഞാതുമര്ഹസി ॥ 11 ॥
സോപാധ്യായോ മഹാരാജ പുരോഹിതപുരസ്സരഃ ।
ശീഘ്രമാഗച്ഛ ഭദ്രം തേ ദ്രഷ്ടുമര്ഹസി രാഘവൌ ॥ 12 ॥
പ്രീതിം ച മമ രാജേംദ്ര നിർവര്തയിതുമര്ഹസി ।
പുത്രയോരുഭയോരേവ പ്രീതിം ത്വമപി ലപ്സ്യസേ ॥ 13 ॥
ഏവം വിദേഹാധിപതിര്മധുരം വാക്യമബ്രവീത് ॥ 14 ॥
വിശ്വാമിത്രാഭ്യനുജ്ഞാത ശ്ശതാനംദമതേ സ്ഥിതഃ ।
ഇത്യുക്ത്വാ വിരതാ ദൂതാ രാജഗൌരവശംകിതാഃ ॥ 15 ॥
ദൂതവാക്യം ച തച്ഛ്രുത്വാ രാജാ പരമഹര്ഷിതഃ ।
വസിഷ്ഠം വാമദേവം ച മംത്രിണോഽന്യാംശ്ച സോഽബ്രവീത് ॥ 16 ॥
ഗുപ്തഃ കുശികപുത്രേണ കൌസല്യാനംദവര്ധനഃ ।
ലക്ഷ്മണേന സഹ ഭ്രാത്രാ വിദേഹേഷു വസത്യസൌ ॥ 17 ॥
ദൃഷ്ടവീര്യസ്തു കാകുത്സ്ഥോ ജനകേന മഹാത്മനാ ।
സംപ്രദാനം സുതായാസ്തു രാഘവേ കര്തുമിച്ഛതി ॥ 18 ॥
യദി വോ രോചതേ വൃത്തം ജനകസ്യ മഹാത്മനഃ ।
പുരീം ഗച്ഛാമഹേ ശീഘ്രം മാ ഭൂത്കാലസ്യ പര്യയഃ ॥ 19 ॥
മംത്രിണോ ബാഢമിത്യാഹുഃ സഹ സർവൈര്മഹര്ഷിഭിഃ ।
സുപ്രീതശ്ചാബ്രവീദ്രാജാ ശ്വോ യാത്രേതി സ മംത്രിണഃ ॥ 20 ॥
മംത്രിണസ്തു നരേംദ്രസ്യ രാത്രിം പരമസത്കൃതാഃ ।
ഊഷു സ്തേമുദിതാ സ്സർവേ ഗുണൈ സ്സർവൈസ്സമന്വിതാഃ ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടഷഷ്ടിതമസ്സര്ഗഃ ॥
