ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തതിതമസ്സര്ഗഃ ।
തതഃ പ്രഭാതേ ജനകഃ കൃതകര്മാ മഹര്ഷിഭിഃ ।
ഉവാച വാക്യം വാക്യജ്ഞ ശ്ശതാനംദം പുരോഹിതമ് ॥ 1 ॥
ഭ്രാതാ മമ മഹാതേജാ യവീയാനതിധാര്മികഃ ।
കുശധ്വജ ഇതി ഖ്യാതഃ പുരീമധ്യവസച്ഛുഭാമ് ॥ 2 ॥
വാര്യാഫലകപര്യംതാം പിബന്നിക്ഷുമതീം നദീമ് ।
സാംകാശ്യാം പുണ്യസംകാശാം വിമാനമിവ പുഷ്പകമ് ॥ 3 ॥
തമഹം ദ്രഷ്ടുമിച്ഛാമി യജ്ഞഗോപ്താ സ മേ മതഃ ।
പ്രീതിം സോഽപി മഹാതേജാ ഇമാം ഭോക്താ മയാ സഹ ॥ 4 ॥
ഏവമുക്തേ തു വചനേ ശതാനംദസ്യ സന്നിധൌ ।
ആഗതാഃ കേചിദവ്യഗ്രാ ജനകസ്താന് സമാദിശത് ॥ 5 ॥
ശാസനാത്തു നരേംദ്രസ്യ പ്രയയുശ്ശീഘ്രവാജിഭിഃ ।
സമാനേതും നരവ്യാഘ്രം വിഷ്ണുമിംദ്രാജ്ഞയാ യഥാ ॥ 6 ॥
സാംകാശ്യാം തേ സമാഗത്യ ദദൃശുശ്ച കുശധ്വജമ് ।
ന്യവേദയന്യഥാവൃത്തം ജനകസ്യ ച ചിംതിതമ് ॥ 7 ॥
തദ്വൃത്തം നൃപതി ശ്ശൃത്വാ ദൂതശ്രേഷ്ഠൈര്മഹാബലൈഃ ।
അജ്ഞായാഽഥ നരേംദ്രസ്യ ആജഗാമ കുശധ്വജഃ ॥ 8 ॥
സ ദദര്ശ മഹാത്മാനം ജനകം ധര്മവത്സലമ് ।
സോഽഭിവാദ്യ ശതാനംദം രാജാനം ചാപി ധാര്മികമ് ॥ 9 ॥
രാജാര്ഹം പരമം ദിവ്യമാസനം ചാഽധ്യരോഹത ।
ഉപവിഷ്ടാവുഭൌ തൌ തു ഭ്രാതരാവതിതേജസൌ ॥ 10 ॥
പ്രേഷയാമാസതുർവീരൌ മംത്രിശ്രേഷ്ഠം സുദാമനമ് ।
ഗച്ഛ മംത്രിപതേ ശീഘ്രമൈക്ഷ്വാകുമമിതപ്രഭമ് ॥ 11 ॥
ആത്മജൈസ്സഹ ദുര്ധര്ഷമാനയസ്വ സമംത്രിണമ് ।
ഔപകാര്യാം സ ഗത്വാ തു രഘൂണാം കുലവര്ധനമ് ॥ 12 ॥
ദദര്ശ ശിരസാ ചൈനമഭിവാദ്യേദമബ്രവീത് ।
അയോധ്യാധിപതേ വീര വൈദേഹോ മിഥിലാധിപഃ ॥ 13 ॥
സ ത്വാം ദ്രഷ്ടും വ്യവസിതസ്സോപാധ്യായപുരോഹിതമ് ।
മംത്രിശ്രേഷ്ഠവച ശ്ശൃത്വാ രാജാ സര്ഷിഗണസ്തദാ ॥ 14 ॥
സബംധുരഗമത്തത്ര ജനകോ യത്ര വര്തതേ ।
സ രാജാ മംത്രിസഹിത സ്സോപാധ്യായഃ സബാംധവഃ ॥ 15 ॥
വാക്യം വാക്യവിദാം ശ്രേഷ്ഠോ വൈദേഹമിദമബ്രവീത് ।
വിദിതം തേ മഹാരാജ ഇക്ഷ്വാകുകുലദൈവതമ് ॥ 16 ॥
വക്താ സർവേഷു കൃത്യേഷു വസിഷ്ഠോ ഭഗവാനൃഷിഃ ।
വിശ്വാമിത്രാഭ്യനുജ്ഞാതസ്സഹ സർവൈര്മഹര്ഷിഭിഃ ॥ 17 ॥
ഏഷ വക്ഷ്യതി ധര്മാത്മാ വസിഷ്ഠോ മേ യഥാക്രമമ് ।
ഏവമുക്ത്വാ നരശ്രേഷ്ഠേ രാജ്ഞാം മധ്യേ മഹാത്മനാമ് ॥ 18 ॥
തൂഷ്ണീംഭൂതേ ദശരഥേ വസിഷ്ഠോ ഭഗവാനൃഷിഃ ।
ഉവാച വാക്യം വാക്യജ്ഞോ വൈദേഹം സപുരോധസമ് ॥ 19 ॥
അവ്യക്തപ്രഭവോ ബ്രഹ്മാ ശാശ്വതോ നിത്യ അവ്യയഃ ।
തസ്മാന്മരീചി സ്സംജജ്ഞേ മരീചേഃ കാശ്യപഃ സുതഃ ॥ 20 ॥
വിവസ്വാന് കാശ്യപാജ്ജജ്ഞേ മനുർവൈവസ്വത സ്സ്മൃതഃ ।
മനുഃ പ്രജാപതിഃ പൂർവമിക്ഷ്വാകുസ്തു മനോസ്സുതഃ ॥ 21 ॥
തമിക്ഷ്വാകുമയോധ്യായാം രാജാനം വിദ്ധി പൂർവകമ് ।
ഇക്ഷ്വാകോസ്തു സുതശ്ശ്രീമാന് കുക്ഷിരിത്യേവ വിശ്രുതഃ ॥ 22 ॥
കുക്ഷേരഥാത്മജഃ ശ്രീമാന് വികുക്ഷിരുദപദ്യത ।
വികുക്ഷേസ്തു മഹാതേജാ ബാണഃ പുത്രഃ പ്രതാപവാന് ॥ 23 ॥
ബാണസ്യ തു മഹാതേജാ അനരണ്യഃ പ്രതാപവാന് ।
അനരണ്യാത്പൃഥുര്ജജ്ഞേ ത്രിശംകുസ്തു പൃഥോസ്സുതഃ ॥ 24 ॥
ത്രിശംകോരഭവത്പുത്രോ ദുംദുമാരോ മഹായശാഃ ।
യുവനാശ്വസുതസ്ത്വാസീന്മാംധാതാ പൃഥിവീപതിഃ ॥ 25 ॥
മാംധാതുസ്തു സുത ശ്ശ്രീമാന് സുസംധിരുദപദ്യത ।
സുസംധേരപി പുത്രൌ ദ്വൌ ധ്രുവസംധിഃ പ്രസേനജിത് ॥ 26 ॥
യശസ്വീ ധ്രുവസംധേസ്തു ഭരതോ നാമ നാമതഃ ।
ഭരതാത്തു മഹാതേജാ അസിതോ നാമ ജാതവാന് ॥ 27 ॥
യസ്യൈതേ പ്രതിരാജാന ഉദപദ്യംത ശത്രവഃ ।
ഹൈഹയാസ്താലജംഘാശ്ച ശൂരാശ്ച ശശിബിംദവഃ ॥ 28 ॥
താംസ്തു സ പ്രതിയുധ്യന് വൈ യുദ്ധേ രാജാ പ്രവാസിതഃ ।
ഹിമവംതമുപാഗമ്യ ഭൃഗുപ്രസ്രവണേഽവസത് ॥ 29 ॥
അസിതോഽല്പബലോ രാജാ മംത്രിഭിസ്സഹിതസ്തദാ ।
ദ്വേ ചാസ്യ ഭാര്യേ ഗര്ഭിണ്യൌ ബഭൂവതുരിതി ശ്രുതമ് ॥ 30 ॥
ഏകാ ഗര്ഭവിനാശായ സപത്ന്യൈ സഗരം ദദൌ ।
തത ശ്ശൈലവരം രമ്യം ബഭൂവാഭിരതോ മുനിഃ ॥ 31 ॥
ഭാര്ഗവശ്ച്യവനോ നാമ ഹിമവംതമുപാശ്രിതഃ ।
തത്രൈകാ തു മഹാഭാഗാ ഭാര്ഗവം ദേവവര്ചസമ് ॥ 32 ॥
വവംദേ പദ്മപത്രാക്ഷീ കാംക്ഷംതീ സുതമാത്മനഃ ।
തമൃഷിം സാഽഭ്യുപാഗമ്യ കാലിംദീ ചാഭ്യവാദയത് ॥ 33 ॥
സ താമഭ്യവദദ്വിപ്രഃ പുത്രേപ്സും പുത്രജന്മനി ।
തവ കുക്ഷൌ മഹാഭാഗേ സുപുത്രസ്സുമഹാബലഃ ॥ 34 ॥
മഹാവീര്യോ മഹാതേജാ അചിരാത്സംജനിഷ്യതി ।
ഗരേണ സഹിത ശ്ശ്രീമാന് മാ ശുചഃ കമലേക്ഷണേ ॥ 35 ॥
ച്യവനം തു നമസ്കൃത്യ രാജപുത്രീ പതിവ്രതാ ।
പതിശോകാതുരാ തസ്മാത്പുത്രം ദേവീ വ്യജായത ॥ 36 ॥
സപത്ന്യാ തു ഗരസ്തസ്യൈ ദത്തോ ഗര്ഭജിഘാംസയാ ।
സഹ തേന ഗരേണൈവ ജാതഃ സ സഗരോഽഭവത് ॥ 37 ॥
സഗരസ്യാസമംജസ്തു അസമംജാത്തഥാംഽശുമാന് ।
ദിലീപോംഽശുമതഃ പുത്രോ ദിലീപസ്യ ഭഗീരഥഃ ॥ 38 ॥
ഭഗീരഥാത്കകുത്സ്ഥശ്ച കകുത്സ്ഥസ്യ രഘുസ്സുതഃ ।
രഘോസ്തു പുത്രസ്തേജസ്വീ പ്രവൃദ്ധഃ പുരുഷാദകഃ ॥ 39 ॥
കല്മാഷപാദോ ഹ്യഭവത്തസ്മാജ്ജാതസ്തു ശംഖണഃ ।
സുദര്ശനഃ ശംഘണസ്യ അഗ്നിവര്ണ സ്സുദര്ശനാത് ॥ 40 ॥
ശീഘ്രഗസ്ത്വഗ്നിവര്ണസ്യ ശീഘ്രഗസ്യ മരു സ്സുതഃ ।
മരോഃ പ്രശുശ്രുകസ്ത്വാസീദംബരീഷഃ പ്രശുശ്രൃകാത് ॥ 41 ॥
അംബരീഷസ്യ പുത്രോഽഭൂന്നഹുഷഃ പൃഥിവീപതിഃ ।
നഹുഷസ്യ യയാതിസ്തു നാഭാഗസ്തു യയാതിജഃ ॥ 42 ॥
നാഭാഗസ്യ ബഭൂവാജഃ അജാദ്ദശരഥോഽഭവത് ।
അസ്മാദ്ദശരഥാജ്ജാതൌ ഭ്രാതരൌ രാമലക്ഷ്മണൌ ॥ 43 ॥
ആദിവംശവിശുദ്ധാനാം രാജ്ഞാം പരമധര്മിണാമ് ।
ഇക്ഷ്വാകുകുലജാതാനാം വീരാണാം സത്യവാദിനാമ് ॥ 44 ॥
രാമലക്ഷ്മണയോരര്ഥേ ത്വത്സുതേ വരയേ നൃപ ।
സദൃശാഭ്യാം നൃപശ്രേഷ്ഠ സദൃശേ ദാതുമര്ഹസി ॥ 45 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തതിതമസ്സര്ഗഃ ॥
